ស្ដាប់ការនិយាយរបស់ ប្រាសាទ ដាវីន ទើបដឹងថា ល្អឥតខ្ចោះសមជាម្ចាស់

សំឡេងត្រូវបានបង្កើតឡើងតាមរយៈប្រព័ន្ធបញ្ញាសិប្បនិម្មិត្ត។

ម្ចាស់មកុដថ្មី Miss Universe Cambodia 2024 ប្រាសាទ ដាវីន បានឡើងបញ្ចេញមតិ និងណែនាំខ្លួនជាផ្លូវការ ធ្វើឲ្យអ្នកគាំទ្រ និងភ្ញៀវកិត្តិយស ជាពិសេសសម្ដេចកិត្តិសង្គហបណ្ឌិត ម៉ែន សំអន ញញឹមជាប់មាត់ ពេលជ្រើសរើសបានបេក្ខភាពដ៏មានគុណភាពពិតៗ។ នរណាៗក៏លាន់មាត់ នារាត្រីនោះ ប្រាសាទ ដាវីន ពិតជាស្រស់ស្អាត ព្រមទាំងមានការវិវត្តន៍ខ្លាំងទាំងការដើរ និងការឡើងបញ្ចេញមតិជាសាធារណ។ អ្នកនាងក៏បានទៅហ្វឹកហាត់បន្ថែមនៅបរទេសមួយរយៈមកហើយទាំងការដើរ និង Q&A ដើម្បីឲ្យច្បាស់ថា ការវិលត្រឡប់មកវិញលើកនេះ ត្រូវតែល្អឥតខ្ចោះ។

សម្ដីមួយៗច្បាស់ ស្នាមញញឹមមានជាប់លើផ្ទៃមុខ កែវភ្នែកស្រទន់ បាញ់តម្រង់មកអ្នកស្ដាប់ និងប្រកបដោយភាពជឿជាក់ ច្បាស់ណាស់ថាស្ថាប័ន Miss Universe Cambodia ជ្រើសរើសបានម្ចាស់មកុដស័ក្ដិសម និងល្អបំផុត។ ក្រោយការប្រកាសលទ្ធផល ធ្វើឲ្យ ប្រាសាទ ដាវីន វ័យ ៣៣ ឆ្នាំ ក្លាយជាស្ត្រីខ្មែរដំបូងគេដែលរៀបការ និងមានកូនស្រីម្នាក់ ឈ្នះមកុដ Miss Universe Cambodia នេះបាន។ ពេល ដាវីន ឡើងបញ្ចេញមតិក្នុងនាមជាម្ចាស់មកុដ បវរកញ្ញាចក្រវាលកម្ពុជា ឆ្នាំ ២០២៤ ធ្វើឲ្យគេដឹងកាន់តែច្បាស់ថា នាងពិតជាស័ក្ដិសមជាមួយតំណែងនោះខ្លាំង ទាំងចំណេះដឹង ការរៀបចំខ្លួន ដំណើរ រួមទាំងការនិយាយស្ដី។

ខ្លឹមសារទាំងស្រុងដែល បវរកញ្ញាចក្រវាលកម្ពុជា ឆ្នាំ ២០២៤ កាលពីយប់មិញ “ជម្រាបសួរប្រជាជនកម្ពុជា! Good evening and Hello Universe។ ខ្ញុំរំភើប និងភ័យផងដែលឈរនៅទីនេះនៅចំពោះមុខអ្នកទាំងអស់គ្នានៅថ្ងៃនេះ មិនត្រឹមតែរូបខ្ញុំប៉ុណ្ណោះទេ ប៉ុន្តែវាជានិមិត្តរូបនៃសក្ដានុពលគ្មានព្រំដែន ដែលស្ថិតនៅក្នុងខ្លួនស្ត្រីគ្រប់រូប។ ជាបវរកញ្ញាចក្រវាលកម្ពុជាដែលទើបទទួលគ្រងមកុដថ្មីៗ ខ្ញុំជាសក្ខីភាពមួយចំពោះការពិតថា សុបិនមិនមែនគ្រាន់តែជារូបចម្លាក់នៃការស្រមើស្រមៃរបស់យើងប៉ុណ្ណោះទេ ប៉ុន្តែជាការពិតដែលអាចសម្រេចបានក្នុងដំណើរជីវិតនេះ។ ខ្ញុំបានដឹងថា ភាពជាអ្នកដឹកនាំ មិនមែននិយាយអំពីមុខតំណែងដែលខ្លួនមាននោះទេ ប៉ុន្តែជាសកម្មភាពដែលត្រូវធ្វើ ហើយវានិយាយអំពីការបំផុសគំនិតអ្នកដទៃ ការជំរុញឲ្យមានភាពរីកចម្រើន និងធ្វើឲ្យមានការផ្លាស់ប្ដូរ។

