ក្រោយសម្ដែងជាតួអង្គនៅក្នុងភាពយន្តនិយាយពីប្រវត្តិរបស់អ្នកចម្រៀងអូប៉េរ៉ា Maria Callas តារាសម្ដែងជួរមុខរបស់ហូលីវូដ Angelina Jolie បានរៀបរាប់ថា ខ្លួននឹងស្អប់ ភាពយន្ដណាដែលថតពីជិវិតខ្លួន។
កាលពីពេលថ្មីៗនេះ អ្នកម្ដាយកូន ៦ ទើបតែបញ្ចប់ការងារសម្ដែងរបស់ខ្លួននៅក្នុងរឿង Maria ដែលរៀបរាប់ពីដំណើរជីវិតរបស់ Maria Callas អ្នកចម្រៀងអូប៉េរ៉ាដ៏អស្ចារ្យមួយរូប ដែលមានជីវិតពេញដោយសោកនាដកម្មនៅចន្លោះទសវត្សរ៍ឆ្នាំ ១៩៧០ ឯទីក្រុងប៉ារីស។
ត្បិត មានឱកាសបានសម្ដែងជាបុគ្គលសំខាន់មួយរូបនៅក្នុងប្រវត្តិសាស្រ្តក៏ពិតមែន តែនៅពេលដែលសារព័ត៌មាន Sunday Times បានសួរលោកស្រីថា៖ “បើថ្ងៃណាមួយរឿងរ៉ាវជីវិតរបស់អ្នកនឹងត្រូវបាននាំយកទៅផលិតជាភាពយន្ត អ្នកនឹងមានអារម្មណ៍បែបណា?” លោកស្រីបែរជាបដិសេធមិនចង់ឱ្យមានរឿងបែបនេះកើតឡើងទៅវិញ។
ជាក់ស្ដែង តារាស្រីរូបនេះបានរៀបរាប់ថា៖ “នៅពេលដែលខ្ញុំជាបុគ្គលសាធារណៈ ហើយបានសម្ដែងជា Maria Callas ខ្ញុំដឹងខ្លួនហើយថា ខ្ញុំនឹងស្អប់អ្នកឯទៀតដែលមកលេងជាខ្លួនខ្ញុំ មកបកស្រាយ ឬនិយាយពីជីវិតរបស់ខ្ញុំ ធ្វើដូចគេនឹងដឹងពីជីវិតរបស់ខ្ញុំច្បាស់ណាស់អ៊ីចឹង”។
តារាស្រីវ័យ ៤៩ឆ្នាំបកស្រាយដូច្នេះ និងប្រាប់បន្ថែមថា ដោយសារតែមានទស្សនៈបែបនេះទើបលោកស្រី និងក្រុមការងារព្យាយាមផលិតភាពយន្តមួយនេះយ៉ាងយកចិត្តទុកដាក់ និងគ្រប់ជ្រុងជ្រោយបំផុត។
Angelina Jolie បានលះបង់កម្លាំងកាយចិត្តខ្លាំងនៅក្នុងភាពយន្តមួយនេះ ដោយត្រូវចំណាយពេលរហូតដល់ទៅកន្លះឆ្នាំជាងក្នុងការត្រៀមខ្លួន ដើម្បីអាចសម្ដែងឱ្យដូចនឹងតួអង្គក្នុងជីវិតពិតបំផុត។ លោក Pablo Larrian បានសសើរដល់តួអង្គឯករបស់រឿងខ្លួនថា៖ “លោកស្រីបានចំណាយពេលហ្វឹកហាត់រហូតដល់ទៅ ៧ខែ មិនថាការដកដង្ហើម កាយវិការ និងការបញ្ចេញសំនៀងនោះទេ។ ក្រៅពីនេះ លោកស្រីក៏ត្រូវច្រៀងចម្រៀងភាសាអ៊ីតាលី និងបារំាងទៀត តែភាគច្រើនជាភាសាអ៊ីតាលីច្រើនជាង”។
អ្នកដឹកនាំរឿងនេះ បានបន្តថា អ្វីដែលលំបាកបំផុតសម្រាប់ Angelina Jolie គឺបច្ចេកទេសការច្រៀងដែលហៅថា Pitch ព្រោះនាងត្រូវច្រៀងឱ្យដល់តុង និងមេឡូឌីដែលត្រឹមត្រូវ។
ភាពយន្តជីវប្រវត្តិខាងលើនេះបានទទួលបានការកោតសរសើរខ្លាំង នៅពេលចាក់បញ្ចាំងនៅក្នុងមហោស្រពភាពយន្តទីក្រុង Venice ឆ្នាំ២០២៤ ដោយទស្សនិកជនបានឈរទះដៃរហូតដល់ ៨នាទីនៅពេលរឿងចប់៕