ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
មិនថាស្នេហាត្រូវបានបង្កើតឡើង ឬរលត់បាត់ទៅវិញទេ បើមានពាក្យថា “ស្នេហា” ហើយវាគឺជាការចងចាំដែលស្រស់ស្អាតជានិច្ច។ ប៉ុន្តែពេលខ្លះ ដោយសារតែអនុស្សាវរីយ៍ដ៏ស្រស់ស្អាត និងភាពផ្អែមល្ហែមនៃសេចក្តីស្រឡាញ់នេះហើយ ប្រៀបដូចជាអាវុធមុខពីរ បណ្តាលឱ្យមនុស្សជាច្រើនធ្លាក់ចូលក្នុងអន្លង់របស់វា នោះគឺការនឹក “អ្នកចាស់”។ ប៉ុន្តែជឿចុះថា គ្មាននរណាចង់ក្លាយជាសង្សារចាស់ទេ តែបើជ្រុលទៅហើយ ស្នេហាយើងក៏បានបញ្ចប់ មានតែត្រូវបើកចិត្ត និងរស់នៅក្នុងបច្ចុប្បន្នកាលឱ្យបាន។ ប៉ុន្តែក៏នៅមានមនុស្សជាច្រើនទៀត ដែលមិនអាចភ្លេចស្នេហាចាស់បាន ព្រោះកំពុងលិចលង់ក្នុងភាពស្រស់ត្រកាល និងភាពផ្អែមល្ហែមកន្លងមក។ ហើយមនុស្សបែបនេះ គួរធ្វើបែបណាល្អទៅ?
១. ចៀសវាងទៅកន្លែងដែលធ្លាប់មានអនុស្សាវរីយ៍ជាមួយគ្នា
គ្រប់គូសុទ្ធតែមានកន្លែងអនុស្សាវរីយ៍ស្នេហាជាមួយគ្នាជានិច្ច មិនថាកន្លែងចាប់ដៃគ្នាលើកដំបូង ថើបថ្ពាល់ ឱប ឬណាត់ជួបគ្នាលើកដំបូង។ ដូច្នេះ បើនៅមិនទាន់ភ្លេចអ្នកចាស់បានទេ កុំទៅកន្លែងទាំងនោះអី។ យ៉ាងហោចណាស់ក៏មិនធ្វើឱ្យអនុស្សាវរីយ៍ចាស់ៗត្រឡប់ទៅចងចាំម្តងទៀតដែរ។ រឿងមួយទៀត ដែលអ្នកគួរឆ្លងផុតឱ្យបានគឺ ភាពឯកោ និងភាពអាឡោះអាល័យ។ នោះអ្នកនឹងក្លាយទៅជាមនុស្សដើមវិញ ឬអាចផ្លាស់ប្តូរទៅជាមនុស្សថ្មីដែលល្អប្រសើរផង។
២. ធ្វើខ្លួនឱ្យរវល់
តើអ្នកធ្លាប់ទេ ពេលមានអ្វីធ្វើ ចិត្តរបស់យើងក៏ភ្លេចរឿងរ៉ាវផ្សេងៗដោយមិនដឹងខ្លួន។ តែឱ្យតែពេលទំនេរ ចេះតែគិតរវើរវាយ រឿងចាស់ៗរត់ចូលក្នុងការចងចាំម្តងទៀត។ ហើយរឿងមួយដែលមិនអាចឈប់គិតបាន គឺមនុស្សដែលធ្លាប់ស្រឡាញ់។ ដូច្នេះគួររកអ្វីធ្វើកំដរការអផ្សុក ធ្វើអ្វីដែលខ្លួនឯងចូលចិត្ត ឬរៀនអ្វីថ្មីៗ។ ពេលធ្វើទៅយ៉ាងហោចណាស់ក៏ផ្តល់ប្រយោជន៍ដល់ខ្លួនយើងមិនតិច ក៏ច្រើនដែរ។ ប៉ុន្តែមានរឿងមួយទៀតដែលយើងចង់ណែនាំជាពិសេស នោះគឺការហាត់ប្រាណ។ ក្រៅពីកំដរការអផ្សុកហើយ អ្នកនឹងមានសុខភាពល្អ មានរាងកាយមាំមួន។ ម្យ៉ាងវិញទៀត គួរប្តូរពីការស្រឡាញ់អ្នកដទៃ ហើយងាកមកស្រឡាញ់ខ្លួនឯងវិញ។
