ជាដំណឹងដ៏ភ្ញាក់ផ្អើលមួយសម្រាប់អ្នកគាំទ្រ នៅពេលដឹងថាពិធីការិនីដ៏មានថ្វីមាត់ យុគ ចិន្តា ជិតចូលរោងការហើយ។ ប៉ុន្តែទាក់ទងនឹងព័ត៌មាននេះ គឺអ្នកនាង គង់ សុជាតិ ទេ ជាអ្នកទម្លាយឲ្យដឹង ក្នុងនាមជាមិត្តដ៏ជិតស្និទ្ធ ហើយពិធីករសាច់ចាំរូបនេះផ្ទាល់ក៏ជាអ្នកកំដរផងដែរ។
កាលពីប៉ុន្មានថ្ងៃមុនភរិយាលោក ជា វិបុល បានបង្ហោះរូបភាពជាមួយអ្នកនាង យុគ ចិន្តា ហើយបានសរសេររ៉ាយរ៉ាប់ថា “yeah … congratulations my friend យុគ ចិន្តា ជិត ការ ហើយ គង់ សុជាតិ ធ្វើ ជាអ្នកកំដរ”។ ព័ត៌មានដែលចេញពីមាត់អ្នកនាង គង់ សុជាតិ គឺអាចទុកចិត្តបានព្រោះថាអ្នកទាំងពីរ គឺជាមិត្តភ័ក្ដិដ៏ជិតដិត និងតែងតែនៅក្បែរគ្នាគ្រប់ពេលមិនថាមានសុខ ឬទុក្ខឡើយ។
ក្រោយឃើញអ្នកនាង គង់ សុជាតិ បង្ហើបរឿងនេះហើយមិត្តភ័ក្ដិអ្នកសិល្បៈជាច្រើនសម្ដែងការអបអរដល់អ្នកនាង យុគ ចិន្តា ព្រមទាំងជូនពរឲ្យពិធីការិនីដ៏មានទេពកោសល្យរូបនោះ ជួបតែសុភមង្គល។ ទោះជាយ៉ាងណាអ្នកគាំទ្រនៅរង់ចាំដំណឹងច្បាស់ការពីសាមីខ្លួនផ្ទាល់។
កាលពីអំឡុងឆ្នាំមុន អ្នកនាង យុគ ចិន្តា ធ្លាប់បានប្រកាសថា នឹងចូលរោងការនៅថ្ងៃទី ២៣ ខែ មីនា ឆ្នាំ ២០២២ ដោយអ្នកនាងបានកក់សម្អាងការ ផ្កាភ្ញី និងចុងភៅ រួចរាល់ហើយ ប៉ុន្តែពេលវេលាកំណត់បានមកដល់ ពុំទាន់ឃើញអ្នកនាងដឹកដៃគូស្នេហ៍ចូលរោងការទៅវិញ៕