លោក Om Akkaphan តារាសម្ដែងលំដាប់តួឯកល្បីរបស់ថៃប្រចាំប៉ុស្តិ៍លេខ៧ បានបាត់បង់ជីវិតដោយរោគមហារីកបេះដូង។

កាលពីថ្ងៃអាទិត្យ ទី២២ ខែកញ្ញានេះ អ្នកគាំទ្រមិនថាក្នុងស្រុក និងក្រៅស្រុកដែលនិយមទស្សនាភាពយន្តភាគថ្ងៃបានទទួលដំណឹងដ៏សោកសៅ ក្រោយពីទំព័រហ្វេសប៊ុក Ch7HD បានជូនដំណឹងពីការលាចាករបស់តារាសម្ដែង លោក Om Akkaphan។
តារាសម្ដែងវ័យ ៣៩ឆ្នាំរូបនេះ បានតស៊ូជាមួយនឹងជំងឺមហារីកសាច់ដុំបេះដូងតាំងតែពីខែវិច្ឆិកា ឆ្នាំ២០២២ មកម្ល៉េះ និងបានឆ្លងកាត់ការវះកាត់ម្ដងរួមមកហើយកាលពីដើមឆ្នាំ ២០២៣។ ដោយឡែក លោកបានបង្ហាញវត្តមានក្នុងការងារសិល្បៈជាថ្មីម្ដងទៀតកាលពីខែឧសភានេះ ព្រមទាំងបញ្ជាក់ថាខ្លួននឹងត្រឡប់មកកាន់ការងារសម្ដែងវិញ ដែលធ្វើឱ្យអ្នកគាំទ្ររបស់លោកទន្ទឹងរង់ចាំទស្សនាស្នាដៃលោក មុននឹងទទួលដំណឹងនៃការបាត់បង់មួយនេះ។
ត្រឡប់ទៅមើលប្រវត្តិក្នុងវិថីសិល្បៈវិញ អំ អាត់ខាផាន់ ចាប់ផ្ដើមអាជីពសិល្បៈជាតួសម្ដែងក្នុងពាណិជ្ជកម្ម វីដេអូចម្រៀង ហើយក្រោយមកក៏បានចូលរួមសម្ដែងជាតារាកិត្តិយសក្នុងរឿងភាគមួយរបស់ប៉ុស្តិ៍លេខ៣ កាលពីឆ្នាំ ២០០៨ ជាមួយនឹងតួអង្គចិត្តអាក្រក់ និងតួរងដទៃទៀតនៅប៉ុស្តិ៍លេខ៣។

តារាសម្ដែងដែលបន្សល់ទុកនៅស្នាដៃដ៏គួរឱ្យចងចាំជាច្រើន រូបនេះ បានចាប់ឱកាសសម្ដែងនៅប៉ុស្តិ៍លេខ ៧ ជាមួយនឹងតារាស្រីលំដាប់ប្រទេស Aum Patcharapa ក្នុងរឿង Two Moon Tigers នៅក្នុងឆ្នាំ ២០០៩។ បើទោះបីជាលោកនៅមិនទាន់បានសម្ដែងជាតួឯកក៏ពិតមែន តែតាមរយៈរឿងនេះលោកបានទទួលពានរង្វាន់ទូរទស្សន៍មាស ក្នុងនាមជាតារាសម្ដែងប្រុសឆ្នើម។
ក្រោយមក ក្នុងនាមជាតារាសម្ដែងប្រចាំប៉ុស្តិ៍លេខ៧ លោកបានទទួលតំណែងជាតួប្រុសឯកជាលើកដំបូងនៅក្នុងរឿង អ្នកបម្រើហៃសូរ មុននឹងបន្តជាមួយនឹងតំណែងមួយនេះនៅក្នុងរឿងបន្ទាប់ៗទៀតដូចជារឿង ទ្វេភព រលកស្នេហ៍ក្នុងចិត្ត ស្នេហាបម្លាស់ទី កាបពីទែនកំពូលស្នេហ៍ និងរឿង អាថ័នត្រៃភពជាដើម។






គួរបញ្ជាក់ផងដែរថា បច្ចុប្បន្នពិធីបុណ្យសពរបស់លោកកំពុងប្រារព្ធធ្វើឡើងដោយមានភរិយា និងឪពុកម្ដាយជាអ្នកចាត់ចែង មុននឹងឈានដល់ការបូជានៅថ្ងៃសៅរ៍ ទី២៨ ខែកញ្ញា ឆ្នាំ២០២៤ វេលាម៉ោង៣រសៀល ៕
























Account
Security
Favourite Content