តារាសម្ដែង Kim Woo Bin បានទទួលការចាប់អារម្មណ៍ខ្លាំងតាមរយៈការវិនិយោគអចលនទ្រព្យកាលពីពេលថ្មីៗ ដោយលោកទិញអតីតទីស្នាក់ការក្រុមហ៊ុនរបស់ក្រុម BTS គឺ Big Hit Entertainment (បច្ចុប្បន្នប្ដូរជា HYBE) ក្នុងតម្លៃ ១៣,៧ ពាន់លានវ៉ុន ស្មើនឹងប្រហែល ១០,៧ លានដុល្លារ។
យោងតាមសេចក្ដីរាយការណ៍ពី Star News ដែលបានបញ្ជាក់ជាមួយផលិតកម្ម AM Entertainment កាលពីថ្ងៃទី២៥ ខែមិថុនា បង្ហាញថា Kim Woo Bin បានបញ្ចប់ការទិញអគារដែលមានទីតាំងនៅតំបន់ Nonhyeon-dong សង្កាត់ Gangnam-gu ទីក្រុងសេអ៊ូល នៅថ្ងៃទី ២៩ ខែមីនា ហើយបានបញ្ចប់ការទូទាត់ប្រាក់នៅថ្ងៃទី ១១ ខែមេសា។ អគារដែលរួមមានជាន់ក្រោមដីពីរជាន់ និងជាន់លើដីចំនួនប្រាំជាន់មួយនេះ ត្រូវបានលក់ក្នុងតម្លៃ ១៣,៧ ពាន់លានវ៉ុន។ ក្នុងនោះ Kim Woo Bin បានបង់ប្រាក់សុទ្ធប្រហែល ៨,៣ ពាន់លានវ៉ុន ជាមួយនឹងប្រាក់កម្ចីប្រហែល ៦,២ ពាន់លានវ៉ុន និងពន្ធលើការទិញ ៤,៦ % ។
គួររំឭកថា ផលិតកម្ម Big Hit បានប្រើប្រាស់អគារនេះជាការិយាល័យរបស់ខ្លួនចាប់ពីឆ្នាំ ២០០៧ រហូតដល់បានពង្រីកខ្លួន និងប្ដូរទៅកាន់អគារថ្មីនៅក្បែរនោះដែរក្នុងឆ្នាំ ២០១១ ហើយក្រោយមកក៏បានប្ដូរទៅការិយាល័យកណ្តាលបច្ចុប្បន្នរបស់ខ្លួននៅសង្កាត់ Yongsan ក្នុងឆ្នាំ ២០២០ និងបានប្ដូរឈ្មោះក្រុមហ៊ុនជា HYBE ពីពេលនោះ។
លោក Kim Jae Young ប្រធានផ្នែកអចលនទ្រព្យរបស់ក្រុមហ៊ុន Building Road បាននិយាយថា “អគារដែល Kim Woo Bin បានទិញគឺស្ថិតនៅក្នុងតំបន់សំខាន់មួយ ដែលជារឿយៗគឺជាគោលដៅរបស់តារាល្បីៗ និងក្រុមហ៊ុនកម្សាន្តនានា។ គិតពីតម្លៃ ១៣,៧ ពាន់លានវ៉ុន គឺអាចនិយាយបានថានេះការវិនិយោគល្អ”។
ក្រៅពីអគារនេះ Kim Woo Bin ក៏មានផ្ទះមួយនៅតំបន់ Seongbuk-dong សង្កាត់ Seongbuk-gu ទីក្រុងសេអ៊ូលផងដែរ ដែលលោកបានទិញក្នុងខែមិថុនា ឆ្នាំ ២០០៨ ក្នុងតម្លៃ ១,៥២ ពាន់លានវ៉ុន ស្មើនឹងប្រហែល ១,១ លានដុល្លារអាមេរិក និងជាផ្ទះដែលលោករស់នៅបច្ចុប្បន្ន ៕