ជាថ្មីម្ដងទៀត ក្រុមចម្រៀងបុរស SEVENTEEN បានបង្ហាញពីប្រជាប្រិយភាពមិនធម្មតារបស់ពួកគេនៅក្នុងវិស័យខេប៉ុប ខណៈអាល់ប៊ុមថ្មីរបស់ពួកគេបានក្លាយជាអាល់ប៊ុមលក់ដាច់បំផុតក្នុងសប្ដាហ៍ដំបូង ប្រចាំឆ្នាំ២០២៤។

កាលពីពេលថ្មីៗ ក្រុមចម្រៀង SEVENTEEN បានធ្វើការត្រលប់មកឆាកតន្ត្រីវិញសម្រាប់ឆ្នាំ២០២៤ ជាមួយអាល់ប៊ុមថ្មីមានចំណងជើងថា “SPILL THE FEELS” ហើយឥឡូវអាល់ប៊ុមនេះអាចលក់បាន ៣ លានច្បាប់ និងបានក្លាយជាអាល់ប៊ុមលក់ដាច់លឿនបំផុតប្រចាំឆ្នាំ។
នៅថ្ងៃទី ១៩ ខែតុលា គេហទំព័រតន្ត្រីកូរ៉េ Hanteo បានបង្ហាញថាអាល់ប៊ុម “SPILL THE FEELS” អាចលក់ដាច់ដល់ ៣ លានបន្ទះក្នុងរយៈពេល ៥ ថ្ងៃក្រោយចេញលក់ និងជាអាល់ប៊ុមទីមួយក្នុងឆ្នាំ ២០២៤ ដែលអាចលក់ដាច់ដល់កម្រិតនេះក្នុងរយៈពេលមួយសប្តាហ៍។ សម្រាប់អាល់ប៊ុមនេះ SEVENTEEN បានចេញវីដេអូចម្រៀងរួចរាល់ចំនួន ២បទរួមមានបទ “LOVE, MONEY, FAME” ដែលមានការសហការជាមួយ DJ Khaled និងមួយបទទៀតគឺបទ “Eyes on you”។ ទន្ទឹមនឹងការចេញអាល់ប៊ុមចម្រៀងថ្មី ពួកគេក៏បានចាប់ផ្តើមការប្រគំតន្ត្រីទេសចរណ៍ពិភពលោកឈ្មោះ “Right Here” នៅក្នុងខែតុលាដូចគ្នា។
ស្ថិតក្រោមផលិតកម្ម Pledis Entertainment ដែលជាបុត្រសម្ព័ន្ធរបស់ HYBE ក្រុម SEVENTEEN មានសមាជិកចំនួន ១៣ នាក់ និងបានបង្ហាញខ្លួនជាលើកដំបូងក្នុងឆ្នាំ ២០១៥។ ក្រុមចម្រៀងនេះត្រូវបានគេស្គាល់សម្រាប់ការចូលរួមនិពន្ធបទភ្លេង និងទំនុកច្រៀងដោយខ្លួនឯងជាច្រើន ព្រមជាមួយក្បាច់រាំដ៏ទាក់ទាញរបស់ពួកគេ។
នៅឆ្នាំ២០២៤នេះ SEVENTEEN បានក្លាយជាក្រុមចម្រៀងខេប៉ុបដំបូងក្នុងប្រវត្តិសាស្ត្រដែលបានឡើងសម្ដែងក្នុងកម្មវិធីមហោស្រពតន្ត្រី Glastonbury នៅអង់គ្លេស និងមហោស្រពតន្ត្រី Lollapalooza ដែលធ្វើឡើងនៅប្រទេសអាល្លឺម៉ង់ កាលពីថ្ងៃទី៧ និងទី៨ ខែកញ្ញា ៕

























Account
Security
Favourite Content