រំឭកដល់អតីតសមាជិកក្រុម (G)I-DLE Soojin ពិតជាធ្វើឱ្យអ្នកគាំទ្រជាច្រើនហាក់មានអារម្មណ៍មិនអស់អាល័យ ដោយសារតែរូបនាងសម្រេចចិត្តចាកចេញពីក្រុមក្រោយជួបរឿងអាស្រូវ Bully មិត្តរួមថ្នាក់។ តែយ៉ាងណាមិញ មិនមានភស្ដុតាងច្បាស់លាស់ណាមួយបញ្ជាក់ច្បាស់ថា Soojin ធ្លាប់ធ្វើបាបមិត្តរួមថ្នាក់កាលពីនៅរៀន ជាហេតុធ្វើឱ្យក្រុមអ្នកគាំទ្រសោកស្ដាយទេពកោសល្យ និងសមត្ថភាពរបស់នាងមិនគួរចាកចេញពីក្រុមទាំងដូច្នេះឡើយ។
ចុងខែ សីហា ឆ្នាំ ២០២២ ជាពេលវេលាចុងក្រោយដែលអ្នកគាំទ្ររបស់ (G)I-DLE និង Soojin បានទទួលដំណឹងពីតារាស្រីរូបនេះ។ ដោយមិត្តភក្ដិរបស់ Soojin បានបង្ហើបថា នាងកំពុងរស់នៅយ៉ាងសុខសប្បាយ មិនមានបញ្ហាអ្វីឡើយ កុំមានការព្រួយបារម្ភ។ អមជាមួយដំណឹងទាំងអស់នេះ Soojin ក៏ឱ្យតម្រុយមួយចំនួនដែលនាងអាចនឹងវិលត្រឡប់មកសិល្បៈវិញឆាប់ៗ ខាងមុខ។
រហូតដល់ដើមខែ មេសា ឆ្នាំ ២០២៣ រូបនាងត្រូវបានអ្នកគាំទ្រប្រទះឃើញនៅផ្សារទំនើបមួយកន្លែងក្នុងប្រទេសកូរ៉េខាងត្បូង។ បើតាមសម្ដីអ្នកដែលបានជួប SooJin នាងមើលទៅមានសុខភាពមាំទាំល្អ និងសប្បាយរីករាយមិនមានបញ្ហាអ្វីនោះទេ។ លើសពីនេះ នាងថែមទាំងបានដោះម៉ាស់ដើម្បីនិយាយរាក់ទាក់ជាមួយអ្នកគាំទ្រទៀតផង។
បន្ទាប់ពីឃើញបែបនេះ អ្នកគាំទ្រជាច្រើនបានបញ្ចេញមតិសប្បាយរីករាយខ្លាំង ពីព្រោះ Soojin រស់នៅយ៉ាងមានក្ដីសុខ និងមិនមានបញ្ហាអ្វីខ្លាំងក្រោយជួបរឿងអាស្រូវ។ មិនតែប៉ុណ្ណោះថែមទាំងបញ្ចេញមតិជាច្រើនថា ពួកគេនឹងរង់ចាំរូបនាងត្រឡប់មកវិញ។
គួរបញ្ជាក់ថា នៅខែ សីហា ឆ្នាំ ២០២១ Soojin បានប្រកាសចាកចេញពីក្រុមចម្រៀង (G)I-DLE ក្រោយត្រូវបានគេចោទប្រកាន់ថា បានធ្វើបាបមិត្តរួមថ្នាក់របស់ខ្លួន ដោយក្នុងចំណោមអ្នកដែលនាងធ្វើបាបនោះមានតារាសម្ដែងស្រី Seo ShinAe ផងដែរ៕