ម្ដាយរបស់តារាសម្ដែងស្រីកូរ៉េខាងត្បូង Han So Hee ត្រូវបានចាប់ខ្លួនក្រោមការចោទប្រកាន់ពីបទបើកល្បែងស៊ីសងខុសច្បាប់ជាង ១០ កន្លែង។

យោងតាមសេចក្ដីរាយការណ៍ពី TV Chosun កាលពីថ្ងៃទី ២ ខែកញ្ញាបង្ហាញថាស្ត្រីអាយុ ៥០ ឆ្នាំម្នាក់ត្រូវបានចាប់ខ្លួនដោយចោទប្រកាន់ពីបទបើកល្បែងស៊ីសងខុសច្បាប់។ ស្ត្រីមានឈ្មោះថា Shin និងត្រូវបានគេស្គាល់ថាជាម្តាយរបស់តារាសម្ដែងស្រី Han So Hee ត្រូវបានគេចោទប្រកាន់ពីបទបើកល្បែងស៊ីសងខុសច្បាប់ចំនួន ១២ នៅក្នុងទីក្រុងផ្សេងៗដូចជា Ulsan និង Wonju ចាប់ពីឆ្នាំ ២០២១ រហូតដល់ចុងខែសីហាកន្លងទៅ។
រហូតមកដល់ព្រឹកនេះផលិតកម្ម 9Ato Entertainment ដែលជាទីភ្នាក់ងាររបស់ Han So Hee ក៏បានចេញសេចក្ដីថ្លែងការណ៍បញ្ជាក់ថា ករណីនេះត្រូវបានចាត់ទុកថាជារឿងផ្ទាល់ខ្លួនរបស់ម្តាយ Han So Hee មិនមានអ្វីជាប់ទាក់ទងនឹង Han So Hee ឡើយ ប៉ុន្តែនាងក៏មានអារម្មណ៍សោកស្ដាយ និងខូចចិត្តដែរពេលបានដឹងដំណឹងនេះ។
គួររំឭកថា អ្នកស្រី Shin មានប្រវត្តិត្រូវបានប្តឹងពីបទឆបោក និងធ្លាប់ទទួលបានការផាកពិន័យពីបទល្មើសស្រដៀងគ្នានេះជាច្រើនលើកមកហើយ។ ករណីនេះបានទាក់ទាញការចាប់អារម្មណ៍បន្ថែមទៀតដោយសារតែសេចក្តីថ្លែងការណ៍ជាសាធារណៈកន្លងមករបស់ Han So-hee បានបង្ហាញថានាងបានឃ្លាតឆ្ងាយពីម្តាយ បន្ទាប់ពីមានបញ្ហាបំណុលជាច្រើន។
នៅក្នុងខែមីនា ឆ្នាំ ២០២២ ទីភ្នាក់ងាររបស់ Han So-hee ធ្លាប់បានចេញសេចក្តីថ្លែងការណ៍មួយដែរ ដោយទទួលស្គាល់ថា លោកស្រី Shin បានជាប់ពាក់ព័ន្ធក្នុងសំណុំរឿងក្លែងបន្លំជាច្រើន ប៉ុន្តែបានបំភ្លឺថា Han So-hee មិនជាប់ពាក់ព័ន្ធនឹងសកម្មភាពរបស់ម្តាយនាង ដូចដែលបានកំណត់ដោយតុលាការនោះទេ។
តារាស្រីវ័យ ២៩ឆ្នាំរូបនេះ ធ្លាប់បង្ហើបថាឪពុកម្តាយរបស់នាងបានលែងលះគ្នានៅពេលដែលនាងមានអាយុប្រហែល ៥ ឆ្នាំ ហើយនាងក៏បានរស់នៅជាមួយជីដូនរហូតដល់ចូលរៀនសាកលវិទ្យាល័យ។ ទោះបីម្ដាយមិនមើលថែ ប៉ុន្តែកន្លងមកនាងក៏បានជួយសងបំណុលជំនួសម្ដាយយ៉ាងអស់ពីលទ្ធភាព ៕
























Account
Security
Favourite Content