ម្តាយរបស់តារាសម្ដែងវ័យក្មេង Jo Se-ung បានបង្ហាញការដឹងគុណចំពោះ តារាស្រី Go Hyun-jung ដែលបានជួយជីវិតកូនប្រុសរបស់ខ្លួន នៅពេលដែលកំពុងថតរឿង Queen Mantis កាលពីឆ្នាំមុន។

នៅលើគណនី Instagram អ្នកម្ដាយរូបនេះបានចែករំលែកពីឧប្បត្តិហេតុខាងលើ ដោយហៅ Go Hyun-jung ថា “អ្នកជួយសង្គ្រោះជីវិតរបស់ Se-ung” ភ្ជាប់ជាមួយនឹងរូបភាពរបស់តារាស្រីវ័យ ៥៤ឆ្នាំ ដែលអង្គុយទន្ទឹមគ្នានឹងកូនប្រុសរបស់ខ្លួននៅឯមាត់សមុទ្រ។
គាត់បានសរសេរថា៖ “យើងបានទៅសមុទ្រនៅក្នុងភូមិតូចមួយលើកោះ Sinan ដើម្បីថតរឿង Queen Mantis។ Se-ung ដែលមានអាយុ ៦ឆ្នាំ គេរំភើបណាស់ពេលបានឃើញសមុទ្រ ហើយគេក៏រត់ចូលទៅសមុទ្រតែម្ដង។ ខណៈពេលដែលសមុទ្រកំពុងតែស្ងប់ ស្រាប់តែមានរលកមួយចាប់ផ្ដើមបក់មក បម្រុងនឹងបក់បោកលើកូនប្រុសខ្ញុំ Go Hyun-jung បានរត់ពីចម្ងាយ លឿនជាងនរណាទាំងអស់ រួចជួយកូនខ្ញុំបានសម្រេច។ បន្ទាប់ពីនោះ គាត់ឱបកូនខ្ញុំយ៉ាងណែន”។
ស្ត្រីជាម្តាយបានឱ្យដឹងបន្ថែមថា៖ “សំលៀកបំពាក់របស់គាត់សើមជោក។ គាត់បានលោតចូលទៅជួយកូនខ្ញូំ នៅពេលដែលខ្ញុំជាម្ដាយបានតែគាំង មិនដឹងថាត្រូវធ្វើអ្វី។ ខ្ញុំពិតជាចង់អរគុណគាត់ម្ដងទៀត”។

ក្នុងឱកាសតែមួយនេះ អ្នកម្ដាយបានរៀបរាប់ទៀតថា បើទោះបីជានៅពេលថតចប់ទៅហើយ Go Hyun-jung នៅតែបន្តលេង និងងូតទឹកឱ្យកូនគាត់ពេញដោយក្ដីស្រឡាញ់ រហូតដល់កុមារាម្នាក់នេះហៅតារាស្រីថា ម៉ាក់ ស្របពេលដែលខ្លួននាងផ្ទាល់ យល់ឃើញថា តារាស្រីរូបនេះ ប្រៀបដូចជាទេវតាក្នុងជីវិតពិតអ៊ីចឹង។
គួរឱ្យដឹងផងដែរថា Queen Mantis គឺជាភាពយន្តបែបឧក្រិដ្ឋកម្ម ដែលចាក់ផ្សាយនៅលើប៉ុស្តិ៍ SBS រៀងរាល់ថ្ងៃសុក្រ និងថ្ងៃសៅរ៍ ដោយ Go Hyun-jung សម្ដែងជាតួអង្គ Jung Yi Shin ដែលជាឃាតករសម្លាប់រង្គាល មានគោលដៅទៅលើក្មេងៗ និងក្រុមគ្រួសារ៕
























Account
Security
Favourite Content