ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
រឿងរ៉ាវដ៏ស្រស់បំព្រងព្រមជាមួយកំណាព្យជីវិតទាំង ៤ រដូវកាលនៃរឿងភាគ When Life Gives You Tangerines បានបញ្ចប់ទៅជាមួយភាពក្ដុកក្ដួលរំជួលចិត្ត និងស្នាមញញឹមរបស់អ្នកទស្សនាយ៉ាងច្រើន ហើយជឿថារឿងនេះនឹងក្លាយជាស្នាដៃមួយដែលនឹងដក់ជាប់ក្នុងចិត្តទស្សនិកជនយូរតទៅមុខទៀត។ ដូច្នេះហើយ ប្រសិនបើប្រិយមិត្តរូបណានៅតែមិនទាន់ Move on ពីរឿងភាគនេះបាន ហើយមិនដឹងថាត្រូវមើលរឿងអ្វីបន្តទៀតនោះ AMS សូមណែណាំរឿងភាគចំនួន ៥ ដែលមាន Mood ស្រដៀងៗគ្នា ព្រមទាំងជាស្នាដៃរបស់តួឯកប្រុសស្រីទាំងពីររូប គឺ IU និង Park Bo Gum ដែលអ្នកមិនគួររំលង។
១. រឿង My Mister ឆ្នាំ ២០១៨
ក្នុងរឿង When Life Gives You Tangerines យើងបានឃើញ IU យំច្រើនជាង ៧០ ដង ទាំងពេលជា Ae Sun និងពេលជា Geum Young ហើយក្នុងការយំម្ដងៗសុទ្ធតែបង្កប់ដោយអារម្មណ៍ផ្សេងៗដែលធ្វើឱ្យអ្នកទស្សនាចូលតួតាម។ ប៉ុន្តែបើប៉ុណ្ណឹងមិនទាន់កម្សត់គ្រប់គ្រាន់ទេ អេតមីនសូមណែនាំរឿងមួយទៀតដែលនឹងធ្វើឱ្យគ្រប់គ្នាយំជាមួយ IU ម្ដងទៀត នោះគឺរឿងភាគ My Mister ជារឿងរ៉ាវរបស់យុវតីវ័យ២០ឆ្នាំម្នាក់ និងបុរសវ័យសែសិបឆ្នាំម្នាក់ដែលផ្លូវជីវិតមិនសូវមានអ្វីក្រៅពីភាពអាប់អួរ ត្រូវព្យាយាមតស៊ូដើម្បីរស់ជារៀងរាល់ថ្ងៃ។ នៅពេលមនុស្សខុសវ័យពីរនាក់កំពុងរងទុក្ខ និងអស់សង្ឃឹមដូចគ្នាបានជួបគ្នា ពួកគេក៏បានព្យាបាលចិត្តគ្នាទៅវិញទៅមក ព្រមទាំងបានឆ្លុះបញ្ចាំងពីភាពជាមនុស្សដែលត្រូវជួបទាំងក្ដីសុខ និងទុក្ខព្រួយបានយ៉ាងទន់ភ្លន់។ នេះជាស្នាដៃមួយទៀតដែល IU បានបង្ហាញថ្វីដៃសម្តែងយ៉ាងអស់ពីចិត្ត ដែលគ្រប់គ្នាគួរទស្សនាយ៉ាងហោចណាស់ម្តង។
២. រឿង Reply 1988 ឆ្នាំ ២០១៥
ខណៈដែលតួអង្គ Gwansik ត្រូវបានគេលើកឡើងថាជាប្ដីល្អ និងឪពុកល្អ ដែលតែងឈរក្បែរប្រពន្ធកូន តួអង្គមួយទៀតរបស់ Park Bo Gum ក៏បានក្លាយជាប្រធានបទក្តៅម្តងទៀតនោះគឺតួអង្គ Choi Taek ពីរឿង Reply 1988។ ទោះបីកន្លងទៅជាងដប់ឆ្នាំហើយក៏ដោយក៏ រឿងភាគនេះនៅតែអាចឆក់យកបេះដូងអ្នកគាំទ្របានមិនផ្លាស់ប្ដូរជាមួយនឹងការធ្វើដំណើរវិលត្រលប់ទៅកាន់អតីតកាលកាលពីឆ្នាំ ១៩៨៨ និងសាច់រឿងរំជួលចិត្តបែបមិត្តភាព គ្រួសារ ក្តីស្រមៃ ព្រមទាំងស្នេហាត្រីកោណដែលគ្រប់គ្នាពិបាកស្មានថាចុងក្រោយនឹងទៅជាយ៉ាងណា។ នៅក្នុងរឿងភាគនេះ Park Bo Gum បានដើរតួជាបុរសចិត្តស្មោះដែលឆក់យកបេះដូងអ្នកទស្សនាជាមួយនឹងភាពគួរឱ្យស្រលាញ់ និងការលះបង់អស់ពីខ្លួនរបស់គេចំពោះស្នេហា។
៣. រឿង Twenty-Five, Twenty-One ឆ្នាំ ២០២២
