បើរាប់មកដល់បច្ចុប្បន្នមានរយៈពេលជិត ៦០ ថ្ងៃទៅហើយដែល Jungkook កូនពៅក្រុមតារាចម្រៀងបុរស BTS បានចូលបំពេញកាតព្វកិច្ចបម្រើយោធា។ បើទោះបីជាយ៉ាងណាក៏ដោយ អ្នកគាំទ្រនៅតែនឹករឮកដល់លោកជានិច្ច ជាពិសេសទង្វើល្អៗដែលលោកធ្លាប់បានធ្វើកន្លងមក។

រំឭកទៅកាលពីឆ្នាំ ២០២១ ក្រុម BTS បានបង្ហាញខ្លួននៅក្នុងកម្មវិធី The Late Late Show របស់ James Corden ហើយពួកគេក៏បានតម្រូវឱ្យសម្ដែងបទចម្រៀង “Dynamite”, “Permission to Dance” និង “Butter” នៅលើទ្រូងផ្លូវអំឡុងពេលភ្លើងក្រហមផងដែរ។
អំឡុងពេលសម្ដែង អ្នកគាំទ្រមួយចំនួនបានទស្សនាការសម្ដែងរបស់ពួកគេយ៉ាងជក់ចិត្តថែមទាំងបានថតរូបភាព និងវីដេអូជាច្រើនហើយចែករំលែកនៅលើបណ្ដាញសង្គមទៀតផង។ អ្វីដែលកាន់តែពិសេស និងទាក់ទាញចំណាប់អារម្មណ៍អ្នកគាំទ្រកាន់តែខ្លាំងនោះគឺសកម្មភាពរបស់ Jungkook។

នៅពេលភ្លើងស្ដុបចាប់ផ្ដើមលោតពណ៌បៃតង សមាជិកទាំងអស់រួមទាំងក្រុមការងារត្រូវបំបែកគ្នាភ្លាមៗដើម្បីបញ្ជៀសបញ្ហាកកស្ទះចរាចរណ៍។ ដូចនេះក្រុមការងារទាំងអស់ត្រូវរើនូវឧបករណ៍ និងគ្រឿងតុបតែងឆាកទៅដាក់ទុកនៅចិញ្ចើមផ្លូវ។ ក្រោយមក Jungkook បានសង្កេតឃើញថាក្រុមការងារកំពុងព្យាយាមយ៉ាងខ្លាំងធ្វើយ៉ាងណាដើម្បីរើឱ្យបានលឿនបំផុត ដូច្នេះលោកក៏បានរត់ត្របល់មកវិញដើម្បីជួយក្រុមការងារ។ មិនត្រឹមតែ Jungkook ប៉ុណ្ណោះទេ ពោលគឺសមាជិក BTS ក៏បានបកត្រលប់មកជួយក្រុមការងារវិញដូចគ្នាដែរ។

គួរបញ្ជាក់ផងដែរថា នេះមិនមែនជាលើកទី ១ ដែល Jungkook និងសមាជិកទាំងអស់បានបង្ហាញទង្វើល្អនៅទីសាធារណៈ។ បន្ទាប់ពីឃើញទង្វើល្អដែលចេញចិត្តបែបនេះធ្វើឱ្យហើយអ្នកគាំទ្រទាំងអស់ជុំវិញពិភបលោកកោតសរសើរក្រុមតារាចម្រៀងមួយនេះជាខ្លាំងដោយពួកគេមិនប្រកាន់ខ្លួនថាជាតារាល្បីលំដាប់ពិភពលោកអ្វីនោះឡើយ ៕




















































Account
Security
Favourite Content