ដំណឹងមរណៈភាពរបស់តារាប្រុស Lee SunKyun ធ្វើឲ្យមហាជន និងអ្នកគាំទ្រជាច្រើនហាក់មានការសោកស្ដាយ ដោយសារតែរឿងកើតឡើងលឿនពេក គ្រប់គ្នាត្រៀមចិត្ដមិនទាន់បាន។ តារាប្រុស Lee SunGyun ជាតារាសម្ដែងប្រុសដ៏ឆ្នើមម្នាក់ លោកកាន់តែមានឈ្មោះល្បីល្បាញខ្លាំងក្រោយបង្ហាញខ្លួនក្នុងភាពយន្ដកុនល្បី Parasite។
ជាមួយគ្នាដែរ សពរបស់តារាប្រុសនេះត្រូវបានលើកដាក់ចូលមឈូសដើម្បីរៀបចំពិធីបុណ្យសពនៅថ្ងៃទី ២៨ ខែ ធ្នូ ឆ្នាំ ២០២៣។ ខណៈពិធីបញ្ចុះសពនឹងធ្វើឡើងនៅថ្ងៃស្អែកទី ២៩ ខែ ធ្នូ ឆ្នាំ ២០២៣។ សពរបស់តារាប្រុស Lee SunKyun នឹងត្រូវបញ្ចុះនៅឯស្រុកកំណើតនៅតំបន់ Buan-Gun ខេត្ដ Jeollabuk-Do។
យោងតាមភ្នាក់ងារតំណាងរបស់តារាប្រុស Lee SunKyun ពិធីបុណ្យរបស់លោកនឹងធ្វើឡើងលក្ខណៈឯកជន ស្ងប់ស្ងាត់ និងមានការចូលរួមតែពីសាច់ញាតិ មិត្ដរួមការងារជិតស្និទ្ធប៉ុណ្ណោះ។ ជាពិសេស សង្ឃឹមថាមហាជន អ្នកគាំទ្រ កុំមានការបារម្ភ និងអនុញ្ញាតឲ្យលោកបានស្ងប់សុខ។
គួរបញ្ជាក់ថា តារាសម្ដែងប្រុស Lee SunKyun ត្រូវបានរាយការណ៍ថាបានទទួលមរណៈភាពនៅព្រឹកថ្ងៃទី ២៧ ខែ ធ្នូ ឆ្នាំ ២០២៣។ លោកត្រូវគេរកឃើញសន្លប់បាត់ស្មារតីក្នុងរថយន្ដដែលចតចោលនៅតំបន់ Seongbuk ក្នុងទីក្រុងសេអ៊ូល។ បើតាមសម្ដីរបស់ភរិយាលោកតារាស្រី Jeon HyeJin មុនចាកចេញពីផ្ទះ លោកបានបន្សល់ទុកនូវសំបុត្រមួយច្បាប់ដល់រូបនាង។ តាមប្រភព Tv Chosun បានឲ្យដឹងថាសំបុត្រនោះគឺបានបង្ហាញពី សម្ពាធ និងការស្ដ្រេសទាក់ទិននឹងការបង់ថ្លៃសងពាណិជ្ជកម្ម ព្រមទាំងរឿងផ្សេងៗទៀត។
ការស្លាប់របស់លោកត្រូវបានគេជឿថាជាការធ្វើអត្តឃាតខ្លួនឯង ដោយសាររឿងអាស្រូវគ្រឿងញៀនផ្ទុះឡើងកាលពីខែតុលា ឆ្នាំ ២០២៣ កន្លងទៅ៕