តារាចម្រៀងកូរ៉េខាងត្បូង G-DRAGON បាននិយាយពីការលំបាកខ្លះៗក្នុងការបង្កើតបទចម្រៀងថ្មីៗ ខណៈដែលលោកបានឃ្លាតឆ្ងាយពីវិស័យចម្រៀងអស់រយៈពេល ៧ ឆ្នាំ៤ ខែ។
ចូលរួមក្នុងកម្មវិធីវិទ្យុ Kim Eana’s Starry Night កាលពីពេលថ្មីៗ តារាវ័យ ៣៦ ឆ្នាំដែលទើបចេញបទថ្មីមានចំណងជើងថា “Power” ក៏បាននិយាយ អំពីបញ្ហាប្រឈមក្នុងការនិពន្ធចម្រៀងបន្ទាប់ពីលោកសម្រាកយូរខ្លាំងពេក។
នៅពេលសួរថាលោកត្រូវចំណាយពេលប៉ុន្មានដើម្បីនិពន្ធបទចម្រៀង G-DRAGON ឆ្លើយថា ជាធម្មតាលោកអាចបញ្ចប់ការនិពន្ធចម្រៀងយ៉ាងឆាប់រហ័ស ប៉ុន្តែសម្រាប់បទនេះគឺមិនអាចលឿនបែបហ្នឹងនោះទេ ដោយសារតែចង្វាក់បទនេះមានលក្ខណៈ Unique ខ្លាំង ដូច្នេះលោកត្រូវប្រាកដថា ទំនុកចម្រៀងពិតជាមានអត្ថន័យនិងបង្កប់សារដល់អ្នកស្ដាប់ ជាហេតុត្រូវចំណាយពេលយូរជាងមុន។ ពិធីការិនី Kim Eana ដែលជាអ្នកនិពន្ធបទចម្រៀងមួយរូបដែរបានសរសើរពីសមត្ថភាពនៃការលេងពាក្យពេចន៍ និងបង្កើតបទភ្លេងដ៏ល្អឥតខ្ចោះរបស់ G-DRAGON និងបានសរសើរលោកថាជាអ្នកបង្កើត Trend ដែលមិនមាននរណាម្នាក់អាចធ្វើបាន។
និយាយពីអារម្មណ៍ខុសប្លែកនៃការ Comeback លើកនេះ G-DRAGON បានចែករំលែកទាំងអស់សំណើចថា “ទាំងផ្លូវចិត្តនិងផ្លូវកាយគឺខុសប្លែកពីមុនច្រើន។ លោកធ្លាប់តែរៀនក្បាច់រាំបានលឿន ប៉ុន្តែមកលើកនេះលោកមានអារម្មណ៍ថាតាមលែងទាន់ មានអារម្មណ៍ថារាងកាយលែងលោកឆ្លើយតបរហ័សដូចមុនហើយ។
គួរបញ្ជាក់ដែរថា កាលពីចុងសប្ដាហ៍កន្លងទៅនេះ G-DRAGON ទើបតែសាងភាពភ្ញាក់ផ្អើលលើឆាកពានរង្វាន់ MAMA ឆ្នាំ២០២៤ ជាមួយការសម្ដែងបទថ្មី រួមទាំងបទចាស់ៗរបស់ខ្លួនជាមួយសមាជិកក្រុម BIGBANG ខណៈបានឈ្នះពានរង្វាន់កិត្តិយសផ្នែក “ទស្សនវិស័យឆ្នើមក្នុងវិស័យតន្ត្រី” (Music Visionary of the Year) ៕