ស្របពេលដែលសាច់អាំងនៅក្នុងប្រទេសចិនទទួលបានការពេញនិយមខ្លាំង រហូតបង្កើតបានជាអាជីវកម្មតម្លៃរាប់រយលានដុល្លារអាមេរិក សាកលវិទ្យាល័យ Yueyang គ្រោងបង្កើត “មជ្ឈមណ្ឌលស្រាវជ្រាវសាច់អាំង” ដំបូងបង្អស់របស់ប្រទេសចិន ជាមួយគោលបំណងបណ្ដុះបណ្ដាល អ្នកអាំងសាច់ជំនាញឱ្យបាន ១ពាន់នាក់ ក្នុងរយៈពេល ៣ឆ្នាំ។

យោងតាមសារព័ត៌មាន South China Morning Post សាកលវិទ្យាល័យដែលមានទីតាំងស្ថិតនៅក្នុងខេត្ត Hunan ភាគកណ្តាលនៃប្រទេសចិនមួយនេះ បានចុះហត្ថលេខាលើកិច្ចព្រមព្រៀងសហប្រតិបត្តិការ ជាមួយសមាគមសាច់អាំង Yueyang ដើម្បីរួមគ្នាបង្កើតវិទ្យាស្ថានស្រាវជ្រាវសាច់អាំង Yueyang ជាយុទ្ធសាស្រ្តបណ្ដុះបណ្ដាលវិជ្ជាជីវៈលើវិស័យម្ហូបអាហារតាមចិញ្វើមផ្លូវដ៏ពេញនិយមរបស់ប្រទេសចិន។
ក្នុងចក្ខុវិស័យបង្កើតអ្នកជំនាញខាងអាំងសាច់ឱ្យ ១ពាន់នាក់ ក្នុងរយៈពេល ៣ឆ្នាំ កម្មវិធីបណ្ដុះបណ្ដាលនេះគ្រោងនឹងទទួលសិស្សឱ្យចូលសិក្សាផ្នែកទ្រឹស្ដីរយៈពេល ២ឆ្នាំ ៦ខែ និងតម្រូវឱ្យចុះកម្មសិក្សាចំនួន ៦ខែទៀត។
ជាក់ស្ដែង កម្មវិធីសិក្សានេះ នឹងបើកទូលាយសម្រាប់សិស្សដែលមានកម្រិតសិក្សាថ្នាក់មធ្យមសិក្សា យុវជនដែលមិនបានចូលរៀន និងសម្រាប់អ្នកដែលប្រកបអាជីពផ្នែកនេះស្រាប់ ដែលចង់បង្កើនជំនាញរបស់ខ្លួនបន្ថែមទៀត។ យ៉ាងណាមិញ គម្រោងនេះកំពុងស្ថិតនៅក្នុងដំណាក់កាលរៀបចំផែនការនៅឡើយ ដោយត្រៀមបើកវគ្គសិក្សាជាផ្លូវការនៅឆ្នាំក្រោយនេះ។

គួរឱ្យដឹងផងដែរថា ម្ហូបអាហារប្រភេទសាច់អាំង គឺបានចាក់ឫសគល់យ៉ាងជ្រៅនៅក្នុងវប្បធម៌របស់ប្រទេសចិន ដោយកាលពីឆ្នាំ ២០២៤ កន្លងទៅ អាជីវកម្មសាច់អាំងរបស់ប្រទេសចិនអាចរកចំណូលបានដល់ទៅ ៤២១.៩ លានដុល្លារអាមេរិក។ ទន្ទឹមគ្នានេះ Grand View Research ក៏បានសន្និដ្ឋានដែរថា ប្រាក់ចំណូលពីអាជីវកម្មនេះអាចនឹងហក់ឡើងដល់ ៦០៦.៥ លានដុល្លារអាមេរិក នៅក្នុងឆ្នាំ ២០៣០។
ទីក្រុង Yueyang គឺជាទីតាំងប្រវត្តិសាស្រ្តដ៏សម្បូរបែប ជាពិសេសគឺវប្បធម៌ទទួលទានសាច់អាំងនេះតែម្ដង។ ជាក់ស្ដែង ទីក្រុងស្ថិតនៅក្នុងខេត្ត Hunan មួយនេះ មានទីតាំងលក់សាច់អាំងប្រមាណ ២ ពាន់កន្លែង បង្កើតការងារបានចំនួន ៥ម៉ឺនកន្លែង ជាមួយនឹងប្រាក់ចំណូលប្រចាំឆ្នាំប្រមាណ ២ពាន់លានយន់ ឬ ២៨០លានដុល្លារអាមេរិក៕


























Account
Security
Favourite Content