ការបញ្ចេញបទចម្រៀងទោលជាលើកដំបូងរបស់សមាជិកកូនបងក្រុម BLACKPINK គឺ Jisoo ពិតជាធ្វើឱ្យអ្នកគាំទ្រ និងមហាជនជាច្រើនទន្ទឹងរង់ចាំខ្លាំង ដោយសារតែសមាជិកផ្សេងៗ សុទ្ធតែបញ្ចេញចម្រៀងទោលរបស់ខ្លួនអស់ទៅហើយ។ គ្រប់គ្នាធ្លាប់បានឃើញថ្វីដៃសម្ដែងដ៏ប៉ិនប្រសប់របស់ Jisoo រួចទៅហើយតាមរយៈរឿងភាគល្បី “Snow Drop” ប៉ុន្ដែគ្រប់គ្នាមិនទាន់បានស្ដាប់នូវសំនៀងរបស់នាងសម្រាប់ចម្រៀងទោលរបស់ខ្លួនឡើយ។
យោងតាមផលិតកម្ម YG Entertainment គិតត្រឹមថ្ងៃទី ២០ ខែមីនា ឆ្នាំ ២០២៣ អាល់ប៊ុមទោលដំបូងរបស់ JISOO មានចំណងជើងថា “ME” ទទួលបានការបញ្ជាទិញលើសពី ៩៥០ ០០០ បន្ទះទៅហើយ។ នេះគឺជាចំនួនដែលមានអ្នកទិញច្រើនបំផុតមិនធ្លាប់មានសម្រាប់អាល់ប៊ុមរបស់តារាស្រីទោលក្នុងប្រវត្តិសាស្ត្រប្រទេសកូរ៉េខាងត្បូង។

បើតាមប្រភពដដែល អាល់ប៊ុម “ME” ត្រូវបានអ្នកគាំទ្របញ្ជាទិញជាមុនប្រមាណ ៥១០ ០០០ ត្រឹមរយៈពេល ២ ថ្ងៃប៉ុណ្ណោះ និងទទួលបានការបញ្ជាទិញ ៨៤០ ០០០ ត្រឹមរយៈពេលមួយសប្តាហ៍។ មុនចម្រៀងរបស់នាងចេញជាផ្លូវការ អ្នកវិភាគបានរំពឹងទុកថាអាចនឹងមានអ្នកទិញដល់ជាង ១ លានបន្ទះ។
លើសពីនេះទៀត ការបញ្ជាទិញសម្រាប់អាល់ប៊ុមទោលរបស់ Jisoo មិនត្រឹមតែជាអ្នកគាំទ្រមកពីប្រទេសកូរ៉េខាងត្បូងប៉ុណ្ណោះទេ ថែមទាំងមកពីអាមេរិកខាងជើង អឺរ៉ុប ចិន ជប៉ុន និងអាស៊ីអាគ្នេយ៍ផងដែរ។ លទ្ធផលនេះ បង្ហាញថាឥទ្ធិពលរបស់ Jisoo ក្នុងវិស័យចម្រៀងខេប៉ុបពិតជាខ្លាំងក្លាមិនធម្មតាឡើយ៕























Account
Security
Favourite Content