ប៉ុន្មានឆ្នាំចុងក្រោយនេះ អ្នកគាំទ្របានសង្កេតឃើញថាតារាចម្រៀងស្រីកំពូល ២ រូបប្រចាំប្រទេស មាស សុខសោភា និង ពេជ្រ សោភា កាន់តែមានរូបរាង និងសម្រស់ស្រស់ស្អាតខ្លាំងឡើងៗ គឺស្អាតជាងពេលទើបប្រឡូកសិល្បៈទៅទៀត។
ផ្ដល់បទសម្ភាសន៍កន្លងមក សោភា ទាំង ២ ធ្លាប់បានលើកឡើងពីការថែរក្សាសម្រស់ និងរូបរាងខ្លាំងនាប៉ុន្មានឆ្នាំចុងក្រោយនេះ ដោយមានទាំងលំហាត់ប្រាណ និងជ្រើសរើសរបបអាហារល្អៗបែបសុខភាពច្រើន។

ទាំង ពេជ្រ សោភា និង មាស សុខសោភា គឺជាតារាចម្រៀងស្រីជួរមុខ ហើយក៏ជាតារារៀមច្បងដែលទទួលបានការគោរពស្រលាញ់ពីសិស្សប្អូនខ្លាំងដូចគ្នា ព្រោះមិនចេះប្រកាន់ខ្លួន ហើយគាំទ្រដល់សកម្មភាពមិត្តរួមអាជីព។ ចំណុចពិសេសដែល សោភា ទាំង ២ ដូចគ្នា ជាមនុស្សពូកែលេងសើច ហើយផ្ដល់ភាពរីករាយដល់ក្រុមការងារទាំងអស់គ្នា រហូតអ្នកនៅក្បែរខ្លួនថា ពេលជួបគ្នាមិនចេះអស់ពាក្យនិយាយ និងឮតែសំណើចក្អាក្អាយកងរំពង។
បើនិយាយពីវ័យវិញម្ចាស់បទ «ខ្ញុំស្មោះគេ គេស្មោះអ្នកផ្សេង» ឆ្នាំនេះអាយុ ៤០ ឆ្នាំ និងមានកូនកំលោះបាត់ទៅហើយ តែនៅមានក្បាលពោះរាបស្មើ និងចង្កេះតូចស្អាត សឹងតែមិនជឿថាធ្លាប់ឆ្លងកាត់ការមានផ្ទៃពោះឡើយ។ សម្រាប់តារាស្រីមិនចេះវាយឫករូបនេះ ថាអ្នកនាងព្យាយាមហាត់ប្រាណ និងប្រើផលិតផលជំនួសសុខភាពខ្លះ ដើម្បីឲ្យរាងនៅតែស្អាត និងស្បែកភ្លឺរលោងដូចក្មេងម្ដងទៀត។ ក្រោយទទួលបានលទ្ធផលនៃការប្រើប្រាស់ផលិតផលជំនួយដល់សុខភាពខាងក្នុងនោះរួចមក មាស សុខសោភា ក៏បានក្លាយជា BA ផលិតផលនោះតែម្ដង។




ចំណែកតារាចម្រៀងប្រចាំផលិតកម្មហង្សមាស ពេជ្រ សោភា វិញ មិនត្រឹមតែមានតិចនិកជួយឲ្យរាងស្អាតម្នាក់ឯងឡើយ អ្នកនាងក៏បានបង្ហាញពីរបៀបជួយសម្រកគីឡូដល់អ្នកគាំទ្រផងដែរ។ ស្ថិតក្នុងវ័យ ៣៩ ក្បែរ ៤០ ឆ្នាំ តារាស្រីម្ចាស់បទ «នារីល្ងីល្ងើស្មោះស្នេហ៍» មានរូបរាងស្រឡូនខ្លាំង សមនឹងកម្ពស់ ១,៦៥ ម៉ែត្រ។ អ្នកនាងក៏បានបញ្ជាក់ថា ក្រៅពីមានរបបអាហារតឹងរ៉ឹង, ហាត់ប្រាណ និងបន្ថែមជំនួយផលិតផលសុខភាពដូចទៅនឹងមិត្តរួមអាជីព មាស សុខសោភា ដែរ។ អ្វីដែលពិសេស ពេជ្រ សោភា ពេលទទួលទានផលិតផលនោះត្រូវក៏ក្លាយជាអ្នកតំណាងដូច មាស សុខសោភា។
សកម្មភាពការងារសិល្បៈ សោភា ទាំង ២ មមាញឹកដូចគ្នាទាំងឡើងខនសឺត និងចូលរួមសកម្មភាពនានា ហើយក្រៅពីចេញច្រៀង តារាស្រីកំពូលសំណើចទាំងទ្វេក៏ត្រូវប៉ាន់ខ្លាំងក្នុងការប្រម៉ូតផលិតផលថែរក្សាសុខភាព និងសម្រស់។ បទចម្រៀងថ្មីបំផុតរបស់ មាស សុខសោភា « ខ្ញុំមិនស្មោះគេ គេមិនស្មោះខ្ញុំ» ដែលបានចេញកាលពីជាង ២ ខែមុននៅ Camtrax ជាផលិតកម្ម ផ្ទាល់ខ្លួន និងមានរឿងភាគខ្លី១ផងដែរ។ រីឯ ពេជ្រ សោភា ក្រោយបង្វឹកកូនក្រុមក្លាយជាម្ចាស់ពាន The Voice Cambodia រដូវកាលទី៣ រួចមក ក៏ក្លាយជាគណៈកម្មការកម្មវិធី Beat The Best រដូវកាលទី២ ហើយក៏បានចេញបទចម្រៀងសម្រាប់ឱកាសពិធីបុណ្យចូលឆ្នាំខ្មែរកន្លងទៅដែរ៕





























Account
Security
Favourite Content