នៅថ្ងៃទី២៩ ខែមិថុនា នេះ អ្នកដឹកនាំការសម្ដែង Kim Min Soo ដែលធ្លាប់ធ្វើការជាមួយ Han So Hee នៅក្នុងរឿង My Name បានទម្លាយពីអំពើសប្បុរសរបស់តារាស្រីវ័យ ៣១ឆ្នាំ ដែលបានចំណាយលុយហោប៉ៅឯងជាង ៥០លានវ៉ុន ឬប្រមាណ ៣៦០០០ដុល្លារអាមេរិក ទិញកុំព្យូទ័រជូនដល់និស្សិត ៣៤នាក់។

យោងតាមសារព័ត៌មាន ZapZee បានឱ្យដឹងថា អំពើសប្បុរសខាងលើនេះ បានកើតឡើងតាំងតែពីខែកក្កដា ឆ្នាំ២០២៤ មកម៉្លេះ ដោយផ្ដើមចេញពីការដែលលោកបានស្នើសុំឱ្យ Han So Hee ទៅជួយបង្រៀនសិស្សរបស់ខ្លួនក្នុងថ្នាក់សម្ដែងបែប វាយតប់ ឯវិទ្យាស្ថានសិល្បៈទីក្រុងសេអ៊ូល។
លោកបាននិយាយថា៖ “ដំបូងនាងយល់ព្រមចូលរួមត្រឹមតែមួយថ្ងៃប៉ុណ្ណោះ ប៉ុន្តែចុងបញ្ចប់នាងបានបង្ហាញខ្លួនជារៀងរាល់ថ្ងៃសម្រាប់មួយសប្តាហ៍ ដោយបង្ហាត់សិស្សខ្ញុំចំនួន ៤ ម៉ោងក្នុងមួយថ្ងៃ។ នាងមិនត្រឹមតែបង្រៀនក្បាច់ប្រយុទ្ធប៉ុណ្ណោះទេ នាងក៏បានចែករំលែកការយល់ដឹងអំពីការសម្តែង អារម្មណ៍ និងការបង្ហាញទឹកមុខផងដែរ”។
អ្នកដឹកនាំរូបនេះបានរៀបរាប់បន្ថែមថា នៅថ្ងៃមួយ តួឯកស្រីបានដឹងថា សិស្សប្រុសម្នាក់មានទូរស័ព្ទខូច មិនអាចជួសជុលបាន ហើយសិស្សដទៃទៀតក៏មានបញ្ហាហិរញ្ញវត្ថុដូចគ្នា។ ទើបនៅថ្ងៃចុងក្រោយ នាងបានធ្វើឱ្យសិស្សម្នាក់ៗភ្ញាក់ផ្អើលជាមួយនឹងកុំព្យូទ័រយួរដៃស៊េរីថ្មី ដើម្បីជួយគាំទ្រដល់ការសិក្សា និងអាជីពក្នុងក្ដីស្រមៃរបស់សិស្សទាំង ៤៣នាក់នោះ។

ដើមឡើយ Han Soo Hee បានស្នើសុំឱ្យអ្នកពាក់ព័ន្ធទាំងអស់ លាក់រឿងនេះជារឿងសម្ងាត់ ក៏ប៉ុន្តែលោក Kim Min Soo បានយល់ថា មហាជនគួរតែដឹងពីអំពើល្អរបស់តារាស្រីនៅគ្រានោះ ទើបលោកសម្រេចចិត្តចេញមកចែករំលែកបែបនេះ។
មុននឹងបញ្ចប់ អ្នកដឹកនាំការសម្ដែងរូបនេះ បានឱ្យដឹងទៀតថា ទោះវគ្គសិក្ខាសាលាខ្លីបញ្ចប់ទៅហើយក្ដី ក៏ប៉ុន្តែ Han So Hee នៅតែបន្តភ្ជាប់ទំនាក់ទំនងជាមួយនឹងសិស្សរបស់ខ្លួនជារឿយៗ ថែមទាំងបានមកចូលរួមនៅក្នុងកម្មវិធីបញ្ចប់ការសិក្សារបស់ពួកគេទៀតផង។
គួរឱ្យដឹងផងដែរថា ក្រោយបាត់មុខមួយរយៈពីការសម្ដែង Han So Hee ក៏កំពុងតែត្រៀមខ្លួនសម្រាប់រឿងថ្មី ដែលមានចំណងជើងថា Project Y ដោយភាពយន្តបែបឧក្រិដ្ឋកម្ម អាថ៌កំបាំងនេះ នាងនឹងត្រូវសម្ដែងរួមគ្នាជាមួយនឹងតារាស្រី Jeon Jong Seo៕
























Account
Security
Favourite Content