កាលពីថ្ងៃចន្ទ ទី១៥ ខែកញ្ញា នេះ លោក Bang Si Hyuk ប្រធានក្រុមហ៊ុន HYBE បានចូលខ្លួនផ្ដល់ចម្លើយអស់ពេល ១៣ម៉ោង ទាក់ទងនឹងការសង្ស័យដែលថា លោកបានបោកប្រាស់ម្ចាស់ភាគហ៊ុន ដើម្បីស្វែងរកប្រាក់ចំណេញដោយខុសច្បាប់។

សារព័ត៌មាន The Korea Times បានចុះផ្សាយថា នៅវេលាម៉ោង ១០ព្រឹកក្នុងថ្ងៃតែមួយនេះ លោក Bang Si Hyuk បានបង្ហាញវត្តមាននៅឯអង្គភាពស៊ើបអង្កេតឧក្រិដ្ឋកម្មហិរញ្ញវត្ថុ របស់ទីភ្នាក់ងារប៉ូលិសក្រុងសេអ៊ូល ដោយគ្រានោះ លោកបានប្រាប់អ្នកសារព័ត៌មានថា៖ “ខ្ញុំសុំទោសដែលបង្កឱ្យមានការព្រួយបារម្ភ។ ខ្ញុំនឹងព្យាយាមចូលរួមដោយស្ម័គ្រស្មោះ នៅក្នុងការស៊ើបអង្កេតថ្ងៃនេះ”។
យ៉ាងណាមិញ ការចូលខ្លួនស្រាយបំភ្លឺខាងលើ បានអូសបន្លាយអស់ពេលជាង ១៣ម៉ោង ដោយលោកបានចាកចេញពីអង្គភាពស៊ើបអង្កេតឧក្រិដ្ឋកម្មហិរញ្ញវត្ថុវិញ នៅម៉ោង ១១៖ ២៨នាទីយប់។ បន្ថែមពីនេះ លោកក៏បានបដិសេធមិនឆ្លើយសំណួរបស់អ្នកកាសែត និងដើរតម្រង់ទៅកាន់រថយន្តដោយមានអង្គរក្សជុំជិត។

សូមរំឭកថា កន្លងមកប៉ូលិសបានដាក់ការសង្ស័យទៅលើលោក Bang Si Hyuk និងអតីតនាយកប្រតិបត្តិម្នាក់ទៀត ដោយមានការលើកឡើងថា អ្នកទាំងពីរបានបោកបញ្ឆោតម្ចាស់ភាគហ៊ុនដើមរបស់ក្រុមហ៊ុន HYBE នៅគ្រាដែលក្រុមហ៊ុនបានធ្វើ IPO ឬដាក់លក់ភាគហ៊ុនជាសាធារណៈលើកដំបូង។
ទន្ទឹមគ្នានឹងការសង្ស័យនេះ ក្រុមអ្នកស៊ើបអង្កេតជឿជាក់ថា លោក Bang Si Hyuk អាចនឹងទទួលបានប្រាក់ចំណេញប្រហែល ១៩០ ពាន់លានវ៉ុន ឬប្រមាណ ១៣៨ លានដុល្លារអាមេរិក ក្រោមកិច្ចសន្យាដែលលោកអាចទទួលបានប្រាក់មិនក្រោម ៣០ភាគរយ ពីការលក់ភាគហ៊ុន ឬធ្វើ IPO កាលពីឆ្នាំ ២០២០។
ជំហានបន្តពីនេះ ប៉ូលិសនឹងត្រួតពិនិត្យលើចម្លើយរបស់លោក Bang Si Hyuk មុននឹងសម្រេចទិសដៅនៃការស៊ើបអង្កេតបន្តទៀត ខណៈដែលមន្ត្រីតុលាការពិសេសមកពីការិយាល័យត្រួតពិនិត្យហិរញ្ញវត្ថុក្រោមការគ្រប់គ្រងរបស់រដ្ឋអាជ្ញាក៏កំពុងស៊ើបអង្កេតការចោទប្រកាន់នេះ ដាច់ដោយឡែកពីគ្នាផងដែរ៕



























Account
Security
Favourite Content