ក្នុងនាមជាស្ត្រី យើងគឺជាអ្នកដឹកនាំដោយធម្មជាតិ។ យើងដឹកនាំដោយការយល់ចិត្ត ការអត់ធ្មត់ និងការផ្ដល់កិត្តិយស។ យើងដឹកនាំនៅក្នុងផ្ទះរបស់យើង នៅកន្លែងធ្វើការ និងក្នុងសហគមន៍របស់យើង។ យើងដឹកនាំ មិនមែនដោយការត្រួតត្រាទេ ប៉ុន្តែដោយការចិញ្ចឹមបីបាច់។ ដូចដែលយើងតែងតែជឿថា ស្ត្រីអាចសម្រេចបានអ្វីដែលយើងបានកំណត់។ ខ្ញុំមកទីនេះ ដើម្បីបញ្ជាក់ ព្រោះកាលពី ៥ ឆ្នាំមុន សុបិនចង់ក្លាយជាបវរកញ្ញារបស់ខ្ញុំត្រូវរលាយ ដោយសារការកំណត់អាយុ។ ខ្ញុំបានក្លាយជាម្ដាយរបស់ព្រះនាងតូច Kiyomi។ ប៉ុន្តែក្ដីសុបិននេះ ភ្ញាក់រលឹកឡើងវិញ នៅពេលដែលស្ថាប័ន Miss Universe បើកទ្វារទទួលនារីទាំងអស់ពីគ្រប់ទិសទី ដោយមិនកំណត់អាយុ។ ជាសំណាង សកលលោកបានចារទុកថា ខ្ញុំនៅទីនេះ ជាម្ដាយដំបូងដែលគ្រងតំណែងបវរកញ្ញាចក្រវាលកម្ពុជា ហើយក្នុងនាមជាម្ដាយ ខ្ញុំកាន់តែមានអំណាចជាងពេលណាៗទាំងអស់។ ភាពជាម្ដាយមិនមែនជាឧបសគ្គ ឬជាបន្ទុកនោះទេ ប៉ុន្តែជាផ្លាកសញ្ញានៃកិត្តិយស។ ពេលក្លាយជាម្ដាយ វាមិនមែនជាទីបញ្ចប់នៃក្ដីសុបិនរបស់ខ្ញុំទេ តែជាការចាប់ផ្ដើមខ្លួនឯងជាថ្មី។ ដូច្នេះស្ត្រីគ្រប់រូបនៅទីនោះ មិនថាអ្នកជាកូនស្រី បងស្រី ប្រពន្ធ ឬម្ដាយទេ សូមចងចាំរឿងនេះទុក គឺអ្នកខ្លាំង អ្នកមានសមត្ថភាព ហើយអ្នកស័ក្ដិសម ក្ដីសុបិនរបស់អ្នកត្រឹមត្រូវ មហិច្ឆតារបស់អ្នកមានសារៈសំខាន់ ហើយសក្ដានុពលរបស់អ្នក គឺគ្មានដែនកំណត់។ ដូច្នេះសូមកុំបណ្ដោយឲ្យសុបិនរបស់អ្នកក្លាយជាការពិត ហើយនេះជាបវរកញ្ញាចក្រវាលកម្ពុជាឆ្នាំ ២០២៤ ប្រាសាទ ដាវីន”។

រូបភាព៖ INDRA Production

គួរបញ្ជាក់ថា ប្រាសាទ ដាវីន គឺជា 4th Runner up កម្មវិធី Universal Woman 2023។ នាងបានប្រឡូកចូលវិស័យសិល្បៈតាំងពីអាយុ ១៣ ឆ្នាំមកម្ល៉េះ ហើយមកដល់ឆ្នាំ ២០០៥ អ្នកនាងក៏បានជាប់ Freshie Girl លេខ៣។ ដាវីន បានប្រឡូកយ៉ាងជោកជាំក្នុងវិស័យមួយនេះ ជាពិសេសការបង្ហាញម៉ូដ។ ពីមួយថ្ងៃទៅមួយថ្ងៃ នាងអភិវឌ្ឍខ្លួនទៅមុខមិនឈប់ឈរ រហូតធ្វើឲ្យខ្លួនក្លាយជាស្ត្រីដ៏រឹងមាំ និងមានឥទ្ធិពលម្នាក់ ទាំងក្នុងការងារសិល្បៈ ការងារផ្ទាល់ខ្លួន និងការងារសង្គម។ ក្រៅពីមានតួនាទីជាម្ដាយ តារាបង្ហាញម៉ូដ ជាអ្នកជំនួញ ជាអ្នកដឹកនាំកម្មវិធី តារាស្រីសម្បុរទឹកឃ្មុំដូចនារីឡាទីនរូបនេះ ក៏ជាអ្នកធ្វើការស្ម័គ្រចិត្ត ជាទូតសុច្ឆន្ទៈ ព្រមទាំងការងារជាច្រើនមុខទៀត។

បវរកញ្ញាចក្រវាលកម្ពុជា ឆ្នាំ ២០២៤ ប្រាសាទ ដាវីន នឹងតំណាងឲ្យកម្ពុជាទៅចូលរួមប្រកួត Miss Universe 2024 នៅប្រទេសម៉ិកស៊ីកូនាខែវិច្ឆិកា ឆ្នាំ ២០២៤ ខាងមុខនេះ៕