ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
មុននឹងក្លាយជាសត្វចិញ្ចឹមសំណព្វចិត្តរបស់មនុស្សជាច្រើននាក់ដូចពេលបច្ចុប្បន្ននេះ សត្វឆ្មាមានប្រវត្តិចាក់ជ្រៅក្នុងប្រវត្តិសាស្រ្តមនុស្សជាតិ រួមដំណើរក្នុងវិវឌ្ឍនាការនៃវិស័យកសិកម្ម ជំនឿ និងជីវិតរស់នៅប្រចាំថ្ងៃ។
យោងតាមរកឃើញសំណាកគ្រោងឆ្អឹងសត្វឆ្មាកប់ជាមួយនឹងមនុស្សលើកោះ Cyprus កាលពីឆ្នាំ ១៩៨៣ លោកបណ្ឌិត Andrew Kitchener អ្នកជំនាញសត្វនៅសារមន្ទីរជាតិនៃប្រទេសស្កុតឡេន បានធ្វើសេចក្ដីសន្និដ្ឋានថា សត្វឆ្មាអាចនឹងមានទំនាក់ទំនងជាមួយមនុស្សមិនតិចជាង ៩៥០០ឆ្នាំមុនគ្រិស្តសករាជនោះទេ។
លោកបណ្ឌិតបានអះអាងថា ការរកឃើញរបស់បុរាណវត្ថុវិទូ Alain le Brun នៅគ្រានេះ គឺពិតជាសំខាន់ និងជាអំណះអំណាងថា មនុស្សបានយកសត្វឆ្មាមកចិញ្ចឹមយូរណាស់មកហើយ ព្រោះដើមឡើយសត្វឆ្មាមិនមានវត្តមាននៅលើកោះ Cyprus នោះទេ។ ដូច្នេះ គ្រោងឆ្អឹងនេះ បានបញ្ជាក់ថា មនុស្សបានចិញ្ចឹមសត្វឆ្មា និងយកវាមករស់នៅលើកោះនេះតាមរយៈការធ្វើដំណើរតាមទូក ឬកប៉ាល់។
កាលពីជាង ១ម៉ឺនឆ្នាំមុន មនុស្សទើបតែបានចាប់ផ្ដើមចេញធ្វើស្រែចម្ការ និងតាំងទីលំនៅ ហើយជង្រុករក្សាគ្រាប់ពូជក៏ក្លាយជាឃ្លាំងចំណីរបស់ពពួកសត្វកកេរ ដូចជាសត្វកណ្ដុរជាដើម។ ទើបនេះក្លាយជាដើមហេតុដំបូង នៃការយកសត្វឆ្មាមកចិញ្ចឹមក្នុងប្រវត្តិសាស្រ្តមនុស្សជាតិ។
ការចុះផ្សាយរបស់ទស្សនាវដ្ដីស្រាវជ្រាវ Science បានឱ្យដឹងថា សត្វឆ្មាដែលមនុស្សយកមកចិញ្ចឹមនៅគ្រានោះ និងជាបុព្វបុរសដើមរបស់សត្វឆ្មានៅតាមផ្ទះ ក្នុងពេលបច្ចុប្បន្ននេះ គឺជាប្រភេទសត្វឆ្មាព្រៃ Felis Silverstris ដោយដើមឡើយ មនុស្សមិនបានចាត់ទុកជាសត្វចិញ្ចឹមដូចសត្វថ្ងៃទេ តែគឺចិញ្ចឹមដើម្បីទាញយកប្រយោជន៍ឱ្យសត្វឆ្មាតាមចាប់កណ្ដុរដែលបំផ្លាញផលដំណាំរបស់ខ្លួន។
យ៉ាងណាមិញ នៅផ្នែកផ្សេងគ្នានៃពិភពលោក មនុស្សចិញ្ចឹមសត្វឆ្មាក្នុងអត្ថន័យផ្សេងគ្នា។ ទោះបីជាភស្តុតាងដំបូងបំផុតមានមូលដ្ឋាននៅបូព៌ាកណ្ដាលក្ដី តែអរិយធម៌អេហ្ស៊ីបបុរាណកាលពីជាង ៤០០ឆ្នាំមុនគ្រិស្តសករាជ គឺជាសង្គមដែលមានការចញ្ចឹមសត្វឆ្មាទូលំទូលាយ និងលេចធ្លោបំផុតនៅក្នុងប្រវត្តិសាស្រ្ត។
អត្ថបទពី World History បានរៀបរាប់ថា នៅក្នុងអរិយធម៌អេហ្ស៊ីបបុរាណ សត្វឆ្មាមិនមែនគ្រាន់តែជាសត្វចិញ្ចឹមដើម្បីចាប់សត្វកណ្ដុរទេ តែឆ្មាគឺជាតំណាងនៃអាទិទេព Bastet ទើបប្រជាជនអេហ្ស៊ីបគោរពសត្វឆ្មា និងផ្ដល់តម្លៃជាងជីវិតមនុស្ស និងទ្រព្យសម្បត្តិផ្ទាល់ខ្លួនទៅទៀត។
ក្នុងករណីដែលបុគ្គលណាហ៊ានធ្វើបាប ឬសម្លាប់សត្វឆ្មា បុគ្គលនោះនឹងទទួលទោសតាមកម្រិត ដល់ថ្នាក់ប្រហារជីវិតក៏មាន។ ខណៈពេលដែលមានឆ្មាស្លាប់ ម្ចាស់ឆ្មាទាំងអស់នឹងត្រូវកោររោមចិញ្ចើមដើម្បីកាន់ទុក្ខ និងនាំយកសាកសពទៅធ្វើជាម៉ាំមី ឱ្យស័ក្តិសមទៅនឹងឈ្មោះជាសត្វតំណាងឱ្យអាទិទេព។
ជារួម ប្រវត្តិនៃការចិញ្ចឹមសត្វឆ្នាំបានចាប់ផ្ដើមដំបូងឡើយក្នុងគោលបំណងពឹងពាក់ផលប្រយោជន៍គ្នាទៅវិញទៅមក រហូតក្លាយជាសត្វដែលជនជាតិអេហ្ស៊ីបបុរាណបានគោរពជាសត្វតំណាងអាទិទេព មុននឹងវប្បធម៌នៃការចិញ្ចឹមកាន់តែទូលំទូលាយជាងមុន តាមរយៈការធ្វើពាណិជ្ជកម្មតាមកប៉ាល់ ក្លាយជាសត្វចិញ្ចឹមដ៏ពេញនិយមដូចពេលសព្វថ្ងៃនេះ៕
Account
Security
Favourite Content