ផលិតកម្ម YG Entertainment សម្រេចចិត្តលែងទទួលការងារគ្រប់គ្រងលើតារាសម្ដែងបន្តទៅទៀត ដោយចង់បង្វែរមកផ្ដោតលើវិស័យចម្រៀងវិញ។ នេះបើយោងតាមដំណឹងជាផ្លូវការនៅថ្ងៃទី១៧ ខែមករានេះ។
ក្រុមហ៊ុនល្បីឈ្មោះផ្នែកកម្សាននៅក្នុងប្រទេសកូរ៉េខាងត្បូងខាងលើ បានប្រកាសថា៖ “យើងសូមថ្លែងអំណរគុណយ៉ាងស្មោះស្ម័គ្រចំពោះតារាប្រុសស្រីដែលបានធ្វើការជាមួយពួកយើងអស់រយៈពេលជាច្រើនឆ្នាំ ក៏ដូចជាអរគុណដល់អ្នកគាំទ្រសម្រាប់ការស្រលាញ់ និងការគាំទ្រកន្លងមក។ យើងសន្យាថានឹងនៅតែជួយមើលថែសិល្បកររបស់យើងនៅពេលដែលពួកគេត្រូវការរហូតដល់ទីបញ្ចប់”។
ជាមួយគ្នានេះ YG ក៏បានបញ្ចេញបញ្ចីឈ្មោះរបស់សិល្បករដែលស្ថិតនៅក្រោមការគ្រប់គ្រងរបស់ខ្លួនកន្លងមកផងដែរ ដោយក្នុងនោះរួមមានតារាសម្ដែងជើងចាស់ និងតារាស្រករក្រោយ ដូចជា Kim Hee Ae, Cha Seung Won, Jang Hyun Sung, Yoo In Na, Jung Hye Young, Yoo Seung Ho, Lee Sung Kyung, Jang Ki Yong, Lee Soo Hyuk, Kyung Soo Jin, Han Seungyeon, Son Na-Eun, Gal So Won, Park So Yi និងតារាសម្ដែងជាច្រើនរូបទៀត។
គួររំឭកផងដែរថា ការត្រឡប់ទៅផ្ដោតលើវិស័យចម្រៀងរបស់ YG Entertainment បានចាប់ផ្ដើមឡើងតាំងតែពីដើមឆ្នាំ ២០២៤ មកម្ល៉េះ ដោយផលិតកម្មខាងលើបានរៀបចំ YGX ឱ្យក្លាយជាមជ្ឈមណ្ឌលបណ្តុះបណ្តាលតន្រ្តីករលំដាប់អន្តរជាតិ និងបានជ្រើសរើសបុគ្គលិកផ្នែកផលិតបន្ថែមទៀត សរុប ៥០នាក់។
ទាក់ទិនជាមួយនឹងការបិទភ្នាក់ងារខាងលើនេះ សាធារណជនគិតថា YG កំពុងតែរៀបចំគម្រោងត្រលប់មកវិញរបស់ក្រុមចម្រៀងស្រី BLACKPINK ដែលអាចនឹងមានកម្មវិធីប្រគំតន្ត្រីទេសចរណ៍នៅក្នុងឆ្នាំ ២០២៥ នេះ ដូចគ្នានឹងការបន្ថែមសកម្មភាពនានារបស់ក្រុមចម្រៀង BABYMONSTER និង 2NE1 ជាដើម៕