ថ្ងៃពិសេសរបស់ តារាចម្រៀងស្រី សុវត្ថិឌី ធារីកា បានមកដល់នាព្រឹកនេះហើយ ហើយក៏ឃើញមានវត្តមានតារាប្រុសស្រីរួមអាជីព និងអ្នកមុខអ្នកការបានចូលរួមហែរជំនូន ព្រមទាំងចូលរួមត្រេកអរដល់គូស្វាមីថ្មោងថ្មីផងដែរ។


ក្នុងឈុតសម្លៀកបំពាក់ទទួលផ្កាស្លាពណ៌ស៊ីលាភ សុវត្ថិឌី ធារីកា ពិតជាស្រស់ស្អាត និងសមសួនខ្លាំងណាស់។ ងាកទៅខាងកូនកំលោះក៏ស្រស់សង្ហា មើលទៅពិតជាសមគ្នាខ្លាំងតែម្ដង តាំងពីដើមមក គេមិនដែលឮថា ធារីកា មានស្នេហាហើយ ស្រាប់តែដល់ថ្ងៃ គឺនាងបានបោះធៀប អញ្ជើញភ្ញៀវតែម្ដង។
សម្រាប់អ្នកគាំទ្ររឹតតែស្រឡាំងកាំងពេលដឹងថា ស្វាមី សុវត្ថិឌី ធារីកា ដែលឈ្មោះ ផានិត នោះ គឺជាកូនប្រុសមន្ត្រីធំមួយរូបក្នុងជួររដ្ឋាភិបាល។ សុវត្ថិឌី ធារីកា និងស្វាមី ស្រលាញ់គ្នា ៣ ឆ្នាំហើយ ដោយមានទាំងការទទួលស្គាល់ពីដុំឮពីចាស់ទុំទាំងសងខាងទៀតផង។ ចំណែកប្រវត្តិស្នេហ៍អ្នកទាំង ២ វិញ ពិតជាផ្អែមល្ហែមដែលហៅថា ឃើញភ្លាមស្រលាញ់ភ្លែត។

កូនកំលោះ ផានិត ធ្លាប់បាននិយាយថាលោកបានជួប សុវត្ថិឌី ធារីកា លើកដំបូងអំឡុងឆ្នាំ ២០២០ ក្នុងកម្មវិធីមួយ ដោយសារតែពូជីទួតមួយលោកត្រូវជាស្វាមីបងជីដូនមួយរបស់ សុវត្ថិឌី ធារីកា ។ លោកបន្តថាពេលនោះគ្រាន់តែឃើញ ធារីកា ភ្លាម លោកក៏បាក់ចិត្តស្រលាញ់ និងសម្រុកចូលទៅសុំនាងរាំជាមួយ ហើយបានសុំស្រលាញ់ភ្លាមៗតែម្ដង។
ចំណែកខាងស្រីមិនបានឆ្លើយតបទៅខាងប្រុសភ្លាមនោះទេ រហូតពេលវេលាកន្លងទៅជាង ១ខែ ទើបម្ចាស់បទ “បើមិនស្មោះ កុំស្នេហ៍អូន” ឆ្លើយតបវិញ តាមការណែនាំពីចាស់ទុំ ឲ្យសាកបើកចិត្តទាក់ទងគ្នាសិន និងបានណាត់ខាងប្រុសឲ្យមកជួបជាមួយឪពុកម្ដាយនាងតែម្ដង៕




























Account
Security
Favourite Content