យុវតី សិរីលាភា ង៉ែត កូនខ្មែរកើតលើទឹកដីប្រទេសកាណាដា បានសាងភាពភ្ញាក់ផ្អើលយ៉ាងខ្លាំងក្នុងការប្រកួត Miss Teen Quebec 2025 នៅទឹកដីប្រទេសកាណាដា ដោយយុវតីរូបស្រស់នេះ បានប្រើប្រាស់សមត្ថភាព ទេពកោសល្យ និងភាពឆ្លាតវ័យដ៏ពូកែរបស់នាងចូលរួមប្រកួតប្រជែងកម្មវិធីសម្រស់ប្រចាំខេត្ត កេប៊ិច (Quebec) រហូតឈ្នះតំណែងជយលាភីលំដាប់រងទី១ ក្នុងការប្រកួតថ្នាក់ខេត្តនេះ។


តាមដែលបានដឹង កន្លងមក យុវតី សិរីលាភា ង៉ែត ជាកូនខ្មែរតែម្នាក់គត់ ដែលឈ្នះជយលាភីលំដាប់រងទី១ ក្នុងការប្រកួតថ្នាក់ខេត្តនេះ ខណៈបេក្ខភាពដាក់ពាក្យប្រកួតមានចំនួនជាង ៣០០ នាក់ ចម្រុះជាតិសាសន៍មកពីទីតំបន់ផ្សេងៗគ្នា។
ក្រោយឈ្នះជយលាភីនេះ កូនខ្មែរសញ្ជាតិកាណាដា សិរីលាភា រំភើបចិត្តជាខ្លាំង ព្រោះភាពជោគជ័យនេះមិនត្រឹមសាងមោទនភាពសម្រាប់នាងប៉ុណ្ណោះទេ តែជាមោទនភាពដ៏ធំធេងដល់ប្រទេសកម្ពុជាដែលកូនខ្មែររូបនេះមានសមត្ថភាពខ្ពស់អាចប្រកួតប្រជែងជាមួយជាតិសាសាន៍ដទៃ រហូតឈ្នះតំណែងជយលាភីបែបនេះ។

ពេលនេះ សិរីលាភា ង៉ែត កំពុងសម្លឹងមើលឱកាសថ្មីៗ សម្រាប់នាងក្នុងការអភិវឌ្ឍន៍សមត្ថភាពសិល្បៈរបស់ខ្លួនឯង និងកំពុងសម្លឹងមើលឆាកអន្តរជាតិណាមួយដែលស័ក្ដិសមសម្រាប់សមត្ថភាពរបស់នាងផងដែរ។ បន្ទាប់ពីឈ្នះតំណែងលំដាប់រងទី១ យុវតីវ័យ ១៦ឆ្នាំនេះ ក៏បានឆ្លៀតពេលជួយបង្ហាត់បង្រៀន និងចែករំលែកពីតិចនិកការប្រកួតប្រជែងដល់សិស្សប្អូនជនជាតិកាណាដាដែលមានបំណងចង់ចូលរួមប្រកួតឆ្នាំក្រោយថែមទៀតផង។
បន្ថែមពីលើនោះ កូនខ្មែរកើតនិងធំធាត់លើទឹកដីកាណាដារូបនេះ ក៏ចំណាយពេលស្វ័យសិក្សាអំពីការប្រកួតសម្រស់ ការត្រៀមខ្លួន ចំណេះដឹង Q&A ការងារសង្គម និងការហ្វឹកហាត់ផ្សេងៗទៀត ត្រៀមសម្រាប់ឱកាសល្អមកដល់ក្នុងការតំណាងកម្ពុជាលើឆាកអន្តរជាតិណាមួយនាពេលខាងមុខនេះ៕
































































Account
Security
Favourite Content