ចាប់តាំងពីមានរឿងអាស្រូវបើកបរទាំងស្រវឹង និងបង្កគ្រោះថ្នាក់ចរាចរណ៍ អាជីពសិល្បៈរបស់តារាសម្ដែងស្រីវ័យក្មេង Kim SaeRon ស្ទើររលាយអស់ ទទួលទាំងពាក្យរិះគន់ ត្រូវដកខ្លួនចេញពីរឿង និងអ្នកតំណាងប្រេនផ្សេងៗ។ ជាបន្ដបន្ទាប់ ស្ថានភាពរបស់តារាស្រីរូបនេះហាក់មិនប្រសើរឡើង ដោយសារតែជាប់រឿងអាស្រូវនិយាយកុហក និងត្រូវគេចាប់បានលេងល្បែងជាដើម។ មិនទាន់ចប់នៅឡើយ នៅដើមឆ្នាំ ២០២៤ នេះ នាងកាន់តែទទួលពាក្យរិះគន់ខ្លាំង ក្រោយបង្ហោះរូបស្និទ្ធស្នាលជាមួយតារាប្រុសល្បី Kim SooHyun។



មែនទែនទៅ ក្រោយជួបរឿងអាស្រូវបើកបរទាំងស្រវឹង តារាស្រីរូបនេះព្យាយាមជ្រៀតខ្លួនចូលមកកាន់សិល្បៈវិញតាមរយៈការបង្ហោះរូប និងបង្ហាញមុខក្នុងវីដេអូចម្រៀងជាដើម។ បើតាមប្រភពព័ត៌មានកូរ៉េ Koreajoongangdaily បានឲ្យដឹងថា រឿងថ្មីដែលនាងកំពុងត្រៀមសម្ដែងគឺ “DongChimi”។ វាក៏ជារឿងមួយដែលនាងត្រៀមសម្ដែងដើម្បីវិលត្រឡប់ចូលសិល្បៈផងដែរ។
នៅថ្ងៃទី ១៨ ខែ មេសា ឆ្នាំ ២០២៤ ប្រភពព័ត៌មាន Xsports News បានឲ្យដឹងថា រូបនាងបានសុំដកខ្លួនមិនសម្ដែងរឿងនេះវិញ។ ចំពោះមូលហេតុគឺនាងចង់ផ្ដោតលើការថែរក្សាសុខភាពផ្លូវចិត្ដ។ Kim SaeRon ត្រូវបានរាយការណ៍ថា កំពុងមានបញ្ហាផ្លូវចិត្ដធ្ងន់ធ្ងរ និងត្រូវការការមើលថែ ក្រោយពីរូបនាងទទួលបានការរិះគន់យ៉ាងចាស់ដៃពីមហាជនទាំងក្នុងស្រុក និងក្រៅស្រុក បន្ទាប់ពីបង្ហោះរូបសិ្នទ្ធស្នាលជាមួយតារាប្រុស Kim SooHyun។



បើតាមប្រភពដដែលបានឲ្យដឹងថា Kim SaeRon បានខិតខំប្រឹងប្រែងយ៉ាងខ្លាំង ព្យាយាមដាក់ពាក្យចូលសម្ដែងរឿងជាច្រើនដើម្បីត្រឡប់វិលចូលសិល្បៈ ដោយរូបនាងសង្ឃឹមនឹងអាចបង្ហាញពីទេពកោសល្យរបស់ខ្លួនបន្ថែមទៅកាន់មហាជន។ យ៉ាងណាមិញ គួរឲ្យសោកស្ដាយ ដោយសាររឿងអាស្រូវរូបនាងត្រូវសម្រាកដើម្បីព្យាបាល និងមើលថែទាំសុខភាពរបស់ខ្លួន៕


























Account
Security
Favourite Content