ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ថ្មីៗនេះសមាគមសិល្បករខ្មែរបានរៀបចំពិធីទទួលនូវថវិកាឧបត្ថម្ភ ៧៧៧,៧៧៧ ដុល្លារ ពីក្រុមហ៊ុន ជីប ម៉ុង។ កាលពីរសៀលថ្ងៃទី២៨ ខែសីហា ឆ្នាំ ២០២៤ កន្លងទៅ សមាគមសិល្បករខ្មែរ មានលោកជំទាវអ្នកឧកញ៉ា ម៉ៅ ចំណាន គិត ម៉េង ជាប្រធានសមាគម បានទទួលថវិកាឧបត្ថម្ភ ៧៧៧ ៧៧៧ ដុល្លារ ពីក្រុមហ៊ុន ជីប ម៉ុង របស់អ្នកឧកញ៉ា លាង ឃុន សម្រាប់រយៈពេល ១០ ឆ្នាំ និងបានចុះអនុស្សរណៈយោគយល់គ្នា ដើម្បីពង្រឹងកិច្ចសហប្រតិបត្តិការក្នុងវិស័យសិល្បៈឲ្យកាន់តែស៊ីជម្រៅបន្ថែមទៀត។
ក្នុងពិធីចុះហត្ថលេខាលើអនុស្សរណៈយោគយល់គ្នានេះ មានការអញ្ជើញចូលរួមពីសំណាក់លោកជំទាវអ្នកឧកញ៉ា ម៉ៅ ចំណាន គិត ម៉េង ប្រធានសមាគមសិល្បករខ្មែរផ្ទាល់ ព្រមទាំងក្រុមគ្រួសារសេដ្ឋី និងជាអ្នកកាន់តួនាទីសំខាន់ៗនៅក្រុមហ៊ុន ជីប ម៉ុង ដូចជាលោកអ្នកឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន ជីប ម៉ុង, អ្នកឧកញ៉ា លាង ម៉េង សហស្ថាបនិក និងជាប្រធានក្រុមអគ្គនាយកក្រុមហ៊ុន ជីប ម៉ុង គ្រុប និងលោកជំទាវ គឹម ចាន់ណា ព្រមទាំងសិល្បករសិល្បការិនីជាច្រើននាក់។
ដូច្នេះតាមរយៈការចុះអនុស្សរណៈយោគយល់គ្នារវាងសមាគមសិល្បករខ្មែរ និងក្រុមហ៊ុន ជីប ម៉ុង ពេលនោះ គឺជាតឹកតាង បញ្ជាក់កាន់តែច្បាស់ពីការយកចិត្តទុកដាក់ខ្ពស់ ប្រកបដោយ ទស្សនៈវិស័យវែងឆ្ងាយរបស់លោកអ្នកឧកញ៉ា សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន ជីប ម៉ុង គ្រុប ចំពោះការចូលរួមលើកតម្កើងតម្លៃនៃវិស័យសិល្បៈវប្បធម៌ជាតិ និងយល់ច្បាស់ពីសុខទុក្ខរបស់សិល្បករសិល្បការិនីទាំងអស់ ជាពិសេសចំពោះសិល្បកររៀមច្បងដែលមានវ័យកាន់តែចាស់។
បន្ថែមពីលើនោះដែរលោកជំទាវអ្នកឧកញ៉ា ម៉ៅ ចំណាន បានថ្លែងក្នុងកម្មវិធីថា ផ្ដើមចេញពីការចាប់ដៃគ្នានាពេលនេះ សមាគមសិល្បករខ្មែរ ពិតជាមានក្ដីសង្ឃឹមយ៉ាងមុតមាំថា លោកអ្នកឧកញ៉ា លាង ឃុន, អ្នកឧកញ៉ា លាង ម៉េង និងលោកជំទាវ ដែលជាសហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន ជីប ម៉ុង គ្រុប នឹងនៅតែបន្តផ្ដល់ភាពកក់ក្ដៅជាមួយសមាគមជាច្រើនឆ្នាំបន្តទៅមុខទៀត និងសង្ឃឹមផងដែរថា សមាគមសិល្បករខ្មែរ និងក្រុមហ៊ុន ជីប ម៉ុង គ្រុប ពិសេស ក្រុមហ៊ុន ខ្មែរ ប៊ែវើរីជីស នឹងកាន់តែបង្កើនភាពស្និទ្ធស្នាលខ្លាំងឡើងបន្ថែមទៀត ដើម្បីឈានទៅដល់ការផលិតមាតិកា ឬកម្មវិធីល្អៗជាច្រើនរួមគ្នានាពេលដ៏ខ្លីខាងមុខ។
សមាគមសិល្បករខ្មែរ អាណត្តិទី៦នេះ ទើបតែធ្វើដំណើរក្នុងរយៈពេលខ្លីក៏ពិតមែន ប៉ុន្តែប្រធាន និងសមាជិកសមាគមបានរួមដៃគ្នា ធ្វើការងារជាប្រយោជន៍ច្រើនជូនដល់សិល្បករសិល្បការិនី និងសង្គមជាតិមាតុភូមិ។
សមាគមសិល្បករខ្មែរ ជាសមាគមវិជ្ជាជីវៈ បង្កើតឡើងក្នុងគោលបំណងការពារសិទ្ធិ និងផលប្រយោជន៍របស់សិល្បករ។ ព្រមទាំងដើម្បីកៀរគរប្រមូលផ្តុំបណ្តាសិល្បករសិល្បការិនី គ្រប់ទម្រង់ គ្រប់ជំនាញ និងគ្រប់ជំនាន់ ដែលជាសេនាធិកាដ៏សំខាន់របស់ ក្រសួងវប្បធម៌ និងវិចិត្រសិល្បៈ និងរាជរដ្ឋាភិបាលកម្ពុជា ក្នុងកិច្ចការថែរក្សា ការពារ អភិវឌ្ឍ និងលើកស្ទួយវិស័យសិល្បៈ វប្បធម៌ជាតិ។ ស្វែងរកសប្បុរសជន ជួយដល់សកម្មភាពសិល្បៈ និងកិច្ចការសង្គម។ ក្នុងនោះដែរសមាគមសិល្បករខ្មែរក៏បានប្រមូលផ្តុំធនធានសិល្បៈគ្រប់ទម្រង់ រួមគ្នាលើកកម្ពស់សីលធម៌សង្គម និងក្រមសីលធម៌វិជ្ជាជីវៈរបស់សិល្បករ៕
Account
Security
Favourite Content