កាលពីប៉ុន្មានថ្ងៃមុន ព្រះនាង នរោត្តម ជេនណា បានតំណាងឲ្យកម្ពុជា ចូលរួមសម្ដែងក្នុងកម្មវិធី Beijing culture forum របស់ស្ថានីយទូរទស្សន៍ BRTV ប្រជាមានិតចិន។ ក្រោយថតកម្មវិធីចប់ សម្ដេចក្រុមព្រះ នរោត្តម ចក្រពង្ស ដែលជាព្រះអយ្យកោ ក៏បានទៅលើកទឹកចិត្តដល់ក្រោយឆាក។
មិនតែប៉ុណ្ណោះសម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតប្រោសព្រះរាជទាន ព្រះនាងតូច ជេនណា និងសម្ដេចក្រុមព្រះ នរោត្តម ចក្រពង្ស ចូលក្រាបបង្គំគាល់ នាព្រះរាជដំណាក់ នៅរដ្ឋធានីប៉េកាំង សាធារណរដ្ឋប្រជាមានិតចិន ព្រមជាមួយសាច់សាលោហិតដទៃទៀត។
ក្រោយទទួលបានការសព្វព្រះរាជហឫទ័យពីសម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ឲ្យចូលក្រាបបង្គំគាល់ហើយនោះ ព្រះនាងតូចដ៏ផូរផង់រូបនេះ បានបង្ហោះរូបភាព ព្រោះទាំងថ្លៃដោយក្ដីអំណរថា “ជាមហាកិត្តិយសដ៏វិសេសវិសាលរកអ្វីប្រៀបផ្ទឹមពុំបាន ដោយកាលពីថ្ងៃទី ២០ ខែកញ្ញា ឆ្នាំ ២០២៤ ខ្ញុំម្ចាស់ និងព្រះមាតានៃខ្ញុំ ព្រះអង្គម្ចាស់ក្សត្រី នរោត្តម បុប្ផារី បានចូលក្រាបបង្គំគាល់ សម្ដេចហ្លួងយាយទួត សម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត នាព្រះរាជដំណាក់ នៅរដ្ឋធានីប៉េកាំង សាធារណរដ្ឋប្រជាមានិតចិន។ខ្ញុំម្ចាស់ សូមអរព្រះរាជគុណសម្ដេចហ្លួងយាយទួត ជាទីគោរពសក្ការៈដ៏ខ្ពង់ខ្ពស់បំផុត សូមស្តេចមានព្រះរាជសុខភាពល្អបរិបូរណ៍ ព្រះកាយពលរឹងមាំ ព្រះរាជស្មារតីភ្លឺថ្លា ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជំនៃកូនចៅប្រជានុរាស្ត្រទាំងអស់។”
តាមរយៈរូបភាពជាច្រើនសន្លឹកបានឲ្យឃើញថាព្រះនាង នរោត្តម ជេនណា ត្រូវបានសម្ដេចម៉ែសព្វព្រះរាជហឫទ័យជាខ្លាំង ដោយស្នាមញញឹមដែលសម្ដេចព្រះមហាក្សត្រី ព្រះវររាជមាតាជាតិខ្មែរផ្ដល់ទៅកាន់ទ្រង់។ មិនតែប៉ុណ្ណោះ សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ បានប្រថាប់នៅក្បែរព្រះនាងតូចតែម្ដង។ ដោយការក្រាបបង្គំគាល់លើកនេះមានទាំងព្រះមាតា និងព្រះអយ្យកោ របស់ព្រះនាង ជេនណា ក៏បានចូលរួមជាមួយគ្នា។
គួររឭកផងដែរថា ព្រះនាង ជេនណា ជាព្រះរាជវង្សានុវង្សកម្ពុជាដែលទទួលបានការស្រលាញ់ចូលចិត្តពីខ្សែលោហិត និងប្រជានុរាស្ត្រច្រើនខ្លាំង។ ទ្រង់តែងមានសកម្មភាពលើកតម្កើងជាតិកម្ពុជាលើឆាកអន្តរជាតិ និងផ្សព្វផ្សាយពីមាតុភូមិដ៏ស្រស់ផូរផង់ឲ្យជាតិសាសន៍ដទៃបានស្គាល់ និងកោតស្ញប់ស្ញែង ប្រកបដោយភាពថ្លៃថ្នូរ។
អ្នកអង្គម្ចាស់ក្សត្រិយ៍ នរោត្ដម ជេនណា យាងទៅប្រទេសចិន ដើម្បីចូលរួមផ្សព្វផ្សាយវប្បធម៌ខ្មែរលើឆាកអន្តរជាតិ តាមរយៈកម្មវិធី Beijing culture forum របស់ស្ថានីយទូរទស្សន៍ BRTV រួមជាមួយសិល្បករបរទេសដទៃទៀត។ ដោយសម្ដេចក្រុមព្រះ នរោត្តម ចក្រពង្ស រួមជាមួយបុត្រី បានយាងទត ព្រះនត្តា របស់ព្រះអង្គ ប្រកបដោយព្រះហឫទ័យមោទនភាព។
គួរបញ្ជាក់ថាកាលព្រឹកថ្ងៃ ២៦ ខែសីហា ឆ្នាំ ២០២៤ កន្លងទៅ ព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គទាំងទ្វេ បានយាងទៅពិនិត្យព្រះរាជសុខភាព នៅសាធារណរដ្ឋប្រជាមានិតចិន ហើយនៅរសៀលថ្ងៃទី ២៣ ខែកញ្ញានេះ ព្រះករុណាព្រះបាទសម្ដេចព្រះបរមនាថ ព្រះមហាក្សត្រ នៃព្រះរាជាណាចក្រកម្ពុជា និងសម្ដេចព្រះមហាក្សត្រី ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គនឹងស្ដេចយាងនិវត្តន៍ពីសាធារណរដ្ឋប្រជាមានិតចិន បន្ទាប់ពីគង់សម្រាកព្យាបាលព្រះរាជសុខភាពអស់មួយរយៈពេលខ្លី៕