ថ្មីៗនេះ រូបថតរបស់តារាសម្ដែង Min Hyo Rin និងស្វាមីគឺ Taeyang ក្រុម BIGBANG បានក្លាយជាប្រធានបទពេញនិយមមួយនៅលើអ៊ីនធឺណិត ដែលបង្ហាញពីប្រជាប្រិយភាពដ៏យូរអង្វែងរបស់នាង បើទោះបីបាត់មុខពីសិល្បៈជាច្រើនឆ្នាំហើយក៏ដោយ។


កាលពីថ្ងៃទី ១២ ខែតុលា រូបថតមួយចំនួនរបស់ Taeyang និង Min Hyo Rin ត្រូវបានចែករំលែកនៅលើអ៊ីនធឺណិត ដោយរូបថតទាំងនេះត្រូវបានថតនៅក្នុងពិធីមង្គលការរបស់ផលិតករ Kush របស់ក្រុមហ៊ុន The Black Label និង Vivian (បងប្អូនជីដូនមួយរបស់ Yuri ក្រុម SNSD) កាលពីថ្ងៃទី ១០ ខែតុលា។ ក្នុងរូបនោះ គូស្នេហ៍មួយគូនេះបានតែងខ្លួនជាមួយឈុតខ្មៅទាំងគូ និងថតរូបជាមួយកូនកំលោះ កូនក្រមុំ ក្នុងបរិយាកាសកក់ក្តៅ និងពោរពេញដោយក្ដីស្រលាញ់។
គួរបញ្ជាក់ថា Min Hyo Rin បានបាត់មុខ មិនបង្ហាញខ្លួនជាសាធារណៈអស់រយៈពេលជាយូរបន្ទាប់ពីរៀបការ និងមានកូន។ នាងបានជ្រើសរើសរស់នៅក្នុងជីវិតស្ងប់ស្ងាត់ឆ្ងាយពីវិស័យសិល្បៈ ដោយលះបង់ពេលវេលាលើគ្រួសារស្ទើរទាំងស្រុង ហេតុដូច្នេះហើយបានជាការបង្ហាញខ្លួនឡើងវិញរបស់នាងទទួលបានការសរសើរ និងភ្ញាក់ផ្អើលពីអ្នកគាំទ្រ។
ខណៈពេលដែលនាងរក្សាបាននូវភាពទាក់ទាញ និងទន់ភ្លន់ តែអ្នកលេងអ៊ិនធឺណិតមួយចំនួនបានកត់សម្គាល់ឃើញថា មុខ និងរូបរាងរបស់នាងមើលទៅឡើងសាច់ជាងមុន ដែលបង្កឱ្យមានការពិភាក្សាបង្ហាញមតិផ្សេងៗគ្នាលើបណ្ដាញសង្គម។

មតិរបស់អ្នកលេងអ៊ីនធឺណិតបានបង្ហាញការយល់ឃើញខុសៗគ្នារួមមាន៖
“នាងនៅតែមើលទៅស្រស់ស្អាតដូចសព្វដង”
“នេះមិនមែន Min Hyo Rin ដែលខ្ញុំធ្លាប់ស្គាល់ទេ”
“តើនេះពិតជា Min Hyo Rin មែនទេ?”
“សូម្បីតែតារាល្បី ក៏អាចធាត់បានដែរ នេះជារឿងធម្មតា”
“នាងមិនដូចពីមុនទេ ប៉ុន្តែនាងនៅតែស្រស់ស្អាត”
អ្វីដែលគួរឲ្យចាប់អារម្មណ៍នោះគឺ កាលពីប៉ុន្មានសប្តាហ៍មុននេះ Min Hyo Rin បានបង្ហោះរូបថតថ្មីៗរបស់នាង ដែលបង្ហាញពីមុខក្មេងជាងវ័យ និងសម្រស់ស្អាតឥតខ្ចោះ ដែលធ្វើឱ្យមហាជនហាក់ភ្ញាក់ផ្អើលពេលឃើញរូបថតថ្មីនេះខុសប្លែកពីរូបនាងបង្ហោះ។

នេះមិនមែនជាលើកទីមួយទេ ដែលការបង្ហាញខ្លួនរបស់នាងបានក្លាយជាប្រធានបទនៃការពិភាក្សា។ កន្លងមក អំឡុងពេលបាត់មុខពីវិស័យសិល្បៈ រូបថតនាងដែលមានគេលួចថតក៏ត្រូវបានចែករំលែក បង្កឱ្យមានពាក្យចចាមអារ៉ាមថាមានផ្ទៃពោះដោយគ្មានមូលដ្ឋាន ដែលបង្ហាញថាមហាជននៅតែបន្តចាប់អារម្មណ៍ជីវិតរបស់ Min Hyo Rin ជាប់ជានិច្ច ៕























Account
Security
Favourite Content