តារាចម្រៀងស្រីកូរ៉េ Ailee នឹងរៀបចំពិធីមង្គលការជាមួយគូស្នេហ៍គឺតារាប្រុស Choi Si-hun ដែលជាអតីតអ្នកចូលរួមកម្មវិធី “Single’s Inferno” របស់ Netflix នៅខែមេសា ឆ្នាំ២០២៥ខាងមុខ។

ទីភ្នាក់ងាររបស់ Ailee គឺក្រុមហ៊ុន A2Z Entertainment បានឱ្យដឹងនៅថ្ងៃអង្គារនេះថា៖ “អ្នកទាំងពីរបានជួបគ្នាតាមរយៈអ្នកស្គាល់គ្នា និងបានចាប់ផ្ដើមទំនាក់ទំនងរយៈពេលមួយឆ្នាំហើយចាប់តាំងពីពេលនោះមក។ ពួកគេបានសន្យាកាលពីខែឧសភាថានឹងរៀបការដោយផ្អែកលើការជឿជាក់ និងក្តីស្រឡាញ់យ៉ាងជ្រាលជ្រៅដែលពួកគេមានចំពោះគ្នាទៅវិញទៅមក” ។

​តាម​រយៈទំព័រ​ហ្វេស​ប៊ុក​របស់ខ្លួន Ailee ក៏​បាន​ចែក​រំលែកពី​ក្ដី​ស្រឡាញ់​របស់​នាង​ចំពោះ​អនាគតស្វាមីនៅថ្ងៃជាមួយគ្នានេះ​ដែរថា​៖ ”ខ្ញុំ​បាន​ជួបហើយ ​អ្នក​ដែលអាចឱ្យខ្ញុំផ្អែកស្មាបាន។ ខ្ញុំចង់ចំណាយពេលពេញមួយជីវិតជាមួយនឹងចិត្តសប្បុរសរបស់គាត់”។

គួររំឭកថា តារាស្រីវ័យ ៣៥ ឆ្នាំរូបនេះបានប្រកាស​ដំណឹង​រៀប​ការ​របស់ខ្លួន​ជា​លើក​ដំបូង​កាលពីខែ​មីនា បន្ទាប់​ពី​ប្រព័ន្ធ​ផ្សព្វផ្សាយ​ក្នុង​ស្រុក​បាន​រាយការណ៍​ថារូប​នាង​កំពុង​មាន​ទំនាក់ទំនង​ជាមួយ​អ្នក​ជំនួញ​ល្បី​ឈ្មោះ​ម្នាក់។

មានកំណើតនៅទឺកដីអាមេរិក ប៉ុន្តែ Ailee បានបង្ហាញខ្លួនជាតារាចម្រៀងលើកដំបូងក្នុងប្រទេសកូរ៉េនៅឆ្នាំ ២០១២ ជាមួយនឹងបទចម្រៀង “Heaven” ហើយក៏បានចេញបទល្បីៗជាច្រើនបន្តបន្ទាប់ទៀតរួមមានបទ “I Will Show You” នៅឆ្នាំ២០១២, បទ “Singing Got Better” នៅឆ្នាំ២០១៤ និងបទ “I Will Go to You Like the First Snow” កាលពីឆ្នាំ២០១៧ ជាដើម។ ​បទ​ចម្រៀង​ថ្មី​បំផុត​របស់​នាង​គឺ​បទ “Ra Ta Ta” ដែលបានចេញក្នុង​ខែ​តុលា​ឆ្នាំ​មុន។

ដោយឡែកតារាប្រុសវ័យ ៣២ ឆ្នាំ Choi Si-hun បន្ទាប់ពីបានចូលរួមនៅក្នុងកម្មវិធី “Single’s Inferno” ក្នុងឆ្នាំ ២០២១ មក លោកបានចាប់ផ្តើមអាជីវកម្មផ្ទាល់ខ្លួនផ្នែកអាហារ និងភេសជ្ជៈ។ នេះបើផ្អែកតាមការចុះផ្សាយរបស់សារព័ត៌មានកូរ៉េ Yonhap ៕