ចំណុចដ៏គួរឱ្យសរសើរមួយរបស់ភាពយន្តភាគ When Life Gives You Tangerines គឺការច្បិចយកព្រឹត្តិការណ៍ពិតនៅក្នុងប្រវត្តិសាស្ត្រដាក់បញ្ចូលក្នុងសាច់រឿងបានយ៉ាងល្អ។ ក្រៅពីធ្វើឱ្យអ្នកទស្សនាជាច្រើននាក់ដែលបានឆ្លងកាត់ព្រឹត្តិការណ៍ទាំងនោះងាយចូលតួតាមហើយ វាក៏ប្រៀបដូចជាកំណត់ត្រាសម្រាប់មនុស្សជំនាន់ថ្មីបានរៀនសូត្រផងដែរ។ ស្រដៀងគ្នាដែរ ក្នុងភាពយន្ត Twenty-Five, Twenty-One បានចាប់ផ្ដើមសាច់រឿងជាមួយនឹងតួអង្គវ័យជំទង់ដែលប្រឈមមុខនឹងការបរាជ័យផ្នែកសេដ្ឋកិច្ចនៃវិបត្តិ IMF។ ប្រសិនបើពួកគេមានសំណាង ពួកគេនឹងអាចដើរតាមសុបិន ឬប្រសិនបើសំណាងអាក្រក់គឺនឹងត្រូវបាត់បង់ទាំងសុបិន និងក្រុមគ្រួសារ។ ទោះបីជាចំណោទបញ្ហាហាក់ដូចជាធ្ងន់ធ្ងរបន្តិច ប៉ុន្តែរឿងភាគនេះក៏បានបង្ហាញធ្វើឱ្យអ្នកទស្សនារំភើបចិត្តជាមួយចំណងមិត្តភាព ការរីកចម្រើនក្នុងវ័យជំទង់ ការតស៊ូដើម្បីក្តីសុបិន អត្ថន័យពិតនៃជីវិត ក៏ដូចជាស្នេហាដំបូងដែលត្រូវបានចារទុកក្នុងបេះដូងជាយូរអង្វែង។
៤. រឿង When The Camellia Blooms ឆ្នាំ២០១៩
ចំណុចសំខាន់មួយដែលបានឆក់យកបេះដូងអ្នកទស្សនា When Life Gives You Tangerines តាំងពីវគ្គដំបូងគឺរឿងរ៉ាវរបស់ ‘ម្តាយ’ ដែលបានលះបង់ខ្លួនឯងដើម្បីជួយឱ្យកូនបានស្គាល់ភាពរីកចម្រើន។ ដូច្នេះហើយ រឿងភាគបន្ទាប់ដែលអេតមីនចង់ណែនាំក៏និយាយពីម្តាយដូចគ្នា មានចំណងជើងថា When The Camellia Blooms ជារឿងភាគដែលនាំអ្នកទស្សនាទៅស្វែងយល់ពីជីវិតម្តាយ Single Mom ដែលផ្លាស់ទៅបើកភោជនីយដ្ឋាន និងបារនៅក្នុងទីក្រុងតូចមួយ ក្រោយវង្វេងវង្វាន់ក្នុងរឿងស្នេហាស្ទើរមួយជីវិត។ ប៉ុន្តែសុខៗ ស្រាប់តែលេចមុខកំលោះដល់ទៅ ៣ នាក់ធ្វើឱ្យបេះដូងនាងលោតញាប់ ។ រឿងភាគនេះនឹងនាំយើងបានឃើញពីការធ្វើជា ‘ម្តាយដ៏ល្អឥតខ្ចោះ’ ដោយមិនបាច់មានឪពុក ហើយទន្ទឹមនឹងនោះ ទំនាក់ទំនងផ្សារភ្ជាប់រវាងប្រជាជននៅក្នុងភូមិក៏មានភាពកក់ក្តៅដូចគ្នា។ អាចនិយាយបានថានេះជារឿងមួយទៀតដែលនៅពេលមើលចប់ហើយ អ្នកនឹងចង់ត្រលប់ទៅឱបម្តាយឱ្យណែនៗ។
៥. រឿង Our Blues ឆ្នាំ២០២២
When Life Gives You Tangerines បានចាប់ផ្ដើមសាច់រឿងនៅលើកោះ Jeju ព័ទ្ធជុំវិញទៅដោយទិដ្ឋភាពសមុទ្រដ៏ស្រស់ស្អាត ដែលជឿថាអ្នកទស្សនាជាច្រើននឹងលង់ស្នេហ៍នឹងភាពទាក់ទាញនៃកោះតូចមួយនេះ។ ប្រសិនបើនៅតែចង់រីករាយជាមួយទេសភាពនៃកោះ Jeju បន្ថែមទៀត អ្នកអាចចូលទៅមើលរឿង Our Blues ដែលបានឆ្លុះបញ្ចាំងពីរឿងរ៉ាវមិនធម្មតារបស់អ្នករស់នៅលើកោះ មិនថាជារបៀបរស់នៅជិតស្និទ្ធនឹងធម្មជាតិ ការពឹងផ្អែកលើគ្នាទៅវិញទៅមក មុខរបរ Haenyeo ដែលប្រថុយជីវិតដោយការជ្រមុជទឹកចូលទៅក្នុងសមុទ្រដើម្បីចិញ្ចឹមខ្លួនឯង និងក្រុមគ្រួសារ ក៏ដូចជាភាពអយុត្តិធម៌ដែលធ្វើឱ្យមនុស្សជំនាន់ថ្មីត្រូវរកផ្លូវតស៊ូដើម្បីរីកចម្រើននៅក្នុងរាជធានីសេអ៊ូលវិញ ៕
Account
Security
Favourite Content