សមាជិកទាំង ៥ របស់ NewJeans ទទួលតំណែងជាទូតសុឆន្ទៈចុងក្រោយបង្អស់របស់ប្រេនអាមេរិក Calvin Klein សម្រាប់ម៉ូដសម្លៀកបំពាក់ Calvin Klein Fall 2024។

កាលពីថ្ងៃ​២៤ ខែកញ្ញា ឆ្នាំ ២០២៤ នេះ ​យីហោសម្លៀកបំពាក់ដ៏ល្បីរបស់អាមេរិកបានប្រកាសនៅលើគណនី X ផ្លូវការរបស់ខ្លួនពីការតែងតាំង NewJeans ជាទូតសុឆន្ទៈសកលចុងក្រោយបំផុតរបស់ Calvin Klein និង​ជា​អ្នកផ្សព្វផ្សាយ​ម៉ូដ Fall 2024 series។ សមាជិកទាំង ៥រូប រួមមាន Minji, Hanni, Danielle, Haerin និង Hyein បានបង្ហាញខ្លួនជាមួយនឹងម៉ូដខោអាវចុងក្រោយបង្អស់ ក៏ដូចជាខោខាប៊យជើងត្រង់ជំនាន់​ ៩០ និងអាវក្រៅ Denim Trucker ដែលជាម៉ូដលក់ដាច់បំផុតរបស់​ CK ផងដែរ។

នេះជាភាពជោគជ័យថ្មីមួយទៀត សម្រាប់ក្រុមចម្រៀងវ័យក្មេង​ពោរពេញទៅដោយសមត្ថភាព ទេពកោសល្យ និងមានឥទ្ធិពលមួយក្រុនេះ មិនថាក្នុងវិស័យចម្រៀង និងវិស័យ Fashion។

សូមរំឭកផងដែរថា ចាប់តាំងពីប្រឡូកក្នុងវិស័យសិល្បៈក្នុងឆ្នាំ ២០២២ NewJeans បានជាប់ចំណាត់ថ្នាក់នៅលើ Billboard Global 200 រហូតដល់ទៅ ៣៧ សប្ដាហ៍ជាប់ៗគ្នា ដែលក្លាយជាក្រុមចម្រៀង K-pop ស្រីដំបូងគេដែលជាប់ចំណាត់ថ្នាក់យូរបែបនេះ។ បន្ថែមពីនេះទៀត ក្រុមចម្រៀងថ្មី​ពេញដោយប្រជាប្រិយភាពមួយនេះ ក៏ធ្លាប់ធ្វើការជាមួយនឹងក្រុមហ៊ុនធំៗលំដាប់ពិភពលោកជាច្រើនរួចមកហើយ ដូចជាក្រុមហ៊ុន Coca-Cola, Apple និង Levi’s ជាដើម។

ដោយឡែក សម្រាប់បញ្ហាផ្ទៃក្នុងរវាង NewJeans និង HYBE វិញ នៅមិនទាន់មានការឆ្លើយតប និងដំណោះស្រាយជាផ្លូវការណាមួយដែលបានប្រកាសជាសាធារណៈនៅឡើយទេ។ ដោយបច្ចុប្បន្ន អ្នកគាំទ្រ និងអ្នកនិយមស្ដាប់ចម្រៀង K-pop កំពុងតែរង់ចាំចម្លើយ និងព័ត៌មានបន្ថែមពីហេតុការណ៍នេះ៕