Giovanni Vigliotto ម្ចាស់រហស្សនាមជា “បុរសដែលធ្លាប់រៀបអាពាហ៍ពិពាហ៍ច្រើនដងបំផុត” បានរៀបការជាមួយស្ត្រី ១០៥ នាក់នៅចន្លោះឆ្នាំ ១៩៤៩ និង ១៩៨១ ទាំងមិនធ្លាប់លែងលះជាមួយប្រពន្ធម្នាក់ណាសោះ។

យោងតាម Guinness World Records លោក Giovanni Vigliotto ធ្លាប់បានរៀបការជាមួយនឹងស្រ្តីពី ២៧រដ្ឋក្នុងសហរដ្ឋអាមេរិក និងស្រ្តីពី ១៤ប្រទេសផ្សេងទៀត ដោយម្ដងៗលោកបានប្រើប្រាស់ឈ្មោះផ្សេងៗគ្នា ធ្វើឱ្យគ្មានប្រពន្ធរូបណាទេដែលស្គាល់អត្តសញ្ញាណពិតរបស់លោក។ សូម្បីតែ Giovanni Vigliotto ក៏មិនមែនជាឈ្មោះពិតរបស់បុរសរូបនេះដែរ តែគឺជាឈ្មោះចុងក្រោយបង្អស់មុននឹងប៉ូលិសអាចចាប់ខ្លួនបាន។
ជាក់ស្ដែង វិធីសាស្រ្តបោកប្រាស់ដែលលោកប្រើប្រាស់នោះ គឺទៅស្វែងរកជនរងគ្រោះនៅតាមផ្សារ ហើយជារឿយៗគាត់នឹងសុំនារីរូបនោះរៀបការនៅថ្ងៃណាត់ជួបគ្នាដំបូងតែម្ដង។ មិនយូរប៉ុន្មានបន្ទាប់ពីរៀបការ Vigliotto នឹងប្រាប់ប្រពន្ធថា ពួកគេត្រូវផ្លាស់ប្ដូរទីលំនៅ រួចឱ្យប្រពន្ធរើទ្រព្យសម្បត្តិទាំងអស់ទៅដាក់លើឡាន មុននឹងលោកឆបោកយកទ្រព្យទាំងនេះ ដោយបើកឡានរត់គេច។
ក្រោយពីបានទ្រព្យសម្បត្តិទាំងអស់ហើយ លោកក៏យករបស់ទាំងនោះទៅលក់នៅតាមផ្សារ ហើយជារឿយៗគាត់បានជួបនឹងជនរងគ្រោះថ្មីនៅទីនោះទៀត។ បើទោះបីជាកន្លងមក ធ្លាប់មានការប្ដឹងផ្ដល់ដែរ តែលោកតែងតែអាចរត់គេចបាន ជាមួយនឹងឈ្មោះថ្មីជាប្រចាំ។

យ៉ាងណាមិញ ជនរងគ្រោះដែលជាប្រពន្ធបន្ទាប់ចុងក្រោយបង្អស់ គឺ Sharon Clark បានសម្រេចចិត្តមិនពឹងពាក់លើប៉ូលិសតែម្ខាងទេ តែគាត់បានចេញស៊ើបអង្កេតដោយខ្លួនឯង រហូតចាប់ខ្លួន Giovanni Vigliotto បាននៅក្នុងថ្ងៃទី២៨ ខែធ្នូ ឆ្នាំ ១៩៨១ ឯរដ្ឋ Florida។
Sharon Clark បានប្ដឹង Giovanni Vigliotto ពីបទផិតក្បត់ និងឆបោក ព្រោះតែលោកបានរៀបការជាមួយនឹង Patricia Ann Gardiner ក្នុងខែវិច្ឆិកា ឆ្នាំ ១៩៨១ ទាំងដែលមិនទាន់បានលែងលះជាមួយខ្លួនដាច់ស្រេចនៅឡើយ។
ផ្អែកតាមកិច្ចសម្ភាសន៍ជាមួយនឹងអ្នកកាសែត Tom Fitzpatrick នៅពេលដែល Giovanni Vigliotto កំពុងជាប់ឃុំមុនការកាត់ក្ដីមួយឆ្នាំ លោក Vigliotto និយាយថា លោកមិនបានបោកនរណាទេ មានតែស្រីៗទាំងនោះទេជាអ្នកសុំខ្លួនរៀបការ ក៏ព្រោះតែលោកគឺជាសុភាពបុរសដែលពូកែមើលថែមនុស្សស្រី។

លុះមកដល់សវនាការលើដំបូងដែលធ្វើឡើងនៅក្នុងខែមករា ឆ្នាំ ១៩៨៣ Vigliotto ស្ថិតនៅក្នុងវ័យ ៥៣ឆ្នាំ បានអះអាងថា ខ្លួនមានឈ្មោះពិតថា Nikolai Peruskov កើតនៅក្នុងប្រទេសអ៊ីតាលី ប៉ុន្តែតុលាការបានជឿជាក់ថា លោកមានឈ្មោះពិតថា Fred Jipp កើតនៅក្នុងទីក្រុងញូវយ៉ក។
យ៉ាងណាមិញ មកដល់ខែមីនា ឆ្នាំ១៩៨៣ តុលាការបានរកឃើញថា Giovanni Vigliotto ពិតជាបានជាប់ទោសចំនួន ៣៤ករណី រួមមានការផិតក្បត់ និងការឆបោក ដោយកាត់ទោសឱ្យលោកជាប់ពន្ធនាគារចំនួន ៣៤ឆ្នាំ និងពិន័យជាទឹកប្រាក់ចំនួន ៣៣៦ ០០០ ដុល្លារអាមេរិក។
នៅគ្រាចុងក្រោយនៃជីវិត Giovanni Vigliotto បានបាត់បង់ជីវិតនៅក្នុងឆ្នាំ ១៩៩១ នៅអាយុ ៦១ឆ្នាំ ឯពន្ធនាគាររដ្ឋ Arizona ដោយសារជំងឺដាច់សរសៃឈាមខួរក្បាល៕

























Account
Security
Favourite Content