តារាចម្រៀង ស៊ូ ស៊ីរីកា បានប្រកាសពីការចាកចេញពីផលិតកម្មថោនជាផ្លូវការ ក្រោយជ្រកកោនទ្រនំចាស់ ៨ ឆ្នាំ បន្ទាប់ពីប្រឡងកម្មវិធី The Voice អំឡុងឆ្នាំ ២០១៤។ បើទោះជាមិនជាប់ជយលាភី តែ ស៊ីរីកា ពិតជាមានទីផ្សារខ្លាំង ព្រោះនាងអាចចូលផលិតកម្មជ្រកកោនបានយ៉ាងឆាប់រហ័ស ព្រោះសមត្ថភាព និងទេពកោសល្យពីកំណើត។
ស៊ូ ស៊ីរីកា បានរៀបរាប់ថា “នាងខ្ញុំ ស៊ូ ស៊ីរីកា សូមគោពរជម្រាបសួរ ពុកម៉ែបងប្អូនអ្នកគ្រាំទ្រ ទាំងអស់គ្នា អោយបានជ្រាបថា នាងខ្ញុំ ស៊ូ ស៊ូ ស៊ីរីកា បានចាកចេញពីផលិតកម្ម ថោន ហើយ“។ ក្នុងសារដែលម្ចាស់បទ “ស្រលាញ់បងលើសហើយ” បង្ហោះលើហ្វេសប៊ុកកាលពីយប់មិញ បានអរគុណម្ចាស់ផលិតកម្ម និងក្រុមការងារចាស់ទាំងអស ដែលកន្លងមកបានជួយជ្រោមជ្រែង សម្រាប់ពេល ៨ ឆ្នាំដែលមានឈ្មោះជាតារារបស់ ថោន។ ក្នុងនោះនាងក៏បានផ្ដាំផ្ញើបន្ថែមថា បងប្អូនក្រុមការងារទាំងអស់គ្នា នឹងសប្បាយចិត្ត ជាមួយការសម្រេចចិត្តចាកចេញរបស់នាង។
មិនទាន់បញ្ចប់ត្រឹមនេះឡើយ ចៅស្រីអតីតតារាភាពយន្តជើងចាស់ កែវ មន្ថា ដែលល្បីល្បាញតាំងពីទសវត្សរ៍ឆ្នាំ ៦០-៧០ ស៊ូ ស៊ីរីកា បានបញ្ជាក់ជាចុងក្រោយថា មួយរយៈនេះនាងកំពុងរវល់ជាមួយការងារផ្ទាល់ខ្លួនខ្លះៗ ហើយក៏កំពុងតែត្រៀមនាំយកស្នាដៃថ្មីៗ ដែលអ្នកគាំទ្រ កំពុងតែរង់ចាំផងដែរ ហើយការងារថ្មីនោះពិតជាប្លែកសម្រាប់អ្នកគាំទ្រនាង ក្នុងការវិលមកវិញជាថ្មី ក្នុងពេលឆាប់ៗនេះ។
គួរបញ្ជាក់ផងដែរថា កាលពីខែ ១២ ឆ្នាំមុន ស៊ូ ស៊ីរីកា ត្រូវបានគេសង្ស័យបានចូលផលិតកម្មបារមី ព្រោះកាលនោះ វណ្ណដា មានការសម្ដែងនៅពហុកីឡដ្ឋានជាតិមរតកតេជោ ក្នុងពិធីបិទកីឡាជាតិលើកទី៣ និងកីឡាជាតិជនពិការលើកទី១ នាងក៏មានវត្តមានជាក្រុមការងាររបស់ បារមីដែរ តែពេលនោះតារាចម្រៀងរូបនោះ មិនទាន់បញ្ជាក់អ្វីទាំងអស់៕

























Account
Security
Favourite Content