ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
យោងតាមឯកសារផ្ទៃក្នុងដែលគណៈកម្មាធិការវប្បធម៌ កីឡា និងទេសចរណ៍នៃសភាក្រុងសេអ៊ូលទទួលបាន បង្ហាញថាក្រុមចម្រៀងនារី NewJeans បានទទួលប្រាក់ឈ្នួលចំនួន ២៤០ លានវ៉ុន ស្មើនឹងប្រមាណ ១៧ ម៉ឺនដុល្លារអាមេរិក សម្រាប់តំណែងទូតផ្សព្វផ្សាយកិត្តិយសរបស់ទីក្រុងសេអ៊ូល។ នេះគឺជាចំនួនទឹកប្រាក់ខ្ពស់បំផុតក្នុងប្រវត្តិសាស្ត្រសម្រាប់តំណែងទូតផ្សព្វផ្សាយនេះ និងច្រើនជាងពាក់កណ្តាលនៃប្រាក់ឈ្នួលសរុបរបស់ទូតផ្សព្វផ្សាយមុនៗចំនួន ៥៥ នាក់ក្នុងរយៈពេល ៥ ឆ្នាំចុងក្រោយ ដែលមានចំនួនប្រមាណ ៣២ ម៉ឺនដុល្លារអាមេរិក។
តាមធម្មតា ទូតផ្សព្វផ្សាយកិត្តិយសសម្រាប់ខេត្តក្រុងផ្សេងៗក្នុងប្រទេសកូរ៉េខាងត្បូងមិនទទួលបានប្រាក់ឈ្នួលសម្រាប់សកម្មភាពផ្សព្វផ្សាយរបស់ពួកគេនោះទេ លើកលែងតែទីក្រុងសេអ៊ូលប៉ុណ្ណោះដែលមានការបង់ថ្លៃឈ្នួលសម្រាប់ទូតផ្សព្វផ្សាយរបស់ខ្លួន។ បើទោះបីបទបញ្ជាលេខ ៦ នៃបទប្បញ្ញត្តិស្តីពីប្រតិបត្តិការសម្រាប់ទូតផ្សព្វផ្សាយរបស់ទីក្រុងសេអ៊ូល បង្ហាញថាតួនាទីរបស់ទូតផ្សព្វផ្សាយគឺជាការតែងតាំងដោយស្ម័គ្រចិត្ត និងឥតគិតថ្លៃឈ្នួល ប៉ុន្តែរដ្ឋាភិបាលក៏អនុញ្ញាតឱ្យមានការផ្ដល់ប្រាក់ឈ្នួលខ្លះសម្រាប់ “ការចំណាយចាំបាច់”។ យ៉ាងណាក៏ដោយ ចំនួនប្រាក់ឈ្នួលសរុបដែល NewJeans ទទួលបានពេលនេះកំពុងប្រឈមនឹងការរិះគន់ខ្លាំងពីមហាជនថាជាការ “ចំណាយមិនចាំបាច់យ៉ាងលើសលប់” របស់រដ្ឋបាលសេអ៊ូល។
គួរបញ្ជាក់ថាបច្ចុប្បន្ននេះ មានបុគ្គលល្បីចំនួន ៣៤ នាក់មកពីវិស័យផ្សេងៗកំពុងមានតំណែងជាទូតផ្សព្វផ្សាយកិត្តិយសសម្រាប់ទីក្រុងសេអ៊ូល ដែលក្នុងនោះមាន ២៩ នាក់ គឺជាអ្នកស្ម័គ្រចិត្ត និងមិនទទួលបានប្រាក់ឈ្នួល ស្របពេលទូតផ្សព្វផ្សាយផ្សេងទៀតដែលភាគច្រើនមកពីវិស័យសិល្បៈជាធម្មតាអាចទទួលបានប្រាក់ឈ្នួលជាមធ្យម ២៥ លានវ៉ុន ឬ ១៨០០០ ដុល្លារអាមេរិក ៕
Account
Security
Favourite Content