តារាសម្ដែងប្រុសល្បី Chris Evans ឬគ្រប់គ្នាស្គាល់ថាជាតួអង្គ Captain America របស់ Marvel បានប្រកាសផ្អាកប្រើប្រាស់បណ្ដាញសង្គម Instagram និង Twitter មួយរយៈ ក្រោយរូបលោកចង់ផ្ដោតលើជីវិតផ្ទាល់ខ្លួន។

យោងតាមប្រភពព័ត៌មាន Holr Magazine បានឱ្យដឹងថា ចំពោះមូលហេតុដែលតារាប្រុស ៤២ ឆ្នាំរូបនេះសម្រេចផ្អាកលេងបណ្ដាញសង្គមដោយសារតែប៉ះពាល់ជីវិតប្រចាំថ្ងៃរបស់លោកខ្លាំងពេក។ តារាប្រុស Chris Evans បានទម្លាយថា បណ្ដាញសង្គមទាំងអស់នេះធ្វើឱ្យលោកញៀនខ្លាំងព្រមទាំងចំណាយពេលច្រើនលើការប្រើប្រាស់ទូរស័ព្ទ។

មែនទែនទៅ វាធ្វើឱ្យលោកខាតបង់ពេលវេលាច្រើន លែងមានចំណាប់អារម្មណ៍លើការអានសៀវភៅ មិនសូវមានទំនាក់ទំនងជាមួយមិត្ដភក្ដិ និងក្រុមគ្រួសារ។ ជាពិសេស ថែមទាំងប៉ះពាល់ដល់ការងាររបស់លោកទៀតផង។
បន្ថែមពីនេះ លោកពិតជាអរគុណដល់អ្នកគាំទ្រជាច្រើនដែលគោរពស្រឡាញ់ចូលចិត្តលោក ប៉ុន្ដែលោកមិនចង់ដឹងពីគំនិត ឬការគិតរបស់អ្នកដទៃមកលើខ្លួនលោកឡើយ។ លោកមិនដឹងថា ការប្រើប្រាស់បណ្ដាញសង្គមវាល្អសម្រាប់មនុស្សគ្រប់គ្នា ឬក៏អត់ឡើយ។ តែទោះជាយ៉ាងណា លោកនឹងត្រឡប់មកប្រើប្រាស់បណ្ដាញសង្គមវិញគ្រាន់តែមិនទាន់ដឹងពេលវេលាច្បាស់លាស់។

គួរបញ្ជាក់ថា ដើមឡើយតារាប្រុស Chris Evans មិនសូវប្រើប្រាស់បណ្ដាញសង្គមឡើយទើបមួយរយៈចុងក្រោយនេះលោកចាប់ផ្ដើមបង្ហោះរូបភាព និងឆ្លើយឆ្លងលេងកម្សាន្ដជាមួយអ្នកគាំទ្រ។ មិនបានប៉ុន្មានរូបលោកក៏ប្រកាសឈប់ប្រើប្រាស់បណ្ដាញសង្គមវិញ។ មហាជនមួយចំនួនជឿថា មូលហេតុមួយផ្សេងទៀតដែលធ្វើឱ្យលោកសម្រេចឈប់ប្រើប្រាស់បណ្ដាញសង្គមប្រហែលជាអាចមានមតិមិនល្អមួយចំនួនទាក់ទិនរឿងមិត្តស្រីមានវ័យក្មេងជាងលោក ១៦ ឆ្នាំគឺតារាស្រី Alba Baptista៕





















































Account
Security
Favourite Content