នៅក្នុងវប្បធម៌ចិន និងបណ្ដាប្រទេសផ្សេងទៀតក្នុងតំបន់អាស៊ីអាគ្នេយ៍ដែលទទួលឥទ្ធិពលពីវប្បធម៌ចិន រមែងមានឆ្នាំទាំង១២ ដូចៗគ្នា។ ឆ្នាំ២០២៣ នេះជាឆ្នាំដែលប្រទេសជាច្រើនអបអរឆ្នាំទន្សាយ តែប្លែកតែវៀតណាមដែលប្រារព្ធពិធីចូលឆ្នាំស្រដៀងនឹងចិន ព្រមទាំងថ្ងៃខែដូចគ្នា តែវៀតណាមពុំមែនអបអរឆ្នាំទន្សាយទេ តែជាឆ្នាំ ឆ្មាទៅវិញ។

ថ្មីៗនេះ នៅទូទាំងប្រទេសវៀតណាមកំពុងរៀបចំតុបតែង រូបឆ្មា នៅតាមហាង ផ្សារទំនើប កាដូអនុស្សាវរីយក្ដីដោយសារតែឆ្នាំនេះប្រទេសជិតខាងកម្ពុជាមួយនេះអបអរឆ្នាំឆ្មា។
មែនទែនទៅវៀតណាម ដែលជាអ្នកជិតខាងកម្ពុជា និងចិន មានឆ្នាំទាំង១២ ដូចគ្នាតែ ១០ប៉ុណ្ណោះពោលគឺឆ្នាំ៖ កណ្ដុរ ខ្លា នាគ ពស់ សេះ ពពែ ស្វា មាន់ ឆ្កែ និងជ្រូក ខណៈដែលឆ្នាំ២ ផ្សេងទៀតនៅក្នុងវប្បធម៌វៀតណាមគឺ ឆ្នាំទន្សាយ និងគោ ត្រូវបានជំនួសដោយ ទន្សាយទៅឆ្មា ឯគោទៅក្របីវិញ។
ជាការពិត ការផ្លាស់ប្តូរនីមួយៗតែងមានហេតុផលច្បាស់លាស់ និងផ្អែកទៅលើកត្តាវប្បធម៌ប្រពៃណីរបស់ប្រទេស។ សម្រាប់ការផ្លាស់ប្តូរនេះអ្នកជំនាញប្រពៃណី និងវប្បធម៌វៀតណាមម្នាក់ឈ្មោះ Nguyen Hieu Tin បាននិយាយថាចម្លើយអាចស្ថិតនៅលើវាលស្រែដ៏មានតម្លៃរបស់កសិករវៀតណាម។
Hieu Tin បានបន្តប្រាប់ AFP ថា «អង្ករគឺជាផ្នែកដ៏ធំបំផុតមួយនៃវិស័យកសិកម្មរបស់វៀតណាម ប៉ុន្តែជាមួយនឹងការគំរាមកំហែងពីសត្វកណ្ដុរនៅក្នុងវាលស្រែ ហេតុនេះសត្វឆ្មា (ដែលអាចចាប់វាបាន) គឺជាសត្វដ៏ពេញនិយមសម្រាប់ជនជាតិវៀតណាមវិញ»។
ចំណែកឯការពន្យល់មួយផ្សេងទៀតបានលើកឡើងថា ដោយសារតែវៀតណាមមិនចង់អបអរ ២ឆ្នាំជាប់គ្នាដោយមានសត្វតំណាងស្រដៀងគ្នា។
ឆ្នាំឆ្មា ត្រូវបានជនជាតិវៀតណាមជឿថា នាំលាភសំណាង និងដំណើរដោយរលូននៅប្រទេសវៀតណាម។ គេជឿថាអ្នកកើតក្នុងឆ្នាំឆ្មា ជាមនុស្សដែលសកម្ម ប្រឹងប្រែងធ្វើការ និងទទួលបានការស្រលាញ់ពីមនុស្សគ្រប់គ្នា៕


























Account
Security
Favourite Content