អណ្ដើក​សមុទ្រ​ប្រភេទ​ល្មិច​ដែល​ជា​ប្រភេទ​កំពុង​រង​គ្រោះ​ថ្នាក់​ ត្រូវ​បាន​ប្រទះ​ឃើញ​ឡើង​មក​ទម្លាក់​ពង​កូន​នៅ​លើ​កោះ​ពូលូ​វ៉ៃ​ដែល​ជា​តំបន់​កោះ​ដាច់​ស្រយាល​មួយ​របស់​កម្ពុជា។ នេះ​បើ​តាម​ការ​បង្ហោះ​នៅ​លើ​ផេក​ផ្លូវ​ការ​របស់​ក្រសួង​កសិកម្ម រុក្ខា​ប្រមាញ់ និង​នេសាទ។ ​

រូបភាព ថតចេញពីក្នុងវីដេអូ

កាល​ពី​ពេល​ថ្មីៗ​កន្លង​ទៅ​នេះ​អ្នក​ស្ម័គ្រចិត្ត​ដើរ​សំបុក​អណ្ដើក​មក​ពី​គម្រោង​អភិរក្ស​សត្វ​សមុទ្រ​ បាន​ប្រទះ​ឃើញ​អណ្ដើក​សមុទ្រ​ញី​ពេញ​វ័យ​ប្រភេទ​ល្មិច​១​ក្បាល​ ជា​ប្រភេទ​កំពុង​រង​គ្រោះ​ថ្នាក់ ​(ជិត​ដាច់​ពូជ) បាន​ឡើង​មក​ទម្លាក់​ពង​កូន​នៅ​លើ​ឆ្នេរ​នៃ​កោះ​ពូលូវ៉ៃ ភាគ​និរតី​នៃ​ប្រទេស​កម្ពុជា។

បច្ចុប្បន្ន​អណ្ដើក​១​ក្បាល​នេះ​​បាន​លែង​ឱ្យ​ចូល​សមុទ្រ​ និង​ត្រូវ​បាន​កិប​ស្លាក​ដោយ​សុវត្ថិភាព​ពី​អ្នក​ស្ម័គ្រចិត្ត​ដែល​ទទួល​ការ​បណ្ដុះបណ្ដាល​យ៉ាង​ច្បាស់​លាស់​ផង​ដែរ។ គួរ​រម្លឹក​ដែរ​ថា​កាល​ឆ្នាំ​២០២៤ អ្នក​ស្ម័គ្រចិត្ត​ដើរ​សំបុក​អណ្ដើក​ក៏​ធ្លាប់​បាន​ប្រទះ​ឃើញ​អណ្ដើក​ប្រភេទ​នេះ​ម្ដង​ដែរ​នៅ​លើ​កោះ​ដាច់​ស្រយាល​មួយ​នេះ។ ​

គួរ​ឱ្យ​ដឹង​ដែរ​ថា អណ្តើកសមុទ្រប្រភេទល្មិច (Chelonia mydas) កំពុងទទួលរងការគម្រាមកំហែងពីការនេសាទលើសកម្រិត ការនេសាទបានដោយចៃដន្យ ការបាត់បង់ទីជម្រក ការបំពុល និងបម្រែបម្រួលអាកាសធាតុ៕

រូបភាព ៖ Fauna & Flora – Cambodia Programme 

រូបភាព ៖ Sea Turtle Preservation Society

ចុចទីនេះដើម្បីទស្សនាវីដេអូ ៖ https://www.facebook.com/share/v/1HpPByaEqp/