៣. បើតប់ប្រមល់ ក៏និយាយរំសាយចេញខ្លះ
អនុស្សាវរីយ៍ទាំងឡាយមិនថាល្អ ឬអាក្រក់ បើបៀមទុកតែម្នាក់ឯង កាន់តែធ្វើឱ្យអត់សប្បាយចិត្ត ឬធុញថប់លើសដើម។ ប្រសិនបើអ្នកមានមិត្តជិតស្និទ្ធដែលអាចទុកចិត្តបាន គួរនិយាយរៀបរាប់ឱ្យគេស្តាប់ ហើយអ្នកនឹងទទួលបានកម្លាំងចិត្តមកវិញ។ ទោះបីគេមិនអាចជួយបានទាំងស្រុង យ៉ាងហោចណាស់ក៏គេបើកចិត្តស្តាប់ពីទុក្ខសោករបស់យើងបាន។ ពេលនិយាយហើយអ្នកនឹងធូរស្រាលចិត្ត ហើយគិតថានេះគ្រាន់តែជាបញ្ហាតូចតាចប៉ុណ្ណោះ។ មានមនុស្សតែម្នាក់ដែលមិនស្រឡាញ់យើងហើយចាកចេញទៅ ប៉ុន្តែនៅមានមនុស្សច្រើននាក់ទៀតដែលស្រឡាញ់និងយល់ពីយើង។
៤. បើកបេះដូងម្តងទៀត
គ្មានហេតុផលអ្វីដែលត្រូវមកអង្គុយឱបទុក្ខសោក បាក់ទឹកចិត្ត លិចលង់ជាមួយស្នេហាចាស់ឡើយ។ ព្រោះជីវិតរបស់យើងត្រូវបន្តដំណើរទៅមុខទៀត។ ពេលបែកគ្នាហើយ យើងក៏អាចមានថ្មីបានទៀត តែកុំប្រើនរណាម្នាក់ជាឧបករណ៍ដើម្បីជួយអ្នកបំភ្លេចស្នេហ៍ចាស់ឱ្យសោះ។ ព្រោះក្តីស្រឡាញ់ និងការអាណិតមិនអាចនៅជាមួយគ្នាបានទេ។ ត្រូវស្រឡាញ់នរណាម្នាក់ចេញពីចិត្ត មិនមែនស្រឡាញ់ដើម្បីបំភ្លេចអ្នកចាស់ទេ។
៥. ធ្វើដំណើរកម្សាន្ត
ការចេញទៅដើរលេងនៅខាងក្រៅ ជាវិធីសាស្រ្តដែលល្អបំផុត និងត្រូវបានណែនាំច្រើនបំផុត។ ព្រោះតាមបទពិសោធន៍ជាក់ស្តែង វិធីនេះអាចធ្វើឱ្យបេះដូងដែលធ្លាប់រវើរវាយ ត្រឡប់មកស្រស់បំព្រងបានម្តងទៀត។ ជាការពិតណាស់ ក្រៅពីរីករាយនឹងទេសភាពហើយ មិត្តភ័ក្ដិថ្មី បទពិសោធន៍ថ្មីៗ ជាអ្វីដែលអ្នកនឹងទទួលបានមកវិញ។ ពេលត្រឡប់មកពីដើរលេងវិញ យើងនឹងមានការគិតដែលធំទូលាយជាងមុន សម្លឹងបានឆ្ងាយ។ ហើយអ្នកនឹងដឹងច្បាស់ថាការនៅម្នាក់ឯងមិនមែនជារឿងអាក្រក់អីណាស់ណាទេ៕
Account
Security
Favourite Content