WonYoung សមាជិកក្រុមចម្រៀង IVE ជាតារាស្រីខេប៉ុបដែលមានភាពលេចធ្លោម្នាក់។ មែនទែនទៅសមត្ថភាពពូកែ អមជាមួយរូបសម្រស់ស្រស់ស្អាតរបស់នាង ធ្វើឲ្យនាងក្លាយជាតារាស្រីដែលទទួលបានការគាំទ្រយ៉ាងខ្លាំង ក្នុងចំណោមក្រុមចម្រៀងនារីខេប៉ុបជំនាន់ទី ៤។
យ៉ាងណាមិញ ទោះជាទទួលបានការគាំទ្រយ៉ាងច្រើនក៏ដោយ តែរូបនាងនៅចៀសមិនផុតពីមតិអាក្រក់ៗ។ នាងធ្លាប់ត្រូវបានមតិមួយចំនួន រិះគន់ទាក់ទង រឿងការញ៉ាំអាហារ ជាដើម។ ក្នុងឱកាសបង្ហាញខ្លួនក្នុងកម្មវិធី Salon Trip 2 តារាស្រី WonYoung បានបង្ហើបពីវិធីដែលធ្វើឲ្យនាងអាចឆ្លងផុតមិនខ្វល់ពីមតិអាក្រក់ៗ។



WonYoung បានលើកឡើងថា បើទោះបីជានាងស្ដាប់ឮពាក្យអាក្រក់ៗ និងពិបាកស្ដាប់ តែនាងមិនមានបញ្ហាអ្វីទេ លុះត្រាតែពាក្យសម្ដីទាំងនោះជាពាក្យពិតទើបគួរឲ្យឈឺចាប់។ បើវាមិនមែនជាការពិត ពិតណាស់វាមិនមានអ្វីប៉ះពាល់ដល់នាងឡើយ។ ក្នុងករណីប្រសិនបើវាជាការពិត ឬត្រឹមត្រូវ នាងនឹងកែប្រែ វាជារឿងដែលត្រូវធ្វើ ដើម្បីល្អប្រសើរ។
តារាស្រីវ័យ ១៩ ឆ្នាំ បន្ថែមជាសំណួរវិញថា៖ «តើនរណាដែលមិនទទួលការប៉ះពាល់ដោយសារការរិះគន់? ដូច្នេះយើងត្រូវតែទទួលយកតាមមធ្យោបាយផ្សេងៗ និងកុំធ្វើឲ្យខ្លួនឯងអស់សង្ឃឹម»។



គួរបញ្ជាក់ថា WonYoung បានបង្ហាញមុខក្នុងវិស័យសិល្បៈកូរ៉េតាំងពីអាយុ ១៤ ឆ្នាំ ជាហេតុធ្វើឲ្យនាងទទួលបានទាំងមតិសរសើរ និងមតិរិះគន់មកទន្ទឹមគ្នា ដោយមតិខ្លះលើកឡើងនាងគួរតែផ្ដោតលើការសិក្សាជាជាងចំណាយពេលរាំច្រៀង លើឆាក។ ទោះជាយ៉ាងណាក្ដី តារាស្រីរូបនេះនៅតែបន្ដប្រឹងប្រែងឥតឈប់ឈរ បន្ដដើរតាមក្ដីស្រមៃរបស់ខ្លួន ធ្វើឲ្យបច្ចុប្បន្ន នាងក្លាយជាតារាស្រីខេប៉ុបលេចធ្លោម្នាក់៕


























Account
Security
Favourite Content