បុរសឯក វន សិលា ម្ចាស់ជយលាភី Mister Supranational Cambodia 2023 បានកំពុងត្រៀមដឹកដៃបវរកញ្ញារូបស្រស់ លីវ ជីលី Miss Supranational Cambodia 2023 តំណាងឱ្យកម្ពុជាចេញទៅប្រកួតកម្មវិធី Mister & Miss Supranational 2023 នៅប្រទេសហុល្លង់នៅថ្ងៃ ២ ខែកក្កដា ឆ្នាំ ២០២៣ ខាងមុខនេះ។


បុរសឯករូបសង្ហានេះទម្លាយឱ្យដឹងថា មែនទែនទៅមុនពេលដណ្តើមបានជយលាភី Mister Supranational Cambodia 2023 លោកធ្លាប់ប្រកួតកម្មវិធីបុរសឯកម្តងរួចមកហើយ គឺកម្មវិធី Mister Cambodia កាលឆ្នាំ ២០១៩ ដោយកាលនោះលោកបានជាប់ជាម្ចាស់ជយលាភី Mister Cambodia 2019 ត្រៀមតំណាងឱ្យកម្ពុជាចេញទៅប្រកួតនៅអន្តរជាតិ។ ប៉ុន្តែជាអកុសលលោកមិនមានឱកាសតំណាងឱ្យកម្ពុជាចេញទៅប្រកួតនៅឆាកអន្តរជាតិឡើយ ព្រោះពេលនោះពិភពលោកកើតមានវិបត្តិជំងឺកូវីដ-១៩។

ដោយសារតែបំណងប្រាថ្នាចង់តំណាងកម្ពុជាលើឆាកអន្តរជាតិមិនទាន់បានសម្រេច ទើបកំលោះសង្ហានេះ សម្រេចចិត្តដាក់ពាក្យចូលប្រកួតប្រជែងកម្មវិធី Mister Supranational Cambodia 2023 ម្តងទៀត ហើយប្រឹងប្រែងរហូតដណ្តើមបានជយលាភីជា Mister Supranational Cambodia 2023 និងមានឱកាសតំណាងឱ្យជាតិកម្ពុជាចេញទៅប្រកួតនៅអន្តរជាតិ ដូចក្តីប្រាថ្នារបស់លោក។
ផ្តល់កិច្ចសម្ភាសន៍ក្នុងកម្មវិធីសិល្បៈមួយកាលពីពេលថ្មីៗ វន សិលា ថា សម្រាប់លោកគឺចង់តំណាងជាតិលើឆាកអន្តរជាតិឱ្យបានម្តងក្នុងឆាកជីវិត ហើយពេលនេះបំណងប្រាថ្នារបស់លោកជិតបានសម្រេចហើយ ដូច្នេះលោកមិនឱ្យរបូតឱកាសនេះដូចកាលឆ្នាំ២០១៩នោះឡើយ។

ក្រឡេកការត្រៀមខ្លួនវិញ ពេលនេះលោកកំពុងត្រៀមបណ្តើរៗហើយ និងព្យាយាមពង្រឹងចំណុចខ្លះ ដែលមើលគិតថាជាចំណុចខ្វះខាតរបស់ខ្លួនឯង។ បន្ថែមពីលើនោះ លោកក៏ព្យាយាមសិក្សាស្រាវជ្រាវបន្ថែមពីការប្រកួត ទាំងការប្រកួតបុរស និងនារី ដើម្បីបានជាចំណេះដឹងបន្ថែមផ្សេងៗ ទុកជាប្រយោជន៍សម្រាប់ការប្រកួត ព្រោះការប្រកួតនីមួយៗខុសៗគ្នា។ សម្រាប់ការប្រកួតឆ្នាំនេះ វន សិលា មិនឱ្យខ្វះចន្លោះដូចឆ្នាំមុនឡើយ ដោយលោកបានធ្វើតាមតម្រូវការក្នុង Hand book ដែលស្ថាប័នរៀបចំការប្រកួតអន្តរជាតិផ្តល់ឱ្យគ្រប់យ៉ាង ដូចជា វីដេអូណែនាំខ្លួន រូបថត និងវីដេអូផ្សេងៗទៀតដែលខាងគេត្រូវការ។
ដោយសារនេះជាលើកទី១ ដែលលោកមានឱកាសបានតំណាងឱ្យកម្ពុជាលើឆាកអន្តរជាតិ កូនអ្នកខេត្តពោធិ៍សាត់នេះ មានអារម្មណ៍ថា ភ័យ ហើយលោកគិតថានេះជាភាពទទួលខុសត្រូវដ៏ធំមួយសម្រាប់លោក ព្រោះបើធ្វើមិនបានល្អអាចនឹងត្រូវរងការស្តីបន្ទោសពីពុកម៉ែបងប្អូន តែយ៉ាងណាលោកព្យាយាមឱ្យអស់ពីសមត្ថភាព៕























Account
Security
Favourite Content