គិត​មក​ទល់​ពេល​នេះ អតីត​បេក្ខភាព Miss Global 2016 អ្នកនាង សូរ្យ អេនណា  បាន​ចាក​ឆ្ងាយ​ពី​វិស័យ​សិល្បៈ​ប្រមាណ ៣ ឆ្នាំ​មក​ហើយ បន្ទាប់ពី​នាង​រៀបការ​សាង​គ្រួសារ​ជាមួយ​ស្វាមី​ជនជាតិ​ហុឡង់ដ៍ បន្សល់​បាន​កូន​ស្រី ២ នាក់​ជា​ដំណក់​ឈាម​រួមគ្នា និង​បាន​ចាកចេញ​ទៅ​រស់នៅ​ទីក្រុង​ហុងកុង​យ៉ាង​មាន​សុភមង្គល។

ថ្មីៗ​នេះ​អ្នកនាង​បាន​នាំ​កូន​ស្រី​បណ្ដូល​ចិត្ត​ទាំង ២ នាក់​មក​លេង​មាតុភូមិ​កំណើត ក្រោយ​ត្រូវ​ជាប់​គាំង​រយៈពេល​ជាង ២ ឆ្នាំ​ព្រោះ​ជំងឺ​កូវីដ១៩។ មក​កម្ពុជា​លើក​នេះ ត្រូវ​អ្នក​នាង​ឱ្យ​ដឹង​ថា គឺ​ដើម្បី​ដើរកម្សាន្ត តែ​នាង​ក៏​ឆ្លៀត​ឱកាស​ធ្វើ​កិច្ច​ការងារ​សិល្បៈ​ខ្លះ​ផង​ដែរ ថែម​ទាំង​បាន​រៀបចំ​ការងារ​មួយ​ចំនួន​ត្រៀម​សម្រាប់​កម្មវិធី Mrs. Asia Pacific Cambodia 2022 ដែល​នាង​នឹង​ត្រូវ​តំណាង​ជាតិ​កម្ពុជា​នា​ពេល​ខាង​មុខ​ថែម​ទៀត​ផង។ មិនតែប៉ុណ្ណោះ អេនណា ក៏​បាន​ឆ្លៀត​ចូលរួម​ថត​ជា​តួឯក​ក្នុង MV ចម្រៀង​មួយ​បទ​ចំណង​ជើង «ប្ដី​បារាំង» ជាមួយ​តួ Stunt មកពី​ហូលីវូត​លោក Shayne Tingle ព្រម​ទាំង​លេច​មុខ​ដើរ​បង្ហាញ​ម៉ូដ​ជាមួយ​ប្អូន​ៗ​ជំនាន់​ក្រោយ​ថែម​ទៀតផង។

ស្ថិត​ក្នុង​វ័យ ២៩ ឆ្នាំ និង​មាន​កូន​ស្រី ២ នាក់​ទៅ​ហើយ​ក្តី ប៉ុន្តែ សូរ្យ អេនណា នៅតែ​ស្រស់ស្អាត​មិន​ប្រែប្រួល​ធ្វើ​ឱ្យ​ហ្វេន​ៗ និង​មិត្ត​រួម​ជំនាន់​លាន់​មាត់​សរសើរ​នាង​សឹង​គ្រប់​ៗ​គ្នា។ ផ្តល់​កិច្ច​សម្ភាសន៍​ជាមួយ AMS កាល​ពី​ពេល​ថ្មី​ៗ អតីត Top 20 ក្នុង​កម្ម​វិធី​ប្រកួត​សម្រស់ Miss Global 2016 រូប​នេះ បាន​ចែករំលែក​ឱ្យ​ដឹង​វិធី​ថែ​រក្សា​សម្រស់​ឱ្យ​នៅ​តែ​ស្រស់​ផូរផង់ ថែម​ទាំង​លម្អិត​ឱ្យ​ដឹង​ពី​កម្មវិធី Beauty Pageant ថ្មី​ដែល​នាង​ត្រៀម​ទៅ​ប្រកួត​ទៀត​ផង។

​

អ្នក​ម៉ាក់​កូន ២ រូប​នោះ​បាន​រៀបរាប់​ថា៖ «បើ​និយាយ​ទៅ​គឺ​អត់​មាន​អី​ច្រើន​ទេ គឺ​ខ្ញុំ​តែងតែ​ហាត់ប្រាណ ញាំ​បន្លែ​ពណ៌​បៃតង​ជា​រៀងរាល់​ថ្ងៃ ហើយ​ញាំ​ឱ្យ​ទៀងទាត់​ពេលវេលា»។ ដោយឡែក កម្មវិធី Mrs. Asia Pacific Cambodia 2022 ដែល​អ្នកនាង​កំពុង​ត្រៀម​ប្រកួត​គឺ៖«កម្មវិធី​ដែល​ត្រៀម​ចូល​ប្រកួត​គឺ​អំឡុង​ខែ​តុលាជា​កម្មវិធី Mrs. Asia Pacific 2022។ កម្មវិធី​នេះ​តម្រូវ​ឱ្យ​ស្រី្ត​ដែល​មាន​ស្វាមីឬ​ស្ត្រី​លែងលះ​មាន​អាទិភាព​ចូលរួម​កម្មវិធី​នេះដើម្បី​តំណាង​ប្រទេស​នីមួយ​ៗក៏​ដូចជា​បង្ហាញ​នូវ​ភាព​រឹងមាំ​បន្ទាប់ពី​មាន​គ្រួសារ​ហើយ»។

អេនណា បន្ត​ថា​មូលហេតុ​ដែល​អ្នកនាង​នៅតែ​បន្ត​ឈរ​លើ​វិស័យ​នេះ ព្រោះ​ស្រលាញ់​វិស័យ​សិល្បៈ និង​ស្រលាញ់​គ្រប់​ទម្រង់​នៃ​វិស័យ​សិល្បៈ ដូច្នេះ​អ្វី​ដែល​អ្នក​នាង​អាច​ធ្វើ​បាន​តំណាង​ឱ្យ​ប្រទេស​កម្ពុជា ដើម្បី​ឱ្យ​អន្តរជាតិ​ស្គាល់​កម្ពុជា​គឺ​នាង​នឹង​ធ្វើ។ តួយ៉ាង សម្រាប់​កម្មវិធី Mrs. Asia Pacific Cambodia 2022 គឺ​ត្រូវ​នឹង​អ្នកនាង​តែ​ម្ដង ដែល​អ្នកនាង​ជា​ស្ត្រី​ទើប​រៀបការ​ហើយ និង​នៅតែ​មាន​បំណង​បង្ហាញ​ពី​ភាព​អង់អាច​របស់​ស្រី្ត​កម្ពុជា​ទៅ​កាន់​អន្តរជាតិ។

អតីត​តារា​បង្ហាញ​ម៉ូដ សូរ្យ អេនណា បាន​រៀបការ​ជាមួយ​ស្វាមី​ជា​ជនជាតិ​ហុឡង់ដ៍ និង​បាន​ចាកចេញ​ពី​កម្ពុជា​ទៅ​រស់នៅ​ទីក្រុង​ហុងកុង​តាំង​ពី​ឆ្នាំ ២០១៩។ ស្វាមី​របស់​នាង​ត្រូវ​គេ​ដឹង​ថា មាន​តំណែង​ជា​អ្នក​គ្រប់គ្រង​សណ្ឋាគារ​នៅ​ទី​ក្រុង​ហុងកុង ដែល​មាន​ប្រាក់​ចំណូល​ខ្ពស់ តែ​យ៉ាងណា​ក៏​ដោយ តារា​ម៉ូដែល​រូប​នេះ​បញ្ជាក់​សាជាថ្មី​ថា នៅតែ​មិន​ភ្លេច​ពី​ការងារ​សិល្បៈ​ដដែល៕