ក្រុមចម្រៀងប្រុស Stray Kids បានបរិច្ចាគប្រាក់ចំនួន ៨០០ លានវ៉ុន (ប្រហែល ៥៤៤ ០០០ ដុល្លារ) ដើម្បីជួយដល់អ្នករងគ្រោះ និងតំបន់ដែលរងផលប៉ះពាល់ដោយភ្លើងឆេះព្រៃដែលបានលេបត្របាក់នៅទូទាំងភាគអាគ្នេយ៍នៃប្រទេសកូរ៉េកាលពីសប្តាហ៍មុន។ នេះបើយោងតាមទីភ្នាក់ងារ JYP Entertainment ឱ្យដឹងនៅថ្ងៃអង្គារ ទី១ ខែមេសានេះ។

យោងតាម JYP Entertainment ថវិកាបរិច្ចាគនេះត្រូវបានផ្តល់ឱ្យតាមរយៈសមាគមសង្គ្រោះគ្រោះមហន្តរាយ Hope Bridge Korea និង World Vision ហើយនឹងត្រូវបានបែងចែកសម្រាប់ការទិញសម្ភារសង្គ្រោះបន្ទាន់ និងឧបករណ៍ជំនួយ ព្រមទាំងជួយដល់អ្នកពន្លត់អគ្គិភ័យផងដែរ។
តាមរយៈសេចក្ដីថ្លែងការណ៍រួម សមាជិកក្រុម Stray Kids បាននិយាយថា៖ “យើងពិតជាសោកស្ដាយយ៉ាងជ្រាលជ្រៅចំពោះការឈឺចាប់ដែលអ្នកស្ថិតក្នុងតំបន់នោះបាននិងកំពុងជួបប្រទះ។ យើងក៏សូមថ្លែងអំណរគុណចំពោះកិច្ចខិតខំប្រឹងប្រែងទាំងអស់របស់ក្រុមការងារដើម្បីផ្ដល់ការសង្គ្រោះក្នុងហេតុការណ៍នេះ”។
ចាប់តាំងពីការបរិច្ចាគលើកដំបូងដើម្បីគាំទ្រដល់កុមារក្រីក្រនៅក្នុងប្រទេសកំពុងអភិវឌ្ឍន៍នៅក្នុងឆ្នាំ ២០១៤ មកដល់ពេលនេះ Stray Kids បានធ្វើការរួមចំណែកជាបន្តបន្ទាប់ តួយ៉ាងដូចជាផ្ដល់អាហារថ្ងៃត្រង់សម្រាប់កុមារដែលខ្វះខាតនៅក្នុងប្រទេសកូរ៉េ ជំនួយសង្គ្រោះបន្ទាន់ក្នុងកំលុងពេលរញ្ជួយដីនៅស៊ីរី-តួកគីក្នុងឆ្នាំ ២០២៣ និងជួយដល់កិច្ចខិតខំប្រឹងប្រែងដើម្បីប្រយុទ្ធប្រឆាំងនឹងការខ្វះខាតស្បៀងអាហារសកលនៅឆ្នាំ ២០២៤។
បច្ចុប្បន្ន Stray Kids កំពុងមមាញឹកក្នុងការប្រគំតន្ត្រីទេសចរណ៍ពិភពលោកដែលមានចំនួន ២២ ទីក្រុងនៅអាមេរិកឡាទីន អាមេរិកខាងជើង អាស៊ី និងអឺរ៉ុបរហូតដល់ចុងខែកក្កដា។
គួរបញ្ជាក់ថា ភ្លើងឆេះព្រៃដែលបានឆាបឆេះពីថ្ងៃទី ២២ ខែមីនា ដល់ថ្ងៃសុក្រសប្ដាហ៍មុន បានបណ្តាលឲ្យមានការខូចខាតដ៏ធំមិនធ្លាប់មានពីមុនមក។ នៅទូទាំងប្រទេស ផ្ទៃដីសរុបដែលបានឆេះមានទំហំប្រហែល ៤៨ ២៣៩ ហិកតា ស្មើនឹងប្រហែល ៨០ ភាគរយនៃទំហំទីក្រុងសេអ៊ូល។ នៅក្នុងខេត្ត North Gyeongsang តែមួយ ផ្ទះជាង ៣៤០០ ខ្នង និងទីកន្លែងកសិកម្មចំនួន ២១០០ កន្លែងត្រូវបានបំផ្លាញ។ មនុស្សយ៉ាងហោច ៣០ នាក់បានស្លាប់ និង ៤៥ នាក់ផ្សេងទៀតបានរងរបួស ធ្វើឱ្យហេតុការណ៍នេះក្លាយជាគ្រោះមហន្តរាយភ្លើងឆេះព្រៃដ៏សាហាវបំផុតរបស់ប្រទេសកូរ៉េ ៕























Account
Security
Favourite Content