ព្រះនាងតូច នរោត្តម ជេនណា កំពុងជួបទុក្ខធំប៉ុនភ្នំ

កាលពីពេលថ្មីៗនេះព្រះនាងតូច នរោត្តម ជេនណា បានឲ្យដឹងពីរឿងទុក្ខសោកដែលកំពុងជួប ធ្វើឲ្យព្រះនាងមិនអាចធ្វើចិត្តបាននោះ គឺការបាត់បង់ជីដូនបង្កើតគឺ អ្នកម្នាង ឌួង ឌីយ៉ាត កាលពីម្សិលមិញ ដោយរោគាពាធ។

ព្រះនាងបានរៀបរាប់ឲ្យដឹងថា «មរណភាពនៃជីដូនខ្ញុំ អ្នកម្នាង ឌួង ឌីយ៉ាត ខ្ញុំ និងព្រះមាតាខ្ញុំ ព្រះអង្គម្ចាស់ក្សត្រី នរោត្តម បុប្ផារី មានសេចក្តីរំជួលចិត្តរន្ធត់ក្តុកក្តួលជាពន់ពេកណាស់ចំពោះការចាកចេញដ៏ឆាប់រហ័សនៃជីដូនបង្កើតខ្ញុំ អ្នកម្នាង ឌួង ឌីយ៉ាត ដោយជីដូនខ្ញុំបានទទួលមរណភាព កាលពីម៉ោង ១១:៣៩ នាទីព្រឹកនាថ្ងៃទី១១ ខែឧសភា ឆ្នាំ ២០២២ នេះ នៅមន្ទីរពេទ្យមួយក្នុងក្រុងបាងកក ប្រទេសថៃ ដោយរោគាពាធ»។

ដោយក្ដីអាឡោះអាល័យព្រះនាង បានរៀបរាប់បន្តទៀតថា «ម៉ាក់យាយជាទីស្រឡាញ់របស់ចៅ ចៅស្តាយណាស់ដែលចៅមិនបានជួប និងនៅក្បែរម៉ាក់យាយក្នុងដង្ហើមចុងក្រោយ។ ចៅតែងតែបន់ស្រន់សុំអោយម៉ាក់យាយនៅជាមួយចៅអោយបានយូរ តែពេលនេះម៉ាក់យាយទៅចោលចៅហើយ ទៅគ្មានថ្ងៃបានជួបវិញ។ ឱ! ម៉ាក់យាយអើយ ចៅនៅតែនឹក នឹក នឹក និងចងចាំពីការស្រឡាញ់ ការអប់រំ ការថ្នមថ្នាក់របស់ម៉ាក់យាយគ្មានថ្ងៃភ្លេច»។

ចំណែកការបូជាសពជីដូនរបស់ ព្រះនាងតូច នរោត្តម ជេនណា នឹងត្រូវធ្វើឡើងនៅចុងសប្ដាហ៍នេះ។ ព្រះនាងក៏បានបន្តឲ្យដឹងថា សពអ្នកម្នាង ឌួង ឌីយ៉ាត បានមកដល់វត្តបុទុមវត្តី ដើម្បីតម្កល់ធ្វើបុណ្យ ទក្ខិណានុប្បទាន តាមគន្លងប្រពៃណី ព្រះពុទ្ធសាសនាកាលពីយប់ថ្ងៃទី ១១។

ក្នុងនោះសែរាជវង្ស និងបានចូលប្រឡូកក្នុងវិស័យសិល្បៈរូបនោះបញ្ជាក់ថា ពិធីបូជាសពជីដូនព្រះនាងនិងធ្វើឡើងនៅម៉ោង ៧ ព្រឹក ថ្ងៃទី១៤ ខែឧសភា ឆ្នាំ២០២២ នាបរិវេណវត្តបុទុមវត្តី ហើយទ្រង់ក៏ចូលអញ្ជើញសូមសម្ដេច ព្រះអង្គម្ចាស់ក្សត្រា ព្រះអង្គម្ចាស់ក្សត្រី អ្នកអង្គម្ចាស់ អ្នកម្នាង ឯកឧត្តម លោកឧកញ៉ា លោកជំទាវ លោក លោកស្រី ដែលស្រឡាញ់រាប់អាន អ្នកម្នាង ឌួង ឌីយ៉ាត សូមយាង និង អញ្ជើញចូលរួមជាការជូនដំណើរជាកិច្ចចុងក្រោយ។ សម្រាប់ពុកម៉ែបងប្អូនជិតឆ្ងាយដែលគាំទ្រ និងស្រឡាញ់ ព្រះនាង ចង់មកចូលរួមគោរពសព ក៏អាចចូលរួមបានដោយមេត្រីភាព៕