ថ្មីៗនេះ 1st Runner up Miss Universe Cambodia 2021ឆន ស្រីណេត ដែលគ្រប់គ្នាស្គាល់ថាជាស្ត្រីខ្មែរក្រោមដំបូងគេក្នុងវិស័យ beauty pageant បានប្រកាសឱ្យ AMS Infotainment ដឹងថា នាងនឹងវិលត្រឡប់មកប្រកួតបវរកញ្ញាម្ដងទៀតនៅក្នុងឆ្នាំណាមួយ ពេលដែលនាងត្រៀមខ្លួនរួចរាល់ជាងនេះ ប៉ុន្តែឥឡូវនៅមិនទាន់អាចកំណត់កាលបរិច្ឆេទច្បាស់លាស់នៅឡើយទេ។



ស្រីណេត ឱ្យដឹងបន្តថា នាងនៅតែស្រលាញ់វេទិកា Miss Universe Cambodia នឹងគិតប៉ងចង់ត្រឡប់មកប្រកួតកម្មវិធីនេះវិញម្ដងទៀត ដើម្បីបំពេញក្ដីស្រមៃដ៏ធំក្នុងជីវិត ដែលចង់ឈរជាសំឡេងឱ្យបងប្អូនខ្មែរក្រោមមានភាពក្លាហាន ហ៊ានបោះជំហានធ្វើនូវអ្វីថ្មី សម្រាប់ខ្លួនឯង។ ពិសេសគឺស្ត្រីខ្មែរក្រោម ឱ្យពួកគេមានភាពក្លាហានក្នុងការបង្ហាញទៅសាធារណៈដូចអ្វីដែលនាងកំពុងធ្វើ។ បវរកញ្ញាសម្បុរទឹកឃ្មុំរូបនេះសង្ឃឹមថា នាងអាចក្លាយជាគំរូដ៏ល្អមួយ សម្រាប់ស្ត្រីខ្មែរក្រោមគ្រប់រូប។
បវរកញ្ញារូបនេះទទួលស្គាល់ថា កន្លងមកនាងមានចន្លោះខ្វះខាតច្រើន ហើយអ្វីដែលជាចំណុចខ្សោយ គឺនាងមិនសូវក្លាហានក្នុងការនិយាយស្ដី និងការបញ្ចេញមតិជាសាធារណៈ។ ដើម្បីឱ្យខ្លួនឯងកាន់តែមានភាពរឹងមាំ សម្រាប់ការវិលត្រឡប់វិញ ស្រីណេត កំពុងប្រឹងហ្វឹកហាត់លើការនិយាយជាសាធារណៈ និងភាសាអង់គ្លេសផងដែរ។ នាងលើកឡើងច្បាស់ៗថា ប្រសិនបើនាងត្រឡប់មកវិញម្ដងទៀត គឺនាងមកយកមកុដតែម្ដង ដើម្បីបានក្លាយជាបវរកញ្ញាតំណាងប្រទេសទៅប្រកួតលើឆាកអន្តរជាតិ ដូចនេះនាងត្រូវប្រាកដចិត្តជាមុនសិនថា ខ្លួនឯងមានសមត្ថភាពគ្រប់គ្រាន់ក្នុងការទម្លាក់បេក្ខភាពជើងខ្លាំងដទៃ ដើម្បីឡើងគ្រងមកុដ។


1st Runner up Miss Universe Cambodia 2021 សង្ឃឹមថា ពុកម៉ែបងប្អូនទាំងនៅកម្ពុជា និងនៅខ្មែរក្រោម រួមទាំងហ្វេនៗដែលស្រលាញ់វិស័យបវរកញ្ញាទាំងអស់ នឹងនៅតែគាំទ្ររូបនាង ប្រសិនបើនាងត្រឡប់មកប្រកួតវិញនៅថ្ងៃខាងមុខ៕























Account
Security
Favourite Content