គូស្នេហ៍តារាល្បីចិន គឺតារាសម្តែង Shawn Dou (Dou Xiao) និងភរិយាជាកូនស្រីមហាសេដ្ឋី Laurinda Ho Chiu-lin បានឆ្លើយតបទៅនឹងព័ត៌មានពាក្យចចាមអារ៉ាមលែងលះគ្នាថ្មីៗនេះ ដែលត្រូវបានចែករំលែកយ៉ាងសុសសាយនៅលើបណ្តាញសង្គម បន្ទាប់ពីភរិយាមហាសេដ្ឋីហុងកុង Charles Heung គឺ Tiffany Chen បានបង្ហោះទម្លាយពីបញ្ហាជីវិតគូរបស់អ្នកទាំងពីរ។

នៅល្ងាចថ្ងៃទី ២៣ ខែតុលា តារាប្រុស Dou បានចូលទៅក្នុង Weibo ដោយសុំទោសចំពោះការបង្កភាពភ្ញាក់ផ្អើលលើអ៊ីនធឺណិត និងជំរុញឱ្យសាធារណជនកុំជឿ ឬផ្សព្វផ្សាយពាក្យចចាមអារ៉ាមនោះបន្ត។
លោកបានសរសេរថា៖ “សួស្តីអ្នកទាំងអស់គ្នា! ដំបូងឡើយ ខ្ញុំសូមអភ័យទោសចំពោះសំឡេងរំខានតាមអ៊ីនធឺណិតក្នុងរយៈពេលពីរថ្ងៃកន្លងមកនេះ ដែលទាក់ទាញចំណាប់អារម្មណ៍របស់សាធារណជន។ ដំបូងឡើយ យើងមិនចង់ឆ្លើយតបទៅនឹងប្រធានបទដែលគ្មានមូលដ្ឋានទាំងនេះទេ ប៉ុន្តែស្ថានភាពកាន់តែរាលដាលឡើង។ សូមកុំជឿ ឬផ្សព្វផ្សាយពាក្យចចាមអារ៉ាមទាំងនោះ។ សូមអរគុណ”។
ក្រោយមកខាងភរិយា Laurinda Ho ក៏បានចែករំលែកការបង្ហោះរបស់ស្វាមីដោយសរសេរបន្ថែមថា ខណៈដែលនាងពេញចិត្តចំពោះការព្រួយបារម្ភរបស់សាធារណជន ប៉ុន្តែស្ថិរភាពនៃទំនាក់ទំនងរបស់ពួកគេមិនចាំបាច់បង្ហាញជាសាធារណៈនោះទេ។ នាងបានបញ្ជាក់ថា អាពាហ៍ពិពាហ៍របស់ពួកគេមានភាពនឹងន ហើយបានអំពាវនាវឱ្យបញ្ចប់ការចែកចាយព័ត៌មានមិនពិត។


អាពាហ៍ពិពាហ៍ក្រោមខ្សែភ្នែកមហាជន
Laurinda Ho ត្រូវបានគេសរសើរថាជា “អ្នកស្នងមរតកដ៏ស្រស់ស្អាតបំផុត” របស់មហាសេដ្ឋីកាស៊ីណូម៉ាកាវ Stanley Ho Hung-sun និងបានស្ថិតនៅក្នុងក្រសែភ្នែកសាធារណៈជាយូរមកហើយ ហើយការចាប់អារម្មណ៍ពីប្រព័ន្ធផ្សព្វផ្សាយកាន់តែខ្លាំងឡើងបន្ទាប់ពីរៀបការជាមួយ Shawn Dou។
គូស្នេហ៍ដែលបានរៀបការនៅបាលីក្នុងឆ្នាំ ២០២៣ ជាមួយនឹងពិធីមង្គលការដ៏ប្រណីតបន្ទាប់ពីសេពគប់គ្នាអស់រយៈពេលបួនឆ្នាំ បានប្រឈមមុខនឹងព័ត៌មានរង្គោះរង្គើជាបន្តបន្ទាប់តាមអ៊ីនធឺណិត រួមទាំងសេចក្ដីរាយការណ៍ថា Dou បានបដិសេធមិនចុះហត្ថលេខាលើកិច្ចព្រមព្រៀងមុនរៀបការ និងព័ត៌មានថាគូស្នេហ៍នេះបានរស់នៅដាច់ដោយឡែកពីគ្នាដោយសារតែកាតព្វកិច្ចការងារ។

ពាក្យចចាមអារ៉ាមតាមអ៊ីនធឺណិតបានបង្ហាញថា Shawn Douបានចំណាយប្រាក់ ៥០ ទៅ ៨០ លានដុល្លារហុងកុង (ប្រហែល ៦ ទៅ ១០ លានដុល្លារអាមេរិក) សម្រាប់ពិធីមង្គលការនេះ ប៉ុន្តែអ្នកលេងអ៊ីនធឺណិតបានបង្ហាញថាម្តាយខាងស្រីបានចំណាយប្រាក់ ៥០ លានដុល្លារហុងកុង ដោយ Dou បានចូលរួមតែ ៥ លានដុល្លារហុងកុងប៉ុណ្ណោះ ព្រោះលោកមិនមានសិទ្ធិលើទ្រព្យសម្បត្តិគ្រួសារទេ។
ចាប់តាំងពីពិធីមង្គលការរបស់ពួកគេមក Laurinda Ho បានបង្ហាញថាប្ដីប្រពន្ធពួកគេបានរស់នៅបែកគ្នាមួយរយៈធំហើយ ដោយបានរក្សាទំនាក់ទំនងជាចម្បងតាមរយៈការខលវីដេអូ និងទូរស័ព្ទនិយាយគ្នា ដែលបានជំរុញឱ្យមានការសង្ស័យបន្ថែមទៀតពីប្រព័ន្ធផ្សព្វផ្សាយ ៕






























Account
Security
Favourite Content