បន្ទាប់ពីរឿងអាស្រូវបើកបរទាំងស្រវឹង និងបង្កឲ្យមានគ្រោះថ្នាក់ចរាចរណ៍តារាសម្ដែងស្រីកូរ៉េវ័យក្មេង Kim Saeron ត្រូវបានមហាជនជាច្រើនរិះគន់ព្រោងព្រាត ខណៈអាជីពសិល្បៈរបស់នាងក៏ចាប់ផ្ដើមមានភាពរង្គោះរង្គើអស់ការងារធ្វើ។ ជាមួយគ្នាដែរ តារាស្រីរូបនេះក៏បានត្រឡប់មកវិញតាមរយៈការបញ្ចេញមុខក្នុងវីដេអូចម្រៀង និងបង្ហោះរូបភាពជាហូរហែ។ តែទោះជាយ៉ាងណាក្ដីរូបនាង នៅតែមិនសូវទទួលបានការចាប់អារម្មណ៍ លើសពីនេះថែមទាំងទទួលបានមតិរិះគន់ទៀត។

ថ្មីៗ នេះ Kim Saeron បានបង្ហោះរូបភាពប៉ុន្មានសន្លឹកជាមួយស្ទីលម៉ូតសក់ថ្មី ដោយម៉ូតសក់នោះខ្លីដូចមនុស្សប្រុស ប៉ុន្ដែមើលទៅពិតជាទាក់ទាញប្លែក និងស្រស់ស្អាត។ រូបនាងក៏បានក្លាយជាទីចាប់អារម្មណ៍ម្ដងទៀត និងបានក្លាយជារឿងត្រូវមហាជនយកមកពិភាក្សាលើបណ្ដាញសង្គម។ ក្រៅពីបង្ហោះរូបភាពសក់ខ្លី Kim Saeron ក៏បានបង្ហោះរូបភាពប៉ុន្មានសន្លឹកទៀតដែលបង្ហាញឲ្យឃើញពីសម្រស់របស់នាងកាន់តែស្រស់ស្អាត និងមើលទៅប្លែកជាងមុន។


ការបង្ហោះរូបភាពជាច្រើនសន្លឹកនេះ ធ្វើឲ្យមហាជនជឿថា រូបនាងប្រហែលជាត្រៀមខ្លួនត្រឡប់ចូលសិល្បៈវិញ ក្រោយរឿងអាស្រូវរបស់នាងហាក់មានការស្ងប់ស្ងាត់ជាងមុន។ អ្នកគាំទ្រជាច្រើនក៏នៅតែបញ្ចេញមតិគាំទ្រដល់ការត្រឡប់មកវិញរបស់នាង ដោយសារតែនាងជាតារាស្រីម្នាក់ដែលមានទេពកោសល្យម្នាក់ មិនគួរមើលរំលង។ តែមហាជនមួយចំនួនក៏លើកឡើងថា មិនគាំទ្រដល់រូបនាងទៀតឡើយ ជាពិសេស នាងគួរតែនៅពិចារណាកំហុសរបស់ខ្លួនសិន មិនគួរឆាប់ត្រឡប់មកវិញនោះទេ។


គួរបញ្ជាក់ថា ការបើកបរទាំងស្រវឹង និងបង្កគ្រោះថ្នាក់ចរាចរណ៍កាលពីខែ ឧសភា ឆ្នាំ ២០២២ Kim Saeron ត្រូវបានគេផាកពិន័យប្រាក់ប្រមាណ ១៥ ៣៣៤ ដុល្លារអាមេរិក។ មេធាវីតំណាងរបស់ Kim Saeron បានលើកឡើងថា រូបនាងពិតជាមានការស្ដាយក្រោយខ្លាំងចំពោះទង្វើរបស់ខ្លួន និងថែមទាំងទៅសុំទោសផ្ទាល់ដល់ជនរងគ្រោះទាំងឡាយដែលរងការប៉ះពាល់ដោយសារតែរូបនាង ៕























Account
Security
Favourite Content