តារាសម្ដែង នី មុនីនាថ ដែលមហាជនធ្លាប់បានស្គាល់ថាជាតារាទឹកភ្នែក បានចេញវីដេអូមួយបង្ហាញពីការព្រួយបារម្ភដោយតួលេខនៃចំនួនអ្នកចុះឈ្មោះចូលរួមការបរិច្ចាគឈាមដោយស្ម័គ្រចិត្តមានមិនដល់ ១០០នាក់ខណៈកាន់តែកៀកថ្ងៃទៅហើយ។

ប៉ុន្មានថ្ងៃមុននេះ តារាសម្ដែងសម្បុរស្រអែមស្រស់ នី មុនីនាថ បានបង្ហាញទឹកមុខព្រួយបារម្ភខណៈមិនសូវមានបងប្អូនចាប់អារម្មណ៍ក្នុងការចូលរួមបរិច្ចាគឈាមដោយស្ម័គ្រចិត្តដែលការងារមនុស្សធម៌មួយនេះសង្គមតម្រូវការខ្លាំងបំផុត។ ជាក់ស្ដែង នៅក្នុងវីដេអូនោះដែរ នី មុនីនាថ បានឱ្យដឹងពីតួលេខនៃចំនួនអ្នកចុះឈ្មោះចូលរួមបរិច្ចាគឈាមដែលមានត្រឹមតែ ៥៥ នាក់តែប៉ុណ្ណោះដែលនេះគឺជាចំនួនមួយដែលអ្នកនាងមានការព្រួយបារម្ភជាពន់ពេកព្រោះតម្រូវការឈាមមានចំនួនច្រើនខណៈការផ្ដល់មានចំនួនតិចនៅឡើយ។

ក្នុងនោះដែរ អ្នកនាងក៏បានអំពាវនាវសុំឱ្យមានការចូលរួមបន្ថែមពីសំណាក់បងប្អូនប្រជាជនខ្មែរក្នុងការបរិច្ចាគឈាមដោយស្ម័គ្រចិត្តនៅថ្ងៃទី ៦ ខែ មេសា ខាងមុខនេះចាប់ពីម៉ោង ៨ព្រឹកដល់ម៉ោង៩យប់ នៅផ្សារទំនើបអូឡាំព្យាឱ្យបានច្រើនកុះករបន្ថែមទៀត។ នាថ្ងៃនោះដែរ ពេលព្រឹកមានការសម្ដែងឱវាទនិងសមាធិ ព្រមទាំងមានការចូលរួមចែករំលែកពីអ្នកជំងឺដែលធ្លាប់ទទួលបានឈាមពីមូលនិធិ នី មុនីនាថ និងផលវិបាកផ្សេងៗ។ ដោយឡែក ពេលល្ងាចក៏មានការបង្ហាញទស្សនីយភាពល្ខោនយីកេរឿងទុំទាវ ការសម្ដែងក្បាច់គុនល្បុក្កតោ ព្រមជាមួយកម្មវិធីច្រៀងរាំពីសំណាក់សិល្បករផងដែរ។


ការបំផុសសកម្មភាពមនុស្សធម៌នេះឡើងជាការចូលរួមចែករំលែកក្ដីស្រលាញ់ទៅកាន់ជនរងគ្រោះទាំងឡាយដែលកំពុងត្រូវការឈាមក្នុងការជួយសង្គ្រោះជីវិត និងជាគុណតម្លៃដ៏ប្រពៃមិនអាចកាត់ថ្លៃបាន៕
ប្រភពរូបភាព ៖ Ny Monyneath




















































Account
Security
Favourite Content