ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
មហាជនកំពុងផ្ទុះការចាប់អារម្មណ៍ និងកោតសរសើរយ៉ាងក្រៃលេងនូវគំនិតច្នៃប្រឌិតរបស់មត្តេយ្យសិក្សាមួយកន្លែង ដែលស្ថិតនៅលើទឹកដីព្រំប្រទល់កម្ពុជា ថៃ ហើយថែមទាំងចង់ឲ្យមានសាលាដែលរៀបចំបែបនេះមានវត្តមានក្នុងស្រុកភូមិថែមទៀតផង។
មានចម្ងាយប្រមាណជា ១៨ គីឡូម៉ែត្រ ពីទីរួមខេត្តបន្ទាយមានជ័យ ស្ថិតនៅក្នុងស្រុកស្វាយចេក មត្តេយសិក្សាធនធានកកោះ បានក្លាយជាកន្លែងបណ្ដុះបណ្ដាលដែលឆក់បានបេះដូងកុមារតូចៗ ឲ្យចង់ចូលរៀន ជាមួយបរិស្ថានសិក្សាល្អ ទាំងក្នុង និងក្រៅ។ សាលាដ៏គួរឲ្យស្រលាញ់មួយនេះ ក៏បានក្លាយជាទីចាប់អារម្មណ៍នៃអ្នកលេងបណ្តាញសង្គមហ្វេសបុកដោយមានការចូលខមិនសរសើរមិនដាច់ពីមាត់ និងចែករំលែកបន្តគ្នាយ៉ាងច្រើន នេះក៏ព្រោះតែភាពច្នៃប្រឌិត ការរៀបចំ តុបតែងលម្អ បរិស្ថានក្នុងសាលាដែលមានដូចជា សួនច្បារ និងសួនផ្កាចម្រុះពណ៌។
មិនត្រឹមអ្នកលេងបណ្ដាញសង្គមប៉ុណ្ណោះទេ សូម្បីតែផេកផ្លូវការរបស់ក្រសួងអប់រំ ក៏បានយករូបភាពទៅចែកចាយបន្ត និងកោតសរសើរចំពោះការរៀបចំរបស់សាលានេះដែរ។ កាន់តែប្លែកភ្នែក គឺការរៀបចំនូវពាក្យស្លោកប្រកបដោយចំណេះដឹង និងការក្រើនរំលឹក ជាពិសេសនោះគឺអក្ខរក្រមជាភាសាខ្មែរ និងអង់គ្លេស នៅតាមរបងសាលា ដែលនេះជាចំណីភ្នែកនៃចំណេះដឹង កាន់តែមើល កាន់តែចំណេញ កាន់តែអាន កាន់តែចេះ។
កាន់តែគួរឲ្យកោតសរសើរ និងស្ញប់ស្ញែង ភាពស្រស់ស្អាតនៃសាលាមួយនេះ បានកើតឡើងដោយការសហការគ្នាដោយពលរដ្ឋនៅក្នុងភូមិស្រុក ដែលមានអ្នកគ្រូ ក៏ដូចជាមាតាបិតារបស់សិស្ស និងអ្នកពាក់ព័ន្ធជាច្រើនទៀត។ តាមរយៈការផ្តល់បទសម្ភាសន៍ដោយអ្នកស្រី គុយ ម៉ារី នាយិកានៃមត្តេយសិក្សាធនធានកកោះ បានឲ្យដឹងថា “ការរៀបចំ តុបតែងលម្អនេះ មិនបានចំណាយថវិការច្រើននោះទេ ព្រោះថាយើងប្រើវត្ថុធាតុដើមដែលមាននៅក្នុងស្រុកច្រើន”។
មិនតែប៉ុណ្ណោះ មត្តេយ្យសិក្សាមួយនេះក៏មានការរួមចំណែកពីម្តាយរបស់កូនសិស្សតូចៗ ដែលពួកគេតែងជួយទំនុកបម្រុង និងជួយចម្អិនអាហារសម្រាប់សិស្សមត្តេយ្យទាំងនោះផងដែរ។ ទាំងនេះស្តែងចេញពីការយកចិត្តទុកដាក់ ការខ្វាយខ្វល់ពីសុខុលមាលភាពរបស់កូនតូចៗរបស់មាតាបិតាសិស្ស និងការចូលរួមចំណែកក្នុងជួយគាំទ្រការដាក់ឡើងនូវគោលនយោបាយ សុខភាពកុមារជាចម្បងនៃការសិក្សា។
នៅក្នុងបទសម្ភាស អ្នកស្រីនាយិកាបានបន្ថែមទៀតថា “កុមារដែលរៀនក្នុងមត្តេយ្យធនធានកកោះគឺមិនត្រឹមតែទទួលការរៀននៅខាងក្នុងថ្នាក់តែមួយមុខនោះទេ ប៉ុន្តែពួកគេនឹងរៀនបានគ្រប់ទីកន្លែងជាមួយការដាក់នូវពាក្យស្លោក ក៏ដូចជាអក្ខរក្រមជាភាសាអង់គ្លេស និងខ្មែរ ជាមួយបរិស្ថានបៃតងស្រស់ស្អាតនៅក្នុងសាលារៀន”។
អ្នកស្រីនាយិកាចង់ឲ្យឪពុកម្តាយគ្រប់រូបបញ្ជូនកូនដែលមានអាយុចាប់ពី ៣ ឆ្នាំឲ្យចូលរៀនគ្រប់ៗគ្នា ព្រោះកុមារគឺជាគ្រឹះដ៏សំខាន់ក្នុងការបណ្តុះនូវចំណេះដឹង។ លោកស្រីក៏បានសំណូមពរឲ្យមត្តេយ្យសិក្សាទូទាំងប្រទេសទាំងក្នុងរាជធានី និងខេត្តយកចិត្តទុកដាក់លើបរិស្ថានបៃតង ដើម្បីជាចំណែក្នុងការសិក្សារបស់កុមារ និងជួយឲ្យពួកគេមានសុខភាពល្អផងដែរ។
គួរឲ្យដឹងដែរថា ចាប់តាំងពីឆ្នាំ ២០១៩ មត្តេយ្យធនធានកកោះបានអភិវឌ្ឍជាបន្តបន្ទាប់ទៅលើការតុបតែងលម្អ ដែលមានការរួមបញ្ចូលនូវសួនច្បារ សួនច្បារចម្រុះពណ៌ អក្ខរក្រមជាភាសាខ្មែរ និងអង់គ្លេស ក៏ដូចជាពាក្យស្លោកចំណេះដឹងថ្មីៗផងដែរ៕
Account
Security
Favourite Content