តារាសម្តែងចិន Zhao Lusi ដែលទទួលបានរហស្សនាម “រាជិនី Rating ជំនាន់ថ្មី” សម្រាប់រឿងភាគល្បីៗរបស់នាងដូចជា “Hidden Love” និង “Love’s Ambition” បានបញ្ចប់កិច្ចសន្យាជាមួយក្រុមហ៊ុន Galaxy Cool Entertainment យ៉ាងជោគជ័យ ដោយមិនបានបង់ប្រាក់ពិន័យជាង ៤០០ លានយ៉ន់ (៥៦ លានដុល្លារ) នោះឡើយ បន្ទាប់ពីជម្លោះផ្ទៃក្នុងដ៏យូរអង្វែង។

កន្លងមក តួឯកស្រីវ័យ ២៦ ឆ្នាំរូបនេះធ្លាប់បានបង្ហាញនៅលើ Weibo ថា ភ្នាក់ងាររបស់នាងបានបង្ខំនាងឱ្យបង់ប្រាក់សំណងសម្រាប់ការលុបចោលកិច្ចព្រមព្រៀងផ្សព្វផ្សាយដោយសារតែនាងមានជំងឺ ហើយថែមទាំងបានដកប្រាក់ជាង ២.០៥ លានយ៉ន់ពីគណនីរបស់នាងដោយគ្មានការអនុញ្ញាត។ ហេតុការណ៍នេះបានបង្កឱ្យមានការខឹងសម្បារក្នុងចំណោមអ្នកគាំទ្រ និងមានការផ្ដល់កម្លាំងចិត្តដល់នាងយ៉ាងច្រើនលើសលប់។ ពេលនោះ ខាងទីភ្នាក់ងារបានចេញសេចក្តីថ្លែងការណ៍មួយដោយនិយាយថាពួកគេ “ត្រៀមខ្លួនរួចរាល់ដើម្បីពិភាក្សា” ប៉ុន្តែបានព្រមាននាងឱ្យប្រុងប្រយ័ត្នចំពោះការនិយាយជាសាធារណៈ។
យ៉ាងណាក៏ដោយថ្មីៗនេះ សេចក្ដីរាយការណ៍ពីប្រព័ន្ធផ្សព្វផ្សាយចិនបង្ហាញថា Zhao Lusi អាចបញ្ចប់កិច្ចសន្យារបស់នាងទាំងស្រុងដោយមិនចាំបាច់បង់ប្រាក់ពិន័យបន្ទាប់ពីក្រុមហ៊ុន Hujing Digital Media Group ដែលជាបុត្រសម្ព័ន្ធរបស់ Alibaba បានទិញយក Galaxy Cool Entertainment។ នាងបានចុះកិច្ចសន្យាថ្មីជាមួយក្រុមហ៊ុនថ្មីនេះរយៈពេលប្រាំឆ្នាំ ដោយមានលក្ខខណ្ឌតួនាទីជាទីប្រឹក្សា និងអ្នកណែនាំដល់សិល្បករថ្មីៗរយៈពេលពីរឆ្នាំ។
បន្ទាប់ពីកិច្ចព្រមព្រៀង រូបភាពផ្សព្វផ្សាយរបស់ Zhao Lusi បានចាប់ផ្តើមលេចឡើងនៅលើអេក្រង់ LED យក្សនៅទីស្នាក់ការកណ្តាលរបស់ Alibaba Pictures ដែលជាការបង្ហាញខ្លួនជាផ្លូវការរបស់នាងក្នុងនាមជាតារាសម្តែងស្រីជួរមុខនៅ Alibaba។ នាងត្រូវបានគេរាយការណ៍ថាកំពុងរៀបចំថតគម្រោងថ្មីពីរ៖ ទីមួយគឺជារឿងភាគបុរាណរួមជាមួយតួឯកប្រុសរឿង “Revenged Love” Tian Xu Ning និងទីពីរគឺជារឿងភាគបែបស៊ើបអង្កេត។
អ្នកគាំទ្រជាច្រើនបានអបអរសាទរចំពោះដំណឹងនេះតាមអ៊ីនធឺណិត តាមរយៈការបញ្ចេញមតិផ្សេងៗដូចជា “ទីបំផុតនាងមានសេរីភាពម្តងទៀតហើយ!” និង “ពិតជាអន្ទះសាចង់មើលរឿងថ្មីៗរបស់ Lusi ខ្លាំងណាស់!” ៕




























Account
Security
Favourite Content