តារាចម្រៀងអាមេរិក Miley Cyrus នឹងចូលរួមចំណែកក្នុងបទចម្រៀងថ្មីមួយបទសម្រាប់ភាពយន្ត “Avatar: Fire and Ash” ដែលមានចំណងជើងថា Dream As One”។

បទចម្រៀងនេះត្រូវបាននិពន្ធឡើងជាពិសេសដោយ Miley Cyrus សម្រាប់ភាគបន្តនៃសែស្រឡាយភាពយន្តវិទ្យាស្ត្រដ៏ល្បីល្បាញរបស់ផលិតករ James Cameron ហើយនឹងចេញផ្សាយផ្លូវការនៅថ្ងៃទី ១៤ ខែវិច្ឆិកា។
ក្រៅពី Miley បទចម្រៀងមានចំណងជើងថា ‘Dream As One’ ក៏មានការចូលរួមសហការពីសំណាក់អ្នកនិពន្ធឆ្នើមផ្សេងទៀតដូចជា Andrew Wyatt, Mark Ronson និង Simon Franglen ហើយនឹងបង្ហាញខ្លួននៅក្នុងឈុត End credit សម្រាប់ខ្សែភាពយន្ត Avatar ទីបី។
តារាចម្រៀងវ័យ ៣២ ឆ្នាំបានប្រកាសអំពីបទចម្រៀងនេះដោយបានចែករំលែកឈុតខ្លីៗនៅលើបណ្ដាញសង្គម និងបានពន្យល់បន្ថែមថាផ្នែកខ្លះនៃបទនេះត្រូវបានបំផុសគំនិតដោយដោយភ្លើងឆេះព្រៃដ៏សាហាវដែលបានឆាបឆេះនៅទូទាំងទីក្រុង Los Angeles នៅដើមឆ្នាំនេះ។
Cyrus បានចាប់ផ្តើមសរសេរក្នុង Caption ថា៖ “មានកិត្តិយសក្នុងការចូលរួមភាពយន្ត Avatar: Fire and Ash ជាមួយបទចម្រៀង Original ដែលខ្ញុំបាននិពន្ធជាមួយ Mark Ronson និង Andrew Wyatt”។
“ដោយសារតែខ្ញុំផ្ទាល់បានរងផលប៉ះពាល់ដោយភ្លើងឆេះ និងកំពុងសាងសង់គ្រប់យ៉ាងឡើងវិញពីគំនរផេះ ដូច្នេះគម្រោងនេះមានអត្ថន័យយ៉ាងជ្រាលជ្រៅសម្រាប់ខ្ញុំ។ សូមអរគុណ Jim សម្រាប់ឱកាសដើម្បីប្រែក្លាយបទពិសោធន៍នោះទៅជាការព្យាបាលដោយតន្ត្រី។ ប្រធានបទនៃសាមគ្គីភាព ការព្យាបាល និងសេចក្ដីស្រឡាញ់នៃខ្សែភាពយន្តនេះបានបន្លឺឡើងយ៉ាងជ្រៅក្នុងព្រលឹងខ្ញុំ ហើយការក្លាយជាផ្កាយតូចមួយក្នុងចក្រវាលដែលក្រុមគ្រួសារ Avatar បានបង្កើតឡើងគឺពិតជាក្ដីស្រមៃដែលក្លាយជាការពិត”។ នាងបានបន្ថែម ៕


























Account
Security
Favourite Content