អ្នកគាំទ្ររបស់ Kim Soo Hyun ពីជុំវិញពិភពលោកបង្កើតគេហទំព័រកត់ត្រានូវអ្វីដែលពួកគេជឿជាក់ថា “ជាការពិត” ដើម្បីការពារតារាក្នុងដួងចិត្តរបស់ខ្លួន ក្រោយរឿងអាស្រូវចំណងស្នេហាជាមួយនឹង Kim Sae Ron អូសបន្លាយដល់ ៩ខែ។

ផ្អែកតាមការចុះផ្សាយរបស់ Allkpop នៅថ្ងៃទី៨ ខែធ្នូនេះ ក្រុមអ្នកគាំទ្រទាំងក្នុង និងក្រៅស្រុក ក្រោមឈ្មោះ Kim Soo Hyun Korea and Global Fan Union បានបង្កើតគេហទំព័រ “kimfact with u” ដើម្បីកត់ត្រាលម្អិតពីពេលវេលានៃបញ្ហាចម្រូងចម្រាស សេចក្ដីសង្ខេបអំណះអំណាងសំខាន់ៗ និងធ្វើបច្ចុប្បន្នភាពលើស្ថានភាពផ្លូវច្បាប់។
ក្នុងគោលបំណងការពារអាយដលរបស់ខ្លួន ក្រុមអ្នកគាំទ្រដដែលនេះបានអះអាងថា៖ “នេះគឺជាការពិតដែលយើងបានផ្ទៀងផ្ទាត់ និងកត់ត្រា។ យើងសំណូមពរឱ្យអ្នកពិនិត្យមើលវា ហើយធ្វើការវិនិច្ឆ័យដោយខ្លួនឯង”។

គួរឱ្យដឹងថា សកម្មភាពខាងលើនេះបានកើតឡើង ក្រោយពីតារាស្រី Kim Sae Ron បានទទួលមរណភាពនៅថ្ងៃទី១៦ ខែកុម្ភៈ ត្រូវជាថ្ងៃកំណើតរបស់ Kim Soo Hyun។ លុះមកដល់ខែមីនា គណនី YouTube Garo Sero Institute បានផ្សព្វផ្សាយថា ក្រុមគ្រួសាររបស់តារាស្រីបានអះអាងថា Kim Soo Hyun បានទាក់ទងនឹង Kim Sae Ron តាំងតែពីនាងនៅជាអនីតិជន។
ដោយឡែក Kim Soo Hyun បានចេញមកបដិសេធយ៉ាងដាច់អហង្ការចំពោះការចោទប្រកាន់ទាំងនេះនៅក្នុងសន្និសីទសារព័ត៌មានផ្ទាល់ខ្លួន ខណៈពេលដែលភាគីទាំងសងខាងបានបង្ហាញភស្តុតាងរៀងៗខ្លួនជាបន្តបន្ទាប់។ យ៉ាងណាមិញ អស់ពេលជាង ៩ខែ បញ្ហាជម្លោះផ្លូវច្បាប់នៅតែបន្តរហូតមកដល់ពេលបច្ចុប្បន្ននេះ។

ក្រោយមានរឿងអាស្រូវ Kim Soo Hyun បានទទួលផលប៉ះពាល់លើអាជីពការងារ រួមមានការសម្ដែងភាពយន្តភាគរបស់ Disney+ ក៏ដូចជាការបញ្ចប់កុងត្រាផ្សព្វផ្សាយផលិតផល និងការប្ដឹងទារសំណងពីយីហោនានា។
ទន្ទឹមគ្នានេះ អ្នកគាំទ្រក៏បានចូលរួមការពារលោកជាបន្តបន្ទាប់មិនថានៅលើបណ្ដាញសង្គម និងតាមរយៈផ្ទាំងផ្សព្វផ្សាយតាមរថយន្តនានា។ ស្របពេលដែលការបង្កើតគេហទំព័រខាងលើនេះ គឺជាសកម្មភាពមួយដាច់ដោយឡែក៕
























Account
Security
Favourite Content