ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
Kenny Ho ជាតារាសម្ដែងប្រុសជើងចាស់ម្នាក់ក្នុងប្រទេសចិននាជំនាន់ទស្សវត្សន៍ឆ្នាំ ៩០ ភាគច្រើនគ្រប់គ្នាស្គាល់រូបលោកតាមរយៈរឿងភាគល្បីមានចំណងជើងថា “តុលាការមុខដែក ប៉ាវចិន” ដោយសម្ដែងជាតួអង្គ អង្គរក្ស ចាន់ ចាវ។ ក្រៅពីអាជីពជាតារាសម្ដែង លោកក៏ជាតារាចម្រៀងដ៏ប៉ិនប្រសប់ម្នាក់។ តែយ៉ាងណាមិញ បង្ហាញខ្លួនក្នុងរឿងភាគនានាត្រឹមឆ្នាំ ២០១៤ លោកក៏ស្រាប់តែបាត់មុខចេញពីពិភពសិល្បៈ និងធ្វើឱ្យអ្នកគាំទ្រនឹករលឹកដល់ការសម្ដែងរបស់លោកជាខ្លាំង។
តើមានអាថ៍កំបាំង ឬរឿងរ៉ាវអ្វីនៅពីក្រោយការចាកចេញពីសិល្បៈរបស់លោក? តោះសប្ដាហ៍នេះមកដឹងពីប្រវត្ដិខ្លះៗ របស់លោក Kenny Ho និងរឿងរ៉ាវដែលធ្វើឱ្យលោកបាត់ខ្លួនចេញពីពិភពសិល្បៈអស់ប្រមាណជាជិត ១០ ឆ្នាំ៖
លោក Kenny Ho មានឈ្មោះពិតថា He Jia Jing កើតនៅថ្ងៃទី ២៩ ខែ ធ្នូ ឆ្នាំ ១៩៥៩ នៅខេត្ដ Guangdong ប្រទេសចិន បច្ចុប្បន្នលោកមានអាយុ ៦៣ ហើយ។ ឳពុកម្ដាយរបស់លោកបានលែងលះគ្នាតាំងតែពីលោកនៅវ័យកុមារ។ លោកបញ្ចប់ការសិក្សានៅសកលវិទ្យាល័យ Beijing University។ មុនមកធ្វើជាតារាសម្ដែងដើមឡើយលោកមានក្ដីស្រមៃចង់ក្លាយជាកីឡាករបាល់ទាត់ម្នាក់ ប៉ុន្ដែដោយសារប្រឡងមិនជាប់ទើបលោកផ្លាស់ប្ដូរមកចាប់អាជីពជាតារាសម្ដែងវិញ។ ណាមួយជីវភាពគ្រួសារហាក់មិនសូវល្អទើបធ្វើឱ្យលោកត្រូវប្រឹងប្រែងរកប្រាក់ដើម្បីចិញ្ចឹមជីវិតប្រចាំថ្ងៃ។
លោកបង្ហាញខ្លួនក្នុងរឿងភាគដំបូងបំផុតនៅឆ្នាំ ១៩៨២ ដោយរឿងមានចំណងជើងថា “The General” ជាបន្ដបន្ទាប់លោកក៏បានក្ដោបក្ដាប់ដំណែងតួឯកដូចជារឿង “Eight Thousand Li Of Cloud and Moon” ក្នុងឆ្នាំ ១៩៨៨ និងរឿង “The Blood Sword” ក្នុងឆ្នាំ ១៩៩០។ មកដល់ឆ្នាំ ១៩៩៣ ជាឆ្នាំដែលប្រជាប្រិយភាពរបស់លោកហាក់ហក់ឡើងខ្លាំងទប់ស្ទើរមិនជាប់ ដោយសារលោកបានសម្ដែងក្នុងរឿង “Justice Bao” ឬអ្នកគាំទ្រកម្ពុជាស្គាល់ថារឿង “តុលាការមុខដែក ប៉ាវចិន”។ តួអង្គ ចាន់ ចាវ បានធ្វើឱ្យមហាជនជាច្រើនកាន់តែស្គាល់ និងចំណាំរូបលោក មិនតែប៉ុណ្ណោះមិនថារឿងមួយនេះត្រូវបានទិញសិទ្ធិយកទៅផលិតសារជាថ្មីប៉ុន្មានដងឡើយ លោក Kenny Ho នៅតែត្រូវមហាជនចាត់ទុកជាតារាប្រុសដែលសម្ដែងតួអង្គ ចាន់ ចាវ សមឥតខ្ចោះបំផុត។ ក្នុងអាជីពជាអ្នកសិល្បៈលោកបានបង្ហាញខ្លួនក្នុងរឿងភាគ និងភាពយន្ដកុនប្រមាណជិត ៤០ រឿង។ រឿងដែលលោកបង្ហាញខ្លួនចុងក្រោយបំផុតគឺ “Justice Bao: Arbiter of Kaifeng Mystery” ក្នុងឆ្នាំ ២០១២។
ក្រឡេកមកមើលជីវិតឯកជនវិញ តារាប្រុសរូបនេះមិនមានព័ត៌មានបញ្ជាក់ជាផ្លូវការថាបានរៀបការ ឬសាងចំណងស្នេហាជាមួយនារីណាម្នាក់ឡើយ។ សព្វថ្ងៃលោកបានចំណាយជីវិតរស់នៅយ៉ាងសាមញ្ញរីករាយម្នាក់ឯងដោយទំនេរៗ ក៏ដើរហាត់ប្រាណ ជិះកង់ឡើងភ្នំ ឬដើរកម្សាន្ដទៅកន្លែងនានាជាដើម។
គិតមកទល់ពេលនេះប្រហែលជាប្រមាណជិត ១០ ឆ្នាំហើយដែលតារាប្រុសជើងចាស់ Kenny Ho មិនបានបង្ហាញខ្លួនក្នុងវិស័យសិល្បៈ។ តែដើម្បីកុំឱ្យអ្នកគាំទ្រមានការនឹករលឹក លោកក៏បានបង្ហោះរូបមួយចំនួនក្នុងបណ្ដាញសង្គម Weibo របស់ខ្លួន។
យោងតាមប្រភពព័ត៌មានហុងកុង HK01 តារាប្រុស Kenny Ho បានទម្លាយពីហេតុផលដែលធ្វើឱ្យលោកសម្រេចចិត្តចាកចេញពីសិល្បៈ។ លោកបានឱ្យដឹងថា៖ កំឡុងពេលដែលលោកនៅធ្វើជាតារាសម្ដែងថ្វីបើកេរ្ដិ៍ឈ្មោះរបស់លោកហាក់មានភាពល្បីល្បាញ តែលោករកប្រាក់ចំណូលមិនច្រើនជាដុំកំភួនដូចដែលគ្រប់គ្នាបានគិតឡើយ។ ជាក់ស្ដែង ពេលខ្លះសម្ដែងឡើងរាប់ខែ ទទួលបានប្រាក់តែប៉ុន្មានរយដុល្លារប៉ុណ្ណោះ លុះក្រោយៗ មកក៏បានដល់ត្រឹមខ្ទង់ពាន់ដុល្លារ។
លោកបានបន្ដថា៖ ប្រសិនបើពឹងផ្អែកលើតែការសម្ដែងមួយមុខ លោកអាចនឹងគ្មានសល់ប្រាក់អ្វីឡើយព្រោះការចំណាយក៏ច្រើន បើកប្រាក់ឈ្នួលពីថតមកភ្លាមក៏ចេញទៅវិញអស់។ លោកមិនអាចបណ្ដែតបណ្ដោយឱ្យជីវិតរបស់លោកនៅដូច្នេះបានតទៅទៀតឡើយ លោកបានគិតថាយ៉ាងហោចណាស់ក៏ត្រូវមានគោលដៅជីវិតមួយ ឬធ្វើអ្វីមួយសម្រាប់ជីវិតរបស់លោក។
ក្នុងឆ្នាំ ២០១៣ លោក Kenny បានចាប់ដៃគូជាមួយមិត្តភក្ដិរបស់លោកបោះទុនវិនិយោគប្រមាណជិត ១៤ លានដុល្លារអាមេរិកចូលទៅរោងចក្រ “Jin Jia Zhuang” ដែលជារោងចក្រផ្គត់ផ្គង់អាហារសុខភាពធ្វើពីគ្រាប់ធញ្ញជាតិដែលមានទីតាំងនៅទីក្រុង Huizhou ខេត្ត GuangDong ប្រទេសចិន។ ក្រៅពីនេះរោងចក្ររបស់លោកក៏មានលក់អាហារសម្រន់ដែលល្អសម្រាប់សុខភាព និងភេសជ្ជៈអាហារពេលព្រឹកតាមអ៊ីនធឺណិតផងដែរ។
លោក Kenny Ho បានលើកឡើងពីហេតុផលដែលធ្វើឱ្យលោកសម្រេចចិត្តវិនិយោគលើរោងចក្រផលិតអាហារសុខភាព ព្រោះលោកចង់ឱ្យមនុស្សក្នុងតំបន់អាចទទួលបានអាហារដែលល្អសម្រាប់សុខភាពដែលការពារពួកគេពីការទទួលទានអាហារមិនល្អ ឬរបស់បំពងខ្លាញ់ជាដើម។ លើសពីនេះ លោកក៏ចង់ផ្សព្វផ្សាយឱ្យមនុស្សជាច្រើនបានយល់ដឹងពីសារៈសំខាន់នៃការញ៉ាំអនាម័យ និងអាហារគ្មានជាតិពុល វាអាចជួយរក្សាសុខភាព និងរស់រានបានយូរ។
មិនត្រឹមតែចូលរួមវិនិយោគបង្កើតក្រុមហ៊ុនក្នុងទីក្រុង Huizhou លោកក៏បានក្លាយជាសមាជិកនៃគណៈកម្មាធិការប្រឹក្សានយោបាយក្នុងទីក្រុងនេះផងដែរ។ ឱកាសនេះក៏បានធ្វើឱ្យលោកអាចបំលែងអគាររោងចក្រដែលមានកម្ពស់ ៨ ម៉ឺនហ្វីតរបស់ខ្លួនទៅជាតំបន់ទេសចរណ៍ Huizhou ដែលអាចឱ្យភ្ញៀវទេសចរណ៍ចូលទស្សនាការផលិត និងដំណើរការធ្វើអាហារក្នុងរោងចក្រអាហារសុខភាព។ បន្ទាប់ពីសញ្ជឹងគិតអស់ជាយូរទីបំផុតលោកក៏សម្រេចចិត្តលាឈប់ពីសិល្បៈជាផ្លូវការក្នុងឆ្នាំ ២០១៤ និងផ្ដោតលើការធ្វើជំនួញតែម្ដង។
តែយ៉ាងណាមិញ ការចាកចេញពីសិល្បៈរបស់លោកត្រូវបានគេជឿជាក់ថាមិនមែនមកពីតែរឿងរកប្រាក់មិនបានមួយមុខនោះទេ។ បើតាមប្រភពព័ត៌មានចិន ១៦៣ បានឱ្យដឹងថា មានពាក្យចចាមអារ៉ាមតារាប្រុសវ័យ ៦៣ ឆ្នាំរូបនេះធ្លាប់និយាយពាក្យសម្ដីមិនសមរម្យដាក់អ្នកដឹកនាំសម្ដែងល្បីៗ និងមានបញ្ហាជាមួយក្រុមការងារជាច្រើនទើបធ្វើឱ្យលោកឈរជើងមិនបានតទៅទៀតក្នុងពិភពសិល្បៈទើបត្រូវបង្ខំចិត្តចាកចេញពីវិថីសិល្បៈមកធ្វើជំនួញវិញ។
បច្ចុប្បន្ន លោក Kenny Ho មានទ្រព្យសម្បត្ដិសរុបប្រមាណច្រើនជាង ១៧ លានដុល្លារអាមេរិក ហើយប្រាក់ទាំងនោះមិនមែនបានមកពីការសម្ដែងឡើយគឺភាគច្រើនបានមកការវិនិយោគ និងមុខជំនួញរបស់លោកតែម្ដង។ លោកក៏ជាប់ឈ្មោះជាអ្នកវិយោគល្បីម្នាក់ផងដែរនៅខេត្ត GuangDong ប្រទេសចិន បើតាមប្រភពព័ត៌មាន Sina រៀងរាល់ឆ្នាំលោកអាចរកបានប្រាក់យ៉ាងច្រើនរហូតខ្ទង់លានដុល្លារឯណោះ៕
Account
Security
Favourite Content