គេនៅចាំបានថា អតីតជយលាភី Miss Grand Cambodia 2020 កញ្ញា សេង រដ្ឋា បានបោះជំហានចូលវិស័យភាពយន្តដំបូងបង្អស់ក្នុងរឿងភាគបុរាណរបស់ប៉ុស្តិ៍ទូរទស្សន៍ភីអិនអិន គឺរឿង «បាបស្នេហ៍អតីត» ដោយកាលនោះនាងត្រូវជ្រើសឱ្យសម្តែងជាតួឯកស្រី គូនឹងតួឯកប្រុសលោក ឃឹម ហ្សានីត។ ដោយសាររឿងនេះជារឿងដំបូង រដ្ឋា មិនសូវពេញចិត្តការសម្តែងខ្លួនឯងប៉ុន្មានទេ ព្រោះនាងយល់ថានៅមានចំណុចខ្វះខាតច្រើន និងមិនសូវជឿជាក់លើខ្លួនឯង ប៉ុន្តែចំណុចល្អនោះគឺនាងស្វែងរកឃើញថា ខ្លួនឯងចូលចិត្តការសម្តែងក្រោយពីនាងថតរឿងនេះរយៈពេលប្រមាណជាង១ខែរួចមក។
ថ្វីបើរឿងនេះទទួលបានទាំងសរសើរ និងការរិះគន់ទន្ទឹមគ្នា ប៉ុន្តែគេកត់សម្គាល់បានថា រឿងនេះបានជួយរុញច្រានប្រជាប្រិយភាពរបស់ សេង រដ្ឋា ខ្លាំងមែនទែន ព្រោះការសម្តែងក្នុងរឿងនេះ ធ្វើឱ្យមហាជនស្គាល់នាងកាន់តែច្រើនឡើង ចំណែកការងារសិល្បៈផ្សេងៗក៏ដង្ហែគ្នាមករកនាង ធ្វើឱ្យទីផ្សារសិល្បៈនាងឡើងស្រឺតៗតែម្តង។

បន្ទាប់ពីរកឃើញថា ខ្លួនឯងចូលចិត្តការសម្តែងហើយនោះ តារាស្រីមានប្រភពមកពីខេត្តកំពង់ធំរូបនេះ បានក្តោបយកឱកាសសម្តែងក្នុងរឿងភាគខ្មែរជាច្រើន ដោយខ្លះបានចាក់បញ្ចាំងហើយ ខ្លះទៀតត្រៀមកំពុងចាក់បញ្ចាំង។
សម្រាប់ឆ្នាំថ្មី ២០២៣នេះ សេង រដ្ឋា ក៏មានវណ្ណកម្មស្នាដៃ រឿងភាគបុរាណថ្មីមកកំដរចំណីចក្ខុហ្វេនរបស់នាងដែល ចំណងជើងថា « បុព្វេនិម្មិត » ត្រៀមចាក់បញ្ចាំងប៉ុស្តិ៍ទូរទស្សន៍ភីអិនអិននាងពេលឆាប់ៗនេះ។ តារាស្រីឆ្វាក់តួឯករឿងភាគបុរាណរូបនេះ នឹងប៉ះគ្នាជាមួយដៃគូចាស់របស់នាង គឺលោក ឃឹម ហ្សានីត ដែលហ្វេនសរសើរថា សម្តែងស័ក្ដិសមជាមួយគ្នាឥតខ្ចោះ។ ការប៉ះគ្នារវាងតារាសម្តែងកម្ពស់ 1.73cm និងតារាសម្តែងកម្ពស់ 1.85cm ក្នុងរឿងភាគថ្មី « បុព្វេនិម្មិត » នឹងធ្វើឱ្យកក្រើកពិភពសម្តែងជាថ្មីម្តងទៀត ព្រោះការសម្តែងលើកមុនរបស់អ្នកទាំងពីរពិតជាស៊ីម៉េទ្រីគ្នាខ្លាំងណាស់។
ប្រាប់ឱ្យអ្នកសារព័ត៌មានក្នុងស្រុកដឹងក្នុងពិធី PNN Showcase កាលពីពេលកន្លងទៅ រដ្ឋា និង ហ្សានីត ថា ហ្វេននឹងភ្ញាក់ផ្អើលជាថ្មីម្តងទៀត ដោយសារការប៉ះគ្នាលើកនេះ ពិតជាពិសេស និងប្លែកជាងលើកមុនៗ សូម្បីតែនាងជាសាមីខ្លួន ក៏ពេញចិត្តស្នាដៃថ្មីដែលខ្លួនសម្តែងនេះដែរ។
តារាស្រីកំពុងមានប្រជាប្រិយរូបនេះ មើលទៅហាក់ជឿជាក់លើកសម្តែងខ្លួនឯងក្នុងរឿង « បុព្វេនិម្មិត » នេះណាស់ ដោយនាងនិយាយថា ការសម្តែងពីមួយរឿងទៅមួយរឿង កាន់តែធ្វើឱ្យនាងទទួលបានបទពិសោធន៍ថ្មីៗ ទោះបីជាការថតរឿងនេះជួបនូវការលំបាកជាច្រើន ក៏នាងមិនរុញរាឡើយ។ ចំណែក តួឯកប្រុសវិញ ក៏បានលើកឡើងថា រឿងបុរាណលាយសម័យនេះមានចំណុចពិសេសៗជាច្រើនបង្កប់នៅក្នុងសាច់រឿង សូម្បីតែលោកក៏មិននឹកស្មានថាអ្នកដឹកនាំរឿងកែសាច់រឿងទៅជាបែបនេះទេ។
តារាសម្តែងកូនមួយ ឃឹម ហ្សានីត នៅតែសរសើរ សេង រដ្ឋា ជាដៃគូសម្តែងដ៏ល្អកម្ររកបាន ព្រោះនាងមិនត្រឹមតែពូកែសម្តែងប៉ុណ្ណោះទេ នាងថែមទាំងរួសរាយរាក់ទាក់ និងគួរឱ្យស្រឡាញ់ទៀតផង។ លោកសង្ឃឹមថា នឹងបានចាប់ដៃគូគ្នាជាបន្តបន្ទាប់ទៀតនៅក្នុងរឿងភាគក្រោយៗទៀត៕























Account
Security
Favourite